ສາວນ້ອຍບ້ານນາ ຄ້ວາຫາ ປອ ທີ່ຕ່າງແດນ

ໃນສັງຄົມຊົນນະບົດ ທີ່ບ້ານປ່າຂາດອນ ຖືໄດ້ວ່າ: ເປັນເລື່ອງແປກທີ່ໄດ້ຍິນກ່ຽວກັບເດັກຍິງມາຈາກຊົນນະບົດ ທີ່ຢູ່ໃນຄອບຄົວທຸກຍາກສາມາດພິກຜັນໂຕເອງຈົນສໍາເລັດການສຶກສາໃນລະດັບປະລິນຍາໂທຢູ່ຕ່າງປະເທດເພາະ​ວ່າ​ມີ​ຄົນ​ບໍ່​ພໍ​ເທົ່າ​ໃດ​ຄົນທີ່ຈະ​ມີ​ໂອ​ກາດດີໆ ໄດ້​​ຍົກ​ຄວາມລະດັບຄວາມຮູ້-ຄວາມ​ສາ​ມາດ​ ດ້ວຍສະຕິປັນຍາ-ມັນສະໝອງຂອງຕົນລ້ວນໆ ສອບເສັງໄດ້ທຶນໄປສຶກສາຢູ່ຕ່າງແດນເນື່ອງມາຈາກມີຄວາມຈໍາກັດຫຼາຍດ້ານເປັນຕົ້ນທຶນຮອນ, ປະສົບການຊຶ່ງກາຍເປັນອຸປະສັກບໍ່ທໍາມະດາ.

ເຖິງຈະເປັນແນວໃດກໍ່ຕາມ, ແຕ່ສິ່ງເຫຼົ່ານັ້ນບໍ່ສາມາດເອົາຊະນະຈິດໃຈຕໍ່ຄວາມມຸ່ງໝັ້ນພາກພຽນຂອງສາວນ້ອຍ ແກ້ວວິໄລ ແກ້ວອຸດົມ ຊຶ່ງກໍາເນີດ ທີ່ບ້ານນາປາຝາ, ເມືອງຊະນະຄາມ, ແຂວງວຽງຈັນ ຊຶ່ງອາດແມ່ນຜູ້ໜຶ່ງທີ່ນອນໃນເກນ ແລະມາດຕະຖານດັ່ງກ່າວ ແລະໄດ້ພົບວ່ານາງມີ ເຈດຕະນາ ທີ່ຈະລຸກຂຶ້ນເໜືອສິ່ງທ້າທາຍທັງໝົດ ທີ່ນາງພົບ ແລະ ມີຫຼາຍຄົນ ກໍ່ຕ້ອງຊື່ນຊົມກັບຄວາມສໍາເລັດຂອງນາງ.

ຫວ່າງປີກາຍນີ້ (2023) ນາງໄດ້ສໍາເລັດການສຶກສາ ພ້ອມກັບການຮັບໃບປະກາດສະນີຍະບັດ A (ໃບແດງ) ປະລິນຍາໂທສາຂາກະສິກຳທີ່ມະຫາວິທະຍາໄລກະເສດແຫ່ງລັດ Irkutsk, ສະຫະພັນຣັດເຊຍ ແລະ ປີນີ້ອາຍຸນາງກໍ່ 25 ປີ ຊຶ່ງກຳລັງສຶກສາ, ຄົ້ນຄ້ວາຕໍ່ຢູ່ມະຫາວິທະຍາໄລ ໂດຍຄາດຫວັງວ່າ ຈະຈົບຫຼັກສູດປະລິນຍາເອກ ຊຶ່ງເປັນສະຖານທີ່ການສຶກສາຂັ້ນສູງທີ່ ແກ້ວວິໄລ ມີຝັກໄຝ່ ແລະ ຄຸ້ນເຄີຍກັບທັງພາສາຣັດເຊຍ ແລະພາສາອັງກິດ.

ເມື່ອຫວນຄືນຫຼັງ ນາງ ແກ້ວວິໄລ ແກ້ວອຸດົມ ຮຽນຈົບຊັ້ນ ມໍ7 ຢູ່ທີ່ໂຮງຮຽນມັດທະຍົມຕອນປາຍວຽງຈັນ (ມສ.ວຽງຈັນ), ຕຶກພອນສະຫວັນ ປີ 2016; ຫຼັງຈາກຈົບ ມໍ7 ແລ້ວກະໄດ້ທຶນຮຽນຕໍ່ປະລິນຍາຕີ ຢູ່ Irkutsk ສ. ຣັດເຊຍ ເຊີ່ງໄດ້ທືນມາຈາກການສະໝັກຂໍທືນ ເພື່ອຄັດເລືອກນັກຮຽນ ທີ່ມີຜົນການຮຽນດີມາຮຽນຕໍ່ ຢູ່ປະເທດ ຣັດເຊຍ

ຫວ່າງບໍ່ດົນມານີ້, ນັກຂ່າວໜັງສືພິມວຽງຈັນທາມສ໌ ໄດ້ພົບກັບນາງ ແກ້ວວິໄລ ທີ່ໄດ້ເດີນທາງມາຢ້ຽມຢາມ ສປປ ລາວ ບ້ານເກີດເມືອງນອນຂອງນາງຫຼັງຈາກທີ່ລາວໄດ້ສໍາເລັດການສຶກສາປະລິນຍາໂທ ແລະ ເມື່ອຖາມ ກ່ຽວກັບປະສົບການ ແລະ ການຮຽນຮູ້ທາງດ້ານວິທີການ ທີ່ນາງປະສົບຜົນສຳເລັດໃນວົງການນັກວິຊາການລະດັບໂລກ.

  • ໜັງສືພິມວຽງຈັນທາມສ໌ ຖາມ: ນ້ອງໄດ້ຜ່ານກາຍເປັນນັກສຶກສາພິເສດແນວໃດ?
  • ແກ້ວວິໄລ ຕອບວ່າ: ມາຮຽນຣັດເຊຍ ຄັ້ງທໍາອິດກໍ່ຈະໄດ້ຮຽນປີກຽມເຊີ່ງຂະເຈົ້າຈະໃຫ້ຮຽນພາສາຣັດເຊຍ ປະມານ 2-3 ເດືອນ ຫຼັງຈາກນັ້ນຈະແຍກສາຍ ເຊີ່ງນ້ອງເອງ ໄດ້ເລືອກເອົາສາຍກະສິກຳ ທີ່ຢູ່ໃນສາຍທຳມະຊາດ ປະກອບມີ ຟີຊິກ, ເຄມີ, ເລກ ແລະພາສາລັດເຊຍ.

-  ໜັງສືພິມວຽງຈັນທາມສ໌ຖາມ:       

ນ້ອງໄດ້ມີການຍອມຮັບ ສໍາລັບໂຄງການລະດັບປະລິນຍາໂທ ແນວໃດ?

- ແກ້ວວິໄລ ຕອບວ່າ: ເລື່ອງການຮຽນ ບອກໄດ້ເລີຍວ່າຍາກ ແລະທ້າທາຍ ເພາະວ່າທຸກວິຊາ ຈະເປັນພາສາຣັດເຊຍທັງໝົດ ແຕ່ນ້ອງຮຽນຮູ້ທີ່ຈະຜ່ານມັນໄປໄດ້ກໍ່ຄືຄວາມຕັ້ງໃຈ ແລະ ພະຍາຍາມຮຽນໃຫ້ໜັກຂື້ນມີກົດລະບຽບໃຫ້ຕົນເອງບໍ່ວ່າຈະເປັນ ການທວນຄືນສີ່ງ ທີ່ຮຽນທຸກມື້, ທ່ອງຄຳສັບ; ນອກຈາກນີ້, ສີ່ງທີ່ສຳຄັນກະຄື ການຂື້ນຫ້ອງຮຽນບໍ່ໃຫ້ຂາດ ແລະ ຕ້ອງໃຫ້ທັນເວລາ ເພາະຕ່າງປະເທດເປັນຄົນຕົງຕໍ່ເວລາ. ສະພາບອາກາດບ່ອນນ້ອງຮຽນ ກໍ່ຄືໜາວຫຼາຍ, ບາງຄັ້ງອຸນຫະພູມ ຈະຕິດ -50 ອົງ ສາ; ຢູ່ພາຍໃນໂຮງຮຽນສ່ວນຫຼາຍ ຄົນຣັດເຊຍ ຈະບໍ່ໃຊ້ພາສາອັງກິດທີ່ແລກກໍ່ມີຄວາມຫຍຸ້ງຍາກໃນການສົນທະນາເລັກນ້ອຍ, ຢູ່ພາຍໃນຫ້ອງຮຽນ ມີສີ່ງອຳນວຍຄວາມສະດວກທຸກດ້ານເລື່ອງການຮຽນມີເຄື່ອງຈຳລອງທີ່ຄ້າຍຄວາມຈິງເກືອບ 100%; ນອກຈາກນີ້ພາຍໃນໂຮງຮຽນ ຍັງມີເດີ່ນກິລາ, ມີກິລາຫຼາຍປະເພດ ແລະເຄື່ອງອອກກຳລັງທີ່ຫຼາກຫຼາຍ.

ດ້ວຍແຮງບັນດານໃຈໃດ? ທີ່ເຮັດໃຫ້ ນ້ອງຕ້ອງມາຮຽນຕໍ່ທາງດ້ານການກະສິກຳ; ນາງໄດ້ຕອບດ້ວຍຄວາມໝັ້ນໃຈ ວ່າ: ເພາະນ້ອງເອງຄິດສະເໝີວ່າ: ວິຊາກະສິກຳ ເປັນວິຊາ ທີ່ມີຄວາມສຳຄັນ ແລະ ຈຳເປັນພາຍໃນປະເທດເຮົາ. ນອກຈາກນີ້ຍັງຄິດເຫັນຄວາມທຸກຍາກລຳບາກໃນການເຮັດນາ ແລະ ລ້ຽງສັດໃນຄອບຄົວກໍ່ຄືພໍ່ ແລະ ແມ່ ທີ່ເຮັດວຽກດ້ວຍຄວາມອິດເມື່ອຍ, ໃຊ້ແຮງງານເປັນອັນດັບແລກນ້ອງຈື່ງຕັດສິນໃຈມາຮຽນເພື່ອຈະນຳເອົາຄວາມຮູ້ ແລະເຕັກໂນໂລຊີໄປນຳໃຊ້ເພື່ອຫຼຸດຜ່ອນການໃຊ້ແຮງງານ.

ຫຼັງຈາກນ້ອງຮຽນຈົບປະລິນຍາຕີແລ້ວນ້ອງເອງຄິດວ່າ: ຄວາມຮູ້ທີ່ໄດ້ມາຍັງເລັກນ້ອຍ, ບໍ່ພຽງພໍຈຶ່ງຕັດສິນໃຈສຶກສາຕໍ່ລະດັບປະລິນຍາໂທດ້ານປູກຝັງ ແລະລ້ຽງສັດ ກໍ່ຄືການຮຽນສອງຄະນະ ໃນເວລາດຽວກັນ ແລະ ພ້ອມ ທັງເຮັດວຽກຄຽງຄູ່ກັບການຮຽນໄປນຳ ຊຶ່ງວຽກທີ່ນ້ອງເຮັດ ກະຄືຜູ້ຊ່ວຍນັກວິຊາການກະສິກຳເຊິ່ງຈະວາງແຜນເລື່ອງການປູກຝັງ ນຳໃຊ້ລົດໃນການປູກ, ໃສ່ຝຸ່ນ, ຂ້າຫຍ້າ ແລະເກັບກ່ຽວ ຜົນລະປູກ, ນອກຈາກນີ້ຍັງຄິດໄລ່ເອກະສານອື່ນ ທີ່ກໍ່ຄືລາຍຮັບ-ຈ່າຍ ທີ່ຈຳເປັນ. ນອກຈາກນີ້ ນ້ອງກໍ່ໄດ້ຜ່ານການຝືກງານດ້ານການລ້ຽງສັດກໍ່ຄືການໃຫ້ອາຫານ, ຢາບໍາລຸງ ແລະການປະສົມພັນສັດ.

ຕອນນີ້, ນ້ອງໄດ້ສໍາເລັດປະລິນຍາໂທທາງດ້ານການກະສິກຳແລ້ວ ແລະໄດ້ຮັບທືນຮຽນຕໍ່ລະດັບປະລິນຍາເອກ ແລະນ້ອງກຳລັງສຶກສາ ແລະຄົ້ນຄ້ວາລະດັບປະລິນຍາເອກ ແລະວຽກທີ່ຢາກຈະເຮັດໃນຕໍ່ໜ້າກໍ່ຄືວຽກໂຄງການທີ່ວາງແຜນ ແລະສົ່ງເສີມທາງດ້ານການກະສິກຳ ແລະລ້ຽງສັດ.

ໂດຍ: ເພັດໂພໄຊ ແສງປະເສີດ.

แชร์