ສະແດງດົນຕີພື້ນເມືອງຈີນຈາກອູ່ຊີ ສະຫຼອງບຸນກຸດຈີນປີມະໂລງ

ສູນວັດທະນະທຳຈີນປະຈຳລາວ ຮ່ວມກັບສູນການຄ້າວຽງຈັນເຊັນເຕີ້ ຈັດງານດົນຕີສະເຫຼີມສະຫຼອງບຸນກຸດຈີນ ປີມະໂລງ ທີ່ປະເທດລາວ ປະຈຳປີ 2024 ພາຍໃຕ້ຫົວຂໍ້ “ອາລໍາພະບົດແຫ່ງລະດູບານໃໝ່ຂຶ້ນສູນການຄ້າວຽງຈັນເຊັນເຕີ້ ນະຄອນຫຼວງວຽງຈັນ ໃນວັນທີ 30 ມັງກອນຜ່ານມາ ໂດຍໃຫ້ກຽດເຂົ້າຮ່ວມມີ ທ່ານນາງ ຫຼີຢີ່ຜິງ ຫົວໜ້າສູນວັດທະນະທໍາຈີນ ປະຈໍາ ສປປ ລາວ, ທ່ານ ຫວັງເຫວິຍຄຸນ ຜູ້ອຳນວຍການສູນການຄ້າວຽງຈັນເຊັນເຕີ ພ້ອມດ້ວຍນ້ອງນັກຮຽນ, ນັກສຶກສາ ແລະຄູອາຈານຈາກໂຮງຮຽນມັດທະຍົມສົມບູນເພຍວັດ, ສະຖາບັນຣັຕນະບໍລິຫານທຸລະກິດ ແລະສື່ມວນຊົນເຂົ້າຮ່ວມເປັນຈຳນວນຫຼວງຫຼາຍ.

ງານຄັ້ງນີ້ໄດ້ມີການສະແດງດົນຕີນພື້ນເມືອງຈາກ ສປ ຈີນ ເຊິ່ງເປັນວົງດົນຕີອໍເກັດຕ້າພື້ນເມືອງຈາກອູ່ຊີ ທີ່ສ້າງຕັ້ງຂຶ້ນໃນປີ 2020. ວົງດົນຕີອໍເກັດຕ້າຕັ້ງຢູ່ສະຖານທີ່ກໍາເນີດ "ວັດທະນະທຳອູ" ທີ່ມີປະຫວັດສາດຍາວນານມາຫຼາຍກວ່າ 3.000 ປີ, ເມືອງອູ່ຊີເປັນເມືອງທີ່ມີຊື່ສຽງຢູ່ພາກໃຕ້ຂອງແມ່ນໍ້າຢາງຊີຂອງຈີນ ເປັນທີ່ຮູ້ຈັກກັນໃນນາມ "ບ້ານເກີດຂອງດົນຕີພື້ນເມືອງຈີນ" ເປັນແຫຼ່ງຮວບຮວມວັດທະນະທໍາທາງດົນຕີທີ່ເລິກເຊິ່ງ ແລະເຕັມໄປດ້ວຍນັກດົນຕີຜູ້ທີ່ມີພອນສະຫວັນ.

ສູນວັດທະນະທຳຈີນໄດ້ເຊື້ອເຊີນ ວົງດົນຕີອໍເກັດຕ້າພື້ນເມືອງອູ່ຊີ ມາຢ້ຽມຢາມປະເທດລາວເພື່ອນຳສະເໜີທ່ວງທຳນອງທີ່ໜ້າອອນຊອນແຫ່ງມົນສະເໜ່ຂອງດົນຕີຈີນ ໜຶ່ງໃນນັ້ນ ແມ່ນໄດ້ມີບົດເພງທີ່ຖືກຍົກຍ້ອງໃຫ້ເປັນມໍລະດົກວັດທະນະທຳນາມມະທຳໂລກ ເພື່ອເປັນການສະເຫຼີມສະຫຼອງບຸນກຸດຈີນປີມະໂລງ ປະຈຳປີ 2024 ທີ່ປະເທດລາວ. ນອກຈາກການບັນເລງສຽງເພງຄາສສິກຂອງຈີນແລ້ວຍັງໄດ້ບັນເລງບົດເພງລາວອຳມະຕະ ດ້ວຍເຄື່ອງດົນຕີຈີນເຊັ່ນ: ບົດເພງ ແດນແຫ່ງອິດສະຫຼະ ແລະການຮ້ອງເພງຮ່ວມກັບຄະນະວົງດົນຕີ ໃນບົດເພງຈຳປາເມືອງລາວ.

แชร์