ສາລະວັນ ລະດົມແນວຄວາມຄິດກຽມທົດລອງຈັດງານຕະຫຼາດກາງຄືນ

ແຫລ່ງຂ່າວຈາກ ແຂວງສາລະວັນ ໃຫ້ຮູ້ວ່າ: ວັນທີ 30 ມັງກອນ 2024, ອົງ ການປົກຄອງແຂວງສາລະວັນ ຄົ້ນຄວ້າ ແລະລະດົມແນວຄວາມຄິດເພື່ອລິເລີ່ມເຮັດທົດລອງຈັດງານຕະຫລາດກາງຄືນ ເພື່ອເຮັດໃຫ້ປະຊາ ຊົນ ແຂວງສາລະວັນ ກໍຄື ນັກທ່ອງທ່ຽວມີສະຖານທີ່ທ່ຽວຊົມ, ພັກຜ່ອນແລະເປັນສະຖານທີ່ແລກປ່ຽນຊື້ຂາຍສິນຄ້າ,ທ່ອງທ່ຽວໃນເວລາກາງຄືນ,ທັງເປັນກິດຈະກຳທີ່ຈະສົ່ງເສີມດ້ານການຄ້າ,ການທ່ອງທ່ຽວ,ສົ່ງເສີມຜະລິດຕະພັນພາຍໃນ, ສິນຄ້າໜຶ່ງເມືອງໜຶ່ງຜະລິດຕະພັນຂອງຊາດຂອງແຂວງ, ທັງເປັນສະຖານທີ່ຮອງຮັບໃຫ້ແກ່ກະກຽມຄວາມພ້ອມເປີດປີທ່ອງທ່ຽວລາວ 2024 ຢູ່ແຂວງສາລະວັນ ແລະ ຕ້ອນຮັບງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII.

ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ, ຜູ້ຊີ້ນຳວຽກງານວັດທະນະທຳ-ສັງຄົມ ໄດ້ກ່າວວ່າ: ການລິເລີ່ມແນວຄວາມຄິດຈັດງານຕະຫລາດກາງຄືນກໍເພື່ອຊຸກຍູ້ສົ່ງເສີມວຽກງານຫລາຍດ້ານເປັນຕົ້ນ ກະຕຸກຊຸກຍູ້ເສດຖະກິດພາຍໃນ, ການທ່ອງທ່ຽວ, ສົ່ງເສີມດ້ານການຄ້າ, ອະນຸລັກສົ່ງເສີມວັດທະນະທໍາ ໂດຍສະເພາະຕິດພັນກັບກິດຈະກໍາທາງສາດສະໜາ,ການສະແດງທີ່ສ່ອງແສງໃຫ້ເຫັນເຖິງວິຖີຊີວິດ,ຮີດຄອງປະເພນີອັນດີງາມ,ເພື່ອຍົກສູງຄຸນຄ່າດ້ານວັດທະນະທໍາ, ເພື່ອສ້າງມົນສະເໜ່ໃຫ້ກັບການທ່ອງທ່ຽວທີ່ຈະເປັນໃບໜ້າອັນໃໝ່ ແລະບາດກ້າວໃໝ່ແນໃສ່ດຶງດູດນັກທ່ອງທ່ຽວໃຫ້ນັບມື້ຫລາຍຂຶ້ນ. ພ້ອມນີ້, ທ່ານຍັງໄດ້ຮຽກຮ້ອງໃຫ້ຜູ້ເຂົ້າຮ່ວມເອົາໃຈໃສ່ຄົ້ນຄວ້າ, ປະກອບຄຳຄິດເຫັນຢ່າງເລິກເຊິ່ງ, ມີເນື້ອໃນ ແລະສາມາດນໍາໄປຈັດຕັ້ງປະຕິບັດໃຫ້ເກີດເປັນຮູບປະທຳໃນໄວໆນີ້.

ໂອກາດນີ້, ຜູ້ເຂົ້າຮ່ວມກໍໄດ້ຮັບຟັງບົດລາຍງານນຳສະເໜີເຈດຈຳນົງ, ພາບຈຳລອງໃນເບື້ອງຕົ້ນການຈັດງານຕະຫລາດກາງຄືນໂດຍສະເພາະໄດ້ຈໍາລອງການຈັດສັນຂອບເຂດ, ພື້ນທີ່, ກໍານົດຈຸດທີ່ຕັ້ງແມ່ນເລັງເອົາເສັ້ນທາງເຂົ້າໄປຫາຫໍໄຕຣປີດົກ ວັດສີມຸງຄຸນ, ການຈັດໂຊນຂາຍສິນຄ້າແຕ່ລະປະເພດເຊັ່ນ: ອາຫານ, ເຄື່ອງດື່ມ, ເສື້ອຜ້າ, ຈຸດຈັດກິດຈະກໍາທາງສາສະໜາ, ທາງສັງຄົມ, ການຈັດສັນລະບົບນໍ້າ-ໄຟຟ້າ, ການເກັບມ້ຽນຂີ້ເຫຍື້ອ, ຫ້ອງນໍ້າ ແລະການກຳນົດວັນເວລາໃນການເປີດ-ປິດ, ທັງການແຕ່ງຕັ້ງຄະນະຮັບຜິດຊອບ. ຈາກນັ້ນ, ກໍໄດ້ມີການປະກອບຄຳຄິດເຫັນຈາກຫລາຍພາກສ່ວນຕໍ່ກັບວຽກງານດັ່ງກ່າວ, ແລກປ່ຽນແນວຄວາມຄິດ ແລະ ເຫັນໄດ້ຄວາມໝາຍຄວາມສຳຄັນທີ່ຈະເປັນໃບໜ້າໃໝ່ຂອງແຂວງສາລະວັນ.

ຂ່າວ-ພາບ: ວິໄລວອນ ສິດທິໄຊ

แชร์