ລະມາມ ເປີດຂະບວນເສຍຄ່າທໍານຽມທາງ

ສ່ວຍສາອາກອນປະຈໍາເມືອງລະມາມຮ່ວມກັບພະແນກຈາລະຈອນກອງບັນຊາການ ປກສ ແຂວງເຊກອງ ຈັດພິທີເປີດຂະບວນການຊຸກຍູ້ເສຍຄ່າທໍານຽມທາງ ປະຈໍາປີ 2024 ຂຶ້ນ ໃນລະຫວ່າງວັນທີ 30 ມັງກອນ ຫາ ວັນທີ 16 ກຸມພາ 2024 ທີ່ປ້ອມຫຼັກ 3 ບ້ານໂພນໄຊ ເມືອງລະມາມ ໂດຍມີທ່ານ ເຫຼົາທອງ ໂຄດສັກເມືອງ ຮອງຫົວໜ້າສ່ວຍສາອາກອນເມືອງລະມາມ, ທ່ານ ພັນໂທ ສີເນ ຫຼວງຄໍາມະລັງສີ ຫົວໜ້າພະແນກຈາລະຈອນ ກອງບັນຊາການ ປກສ ແຂວງ ແລະພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້, ທ່ານ ເຫຼົາທອງ ໂຄດສັກເມືອງ ໃຫ້ຮູ້ວ່າ: ປະຕິບັດຕາມແຈ້ງການຂອງຫ້ອງການກະຊວງການເງິນ ສະບັບເລກທີ 0209 ລົງວັນທີ 24 ມັງກອນ 2024 ກໍຄື ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ໂດຍສະເພາະແຜນການເກັບລາຍຮັບເຂົ້າງົບປະມານ ປະຈໍາປີ 2024 ໃຫ້ບັນລຸຕາມເປົ້າໝາຍທີ່ວາງໄວ້. ສ່ວຍສາອາກອນປະຈໍາເມືອງລະມາມປະສານສົມທົບກັບກອງບັນຊາການ ປກສ ແຂວງ ໂດຍສະເພາະແມ່ນຕໍາຫຼວດຈາລະຈອນເປີດຂະບວນການຊຸກຍູ້ເສຍຄ່າທໍານຽມທາງ ປະຈໍາປີ 2024. ທັງນີ້ກໍ່ເພື່ອເປັນການອໍານວຍຄວາມສະດວກ ແລະ ປຸກລະດົມ, ກະຕຸກຊຸກຍູ້ທຸກພາກສ່ວນທົ່ວສັງຄົມ ມີສະຕິຕື່ນຕົວ, ມີຄວາມສະໝັກໃຈປະກອບສ່ວນເຂົ້າງົບປະມານໃຫ້ແກ່ລັດກໍຄືການປະກອບສ່ວນພັດທະນາປະເທດຊາດໃຫ້ກ້າວຂຶ້ນຢ່າງບໍ່ຢຸດຢັ້ງ.

ທ່ານ ເຫຼົາທອງ ໂຄດສັກເມືອງ ໃຫ້ຮູ້ຕື່ມວ່າ: ສໍາລັບໄລຍະເວລາການເສຍຄ່າທໍານຽມທາງ ປະຈໍາປີ 2024 ແມ່ນຈະສິ້ນສຸດໃນວັນທີ 31 ພຶດສະພາ 2024. ສະນັ້ນ, ຈຶ່ງຂໍເຊີນຊວນອົງການຈັດຕັ້ງທຸກພາກສ່ວນ, ພໍ່ແມ່ປະຊາຊົນ, ພະນັກງານ, ທະຫານ-ຕໍາຫຼວດ ເຂົ້າມາເສຍຄ່າທໍານຽມທາງໃຫ້ທ່ວງທັນນຕາມກໍານົດເວລາ. ພິເສດຫາກບຸກຄົນ, ນິຕິບຸກຄົນ ແລະການຈັດຕັ້ງ ທີ່ເປັນເຈົ້າຂອງ ຫຼື ນໍາໃຊ້ພາຫະນະ ທີ່ບໍ່ທັນເສຍຄ່າທໍານຽມທາງໃນປີ 2023 ຫຼືຫຼາຍປີຜ່ານມາແມ່ນໃຫ້ຮີບຮ້ອນມາເສຍບໍ່ໃຫ້ກາຍວັນທີ 31 ພຶດສະພາ 2024 ແລະ ຈະໄດ້ຮັບການຍົກເວັ້ນການປັບໃໝຄ່າທໍານຽມທາງໃນໄລຍະຜ່ານມາ.
---
ຂ່າວ: ສັນຍາ

แชร์