ນາຍົກ ຊີ້ນໍາອົງການກາແດງຂົນຂວາຍການບໍລິຈາກເລືອດໃຫ້ເພີ່ມຂຶ້ນ

ໃນໂອກາດເຂົ້າຮ່ວມກອງປະຊຸມ ວຽກງານກາແດງລາວປີ 2023 ແລະທິດທາງແຜນ ການປະຈຳປີ 2024 ໃນວັນທີ 31 ມັງກອນ 2024 ນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ເນັ້ນໃຫ້ອົງການກາແດງປຸກລະດົມຂົນຂວາຍການບໍລິຈາກເລືອດເຊິ່ງມີອັດຕາຕົວຊີ້ບອກເພີ່ມຂຶ້ນແຕ່ລະປີຈຳນວນຫ້າພັນຖົງ (5.000 ຖົງ) ທີ່ສະພາແຫ່ງຊາດໄດ້ຮັບຮອງແລ້ວນັ້ນ, ຕ້ອງໄດ້ເພີ່ມທະວີການປຸກລະດົມຂົນຂວາຍການບໍລິຈາກເລືອດແບບສະໝັກໃຈບໍ່ຫວັງສິ່ງຕອບແທນແມ່ນສິ່ງຈໍາເປັນ, ເປັນວຽກທີ່ສໍາຄັນ ແລະຂາດບໍ່ໄດ້ຢູ່ໃນສັງຄົມ,ການໃຫ້ເລືອດກໍຄືການໃຫ້ຊີວິດຕໍ່ລົມຫາຍໃຈໃຫ້ແກ່ຄົນເຈັບທີ່ຕ້ອງການເລືອດ,ຖ້າບໍ່ມີເລືອດພຽງພໍກໍບໍ່ສາມາດຊ່ວຍເຫລືອກອບກູ້ຊີວິດຂອງຄົນເຈັບ. ສະນັ້ນ, ທຸກຂະແໜງການ ທຸກການຈັດຕັ້ງ, ບຸກຄົນ, ນິຕິບຸກຄົນ, ທຸກຊັ້ນຄົນໃນທົ່ວສັງຄົມ ຈະຕ້ອງໄດ້ເປັນເຈົ້າການຮ່ວມກັນ ໂຄສະນາປຸກລະດົມຂົນຂວາຍ ໃຫ້ມີຜູ້ບໍລິຈາກເລືອດແບບສະໝັກໃຈບໍ່ຫວັງສິ່ງຕອບແທນໃຫ້ນັບມື້ນັບຫລາຍຂຶ້ນ, ປູກຈິດສໍານຶກໃຫ້ເຍົາວະຊົນຊາວໜຸ່ມໃຫ້ຮັບຮູ້ເຂົ້າໃຈ ແລະເຫັນໄດ້ເຖິງຄວາມສໍາຄັນຂອງການບໍລິຈາກເລືອດແບບສະໝັກໃຈ ແລະຕ້ອງມີນະໂຍບາຍຕໍ່ຜູ້ມີຜົນງານໃນການປຸກລະດົມຂົນຂວາຍເກັ່ງ, ຕໍ່ຜູ້ມາບໍລິຈາກເລືອດຫລາຍຄັ້ງບໍ່ຫວັງສິ່ງຕອບແທນດ້ວຍຮູບການຕ່າງໆຢ່າງເໝາະສົມ.

ພ້ອມນີ້, ອົງການກາແດງ ຕ້ອງໄດ້ບໍາລຸງສ້າງພະນັກງານໃຫ້ມີຄວາມຮູ້, ຄວາມສາມາດ, ມີທັກສະໃນການຄຸ້ມຄອງບໍລິຫານແຜນງານໂຄງການຕ່າງໆ, ການຫລຸດຜ່ອນຄວາມສ່ຽງໄພພິບັດ, ການກູ້ໄພສຸກເສີນ, ການປະຖົມພະຍາບານ ແລະ ວຽກງານອື່ນໆທີ່ຕິດພັນກັບ 9 ວຽກງານຫລັກ ຂອງອົງການກາແດງແຫ່ງຊາດລາວ; ຕ້ອງໄດ້ສ້າງອາສາສະໝັກກາແດງ, ສະມາຊິກກາແດງໃຫ້ໄດ້ຫລາຍ ຈາກສາຍວິຊາອາຊີບຕ່າງໆ ແລະ ອາສາສະໝັກຊາວໜຸ່ມ ໂດຍສະເພາະຢູ່ທ້ອງຖິ່ນ, ຊຸມຊົນຕ່າງໆ, ຝຶກອົບຮົມໃຫ້ເຂົາເຈົ້າມີຈິດໃຈເມດຕາທຳ, ມີຈິດໃຈມະນຸດສະທໍາອັນສູງສົ່ງ, ມີຄຸນສົມບັດສິນທໍາ, ມີຈັນຍາທໍາ ແລະ ມີຄວາມຮັບຜິດຊອບສູງ, ມີຄວາມປອດໃສຂາວສະອາດທັງມີຄວາມເສຍສະຫລະ, ມີຄວາມຕື່ນຕົວສະໝັກໃຈ ເຂົ້າຮ່ວມເປັນກຳລັງແຮງໃນຂະບວນການເຄື່ອນໄຫວວຽກງານມະນຸດສະທຳ ຂອງອົງ ການກາແດງແຫ່ງຊາດລາວໃນເວລາມີຄວາມຕ້ອງການ; ເອົາໃຈໃສ່ປະສານງານກັບພາກສ່ວນທີ່ກ່ຽວຂ້ອງເພື່ອໃຫ້ອົງການຂອງພວກເຮົາມີຄວາມເຂັ້ມແຂງ, ປັບປຸງການຈັດຕັ້ງ, ໂຄງປະກອບການຈັດຕັ້ງ ຕາມດຳລັດເລກທີ 22/ນຍ, ລົງວັນທີ 28 ມັງກອນ 2022 ໃຫ້ສຳເລັດ ທັງສູນກາງ ແລະ ທ້ອງຖິ່ນ, ບັນຈຸສັບຊ້ອນພະນັກງານ ຕາມຕຳແໜ່ງງານ ທີ່ກະຊວງພາຍໃນ ໄດ້ຮັບຮອງ ໃຫ້ເປັນລະບົບຄົບຊຸດ, ໃຫ້ມີຄວາມເຂັ້ມແຂງ ເພື່ອຮອງຮັບພາລະໜ້າທີ່, ປະຕິບັດໜ້າທີ່ການເມືອງຂອງຕົນໃຫ້ມີປະສິດທິຜົນສູງຂຶ້ນກວ່າເກົ່າ; ກົນໄກການປະສານງານພາຍໃນອົງການທັງສູນກາງ ແລະທ້ອງຖິ່ນໃຫ້ມີຄວາມເຂັ້ມແຂງ, ເປັນລະບົບເຊື່ອມຈອດກັນ, ມີຄວາມຄ່ອງຕົວ ແລະ ວ່ອງໄວ; ການປະສານງານກັບອົງການປະສານສົມທົບເປັນຕົ້ນຂະແໜງການຂອງລັດ, ອົງການປົກຄອງແຕ່ລະຂັ້ນ, ການຈັດຕັ້ງສັງຄົມ, ພາກສ່ວນກ່ຽວຂ້ອງ, ຜູ້ຊົງຄຸນວຸດທິ ໃຫ້ໂລ່ງລ່ຽນ ຮັດແໜ້ນຄວາມສາມັກຄີເພື່ອເພີ່ມທະວີການມີສ່ວນຮ່ວມຂອງສັງຄົມໃຫ້ກວ້າງຂວາງ; ຕ້ອງເພີ່ມທະວີການເຜີຍແຜ່ກົດໝາຍ, ດໍາລັດ, ພາລະບົດບາດ, ໜ້າທີ່ ຂອງອົງການກາແດງແຫ່ງຊາດລາວ ໃຫ້ເປັນທີ່ຮັບຮູ້ເຂົ້າໃຈຢ່າງເລິກເຊິ່ງ ແລະ ກວ້າງຂວາງທົ່ວສັງຄົມ ເພື່ອຍົກບົດບາດຂອງອົງການກາແດງແຫ່ງຊາດລາວໃຫ້ສູງຂຶ້ນ ໂດຍສະເພາະແມ່ນ ດຳລັດວ່າດ້ວຍກອງທຶນສຸກເສີນ ແລະ ດຳລັດວ່າດ້ວຍກອງທຶນເລືອດ ເຊິ່ງຫາກໍໄດ້ຮັບຮອງຈາກລັດຖະບານໃນເດືອນ ສິງ ຫາ ປີ 2023 ຜ່ານມານີ້.

ຂະນະດຽວກັນ, ບັນດາຂະແໜງການຂອງລັດ, ແນວລາວສ້າງຊາດ, ອົງການຈັດຕັ້ງມະຫາຊົນ, ອົງການປົກຄອງທ້ອງຖິ່ນ, ການຈັດຕັ້ງສັງຄົມ ແລະພາກສ່ວນກ່ຽວຂ້ອງ ເຊິ່ງແມ່ນອົງການປະສານສົມທົບກັບວຽກງານກາແດງລາວ ກໍຕ້ອງໄດ້ເຮັດໜ້າທີ່ຕາມພາລະບົດບາດຂອງຕົນ ທີ່ໄດ້ກໍານົດໄວ້ໃນກົດໝາຍວ່າດ້ວຍວຽກງານກາແດງລາວແນໃສ່ສົ່ງເສີມ, ໃຫ້ຄໍາປຶກສາ, ປະສານສົມທົບ, ແລກປ່ຽນຂໍ້ມູນຂ່າວສານ,ເຕັກນິກວິຊາການ,ສະໜັບສະໜູນ, ອໍານວຍຄວາມສະດວກ, ຊ່ວຍໂຄສະນາ, ປຸກລະດົມຂົນຂວາຍທຸກຊັ້ນຄົນໃນສັງຄົມເຂົ້າຮ່ວມ ແລະປະກອບສ່ວນເຂົ້າໃນຂະບວນການເຄື່ອນໄຫວວຽກງານກາແດງລາວ; ສະເພາະງົບປະມານຮັບໃຊ້ວຽກງານເລືອດຕ້ອງໄດ້ສຸມໃສ່ຈັດຕັ້ງປະຕິບັດດຳລັດວ່າດ້ວຍກອງທຶນເລືອດໃຫ້ເປັນຮູບປະທຳ ທັງສູນກາງ ແລະ ທ້ອງຖິ່ນ. ລັດຖະບານກໍຈະໄດ້ພິຈາລະນາຊອກແຫລ່ງທຶນ ເພື່ອສະໜອງໃຫ້ແກ່ການຈັດຫາອຸປະກອນທີ່ຈຳເປັນເປັນຕົ້ນຖົງໃສ່ເລືອດ ນໍ້າຢາກວດວິເຄາະພະຍາດຢູ່ໃນເລືອດ ເພື່ອໃຫ້ມີເລືອດພຽງພໍ ແລະປອດໄພບໍລິການໃຫ້ແກ່ສັງຄົມ, ໃນປີ 2023 ຜ່ານມາ, ລັດຖະບານກໍໄດ້ເພີ່ມງົບປະມານຈາກລາຍຮັບເກີນແຜນໃຫ້ແກ່ວຽກງານເລືອດຕື່ມອີກ 25 ຕື້ກີບ.

ພ້ອມກັນນີ້,ວຽກງານພົວພັນຮ່ວມມືກັບຄູ່ຮ່ວມງານພາຍໃນ ແລະພາຍນອກ,ອົງການຈັດຕັ້ງສາກົນ,ກາແດງເພື່ອນມິດ,ຄະນະກໍາມະການກາແດງສາກົນ, ສະຫະພັນກາແດງ ແລະຊີກວົງເດືອນແດງສາກົນຖືວ່າເປັນວຽກໜຶ່ງທີ່ສຳຄັນເຊິ່ງຕ້ອງໄດ້ເສີມຂະຫຍາຍໃຫ້ກວ້າງຂວາງໜັກແໜ້ນຂຶ້ນຕື່ມບົນພື້ນຖານແນວທາງການຕ່າງປະເທດຂອງພັກຂອງລັດຖະບານ. ໃນປີ 2025 ຈະມານີ້, ລັດຖະບານໄດ້ເຫັນດີອະນຸມັດໃຫ້ ອົງການກາແດງແຫ່ງຊາດລາວເປັນເຈົ້າພາບຈັດກອງປະຊຸມຜູ້ນຳກາແດງ ແລະຊີກວົງເດືອນແດງຂອງກຸ່ມປະເທດອາຊີຕາເວັນອອກສ່ຽງໃຕ້ຕາມລຳດັບການໝູນວຽນຂອງຕົວອັກສອນພາສາອັງກິດຂອງຊື່ປະເທດ ແລະກໍແມ່ນປີຄົບຮອບ 70 ປີ ວັນສ້າງຕັ້ງອົງການກາແດງແຫ່ງຊາດລາວ. ສະນັ້ນ, ຕ້ອງໄດ້ມີການຫ້າງຫາກະກຽມໃຫ້ດີແຕ່ດຽວນີ້ເປັນຕົ້ນການສ້າງຂະບວນການໂຄສະນາ,ການຂົນຂວາຍແຫລ່ງທຶນ, ຂົນຂວາຍສະມາຊິກ ອາສາສະໝັກໃຫ້ຫລາຍຂຶ້ນ ແລະວຽກງານອື່ນ ທີ່ຕິດພັນກັບ 2 ເຫດການສຳຄັນນີ້, ເຊື້ອເຊີນເອົາຜູ້ຊົງຄຸນວຸທິທີ່ສະໝັກໃຈເຮັດວຽກເພື່ອສັງຄົມມາຮ່ວມເຄື່ອນໄຫວວຽກງານນຳຈຶ່ງຈະຊ່ວຍໃຫ້ພວກເຮົາມີຜົນສຳເລັດຢ່າງຈົບງາມ.
ທີ່ມາ: ຂປລ

แชร์