ອົງການກາແດງລາວ ສຸມໃສ່ຊ່ວຍປະຊາຊົນທຸກຍາກ ແລະປະສົບໄພ

ໃນ 1 ປີຜ່ານມາ ອົງການກາແດງແຫ່ງຊາດລາວໄດ້ສຸມໃສ່ຈັດຕັ້ງປະຕິບັດຊ່ວຍປະຊາຊົນຜູ້ທຸກຍາກຂາດເຂີນ, ຜູ້ປ່ຽວພອຍດ້ອຍໂອກາດ ແລະຜູ້ປະສົບໄພເຊັ່ນ: ນໍ້າຖ້ວມ, ແຫ້ງແລ້ງ, ໄພໜາວ, ໄພໄໝ້, ລົມພາຍຸ, ການແຜ່ລະບາດພະຍາດ ແລະອື່ນໆ.

ທ່ານ ຮອງຈັນ ຈັນທະວົງ ຮອງຫົວໜ້າຫ້ອງການກາແດງ ແຫ່ງຊາດລາວ ໄດ້ລາຍງານຕໍ່ກອງປະຊຸມສະຫຼຸບວຽກງານກາແດງ ປະຈຳປີ 2023 ແລະວາງທິດທາງແຜນການປີ 2024 ທີ່ຂຶ້ນໃນວັນທີ 31 ມັງກອນ ຢູ່ນະຄອນຫຼວງວຽງຈັນ ວ່າ: ການຈັດຕັ້ງປະຕິບັດວຽກງານກາແດງໃນ 1 ປີຜ່ານມາ ໄດ້ປະສົບຜົນສຳຫຼາຍດ້ານເຊັ່ນ: ໄດ້ເອົາໃຈໃສ່ຊ່ວຍເຫຼືອປະຊາຊົນຜູ້ປະສົບໄພນໍ້າຖ້ວມໃນການນຳໃຊ້ ເງິນສົດ ມີ 2 ແຂວງ ມີ 44 ບ້ານ 3 ເມືອງ, 4,125 ຄອບຄົວ, ຈຳນວນພົນ 20.930 ຄົນ, ເປັນມູນຄ່າ: 9,38 ຕື້ກີບ, ໄດ້ຊ່ວຍເຫຼືອເຂົ້າສານ ຈຳນວນ 948 ກວ່າໂຕນ, ໃຫ້ແກ່ປະຊາຊົນທີ່ຂາດເຂີນໃນ 4 ແຂວງ 221 ບ້ານ, 16 ເມືອງ, 17.516 ຄອບຄົວ 109.778 ຄົນ, ຊ່ວຍເຫຼືອເຕົາໄຟປະຢັດ ຈຳນວນ 29.782 ໝ່ວຍ ແລະ ເຄື່ອງກັນຕອງນໍ້າ ຈຳນວນ 6.765 ໝ່ວຍ, ແກ່ປະຊາຊົນ 5 ແຂວງ 288 ບ້ານ 11 ເມືອງ, 30.116 ຄອບຄົວ, 30.116 ຄົນ ລວມມູນຄ່າ 541.400 ໂດລາ ແລະ ຊ່ວຍເຫຼືອຜ້າຫົ່ມປະຊາຊົນຕ້ານໄພໝາວ ແຂວງ 4 ແຂວງ ຈຳນວນ 4.000 ຜືນ ລວມມູນຄ່າ 138.171 ໂດລາ. ນອກຈາກນັ້ນ, ບັນດາກາແດງແຂວງຍັງໄດ້ເອົາໃຈໃສ່, ລະດົມທຶນເຂົ້າໃນການຊ່ວຍເຫຼືອຜູ້ທຸກຍາກ, ປ່ຽວພອຍ ດ້ອຍໂອກາດ, ໄພໝາວ, ໄຟໄໝ້ ແລະ ລົມພາຍຸ ໃນ 17 ແຂວງ ແລະ 1 ນະຄອນຫຼວງວຽງຈັນ ທີ່ໄດ້ໃຫ້ການຊ່ວຍເຫຼືອທັງໝົດ 180 ຄັ້ງ, 313 ບ້ານ, 4.234 ຄອບຄົວ, 23.291ຄົນ ຍິງ 10.582 ຄົນ ລວມມູນຄ່າ 3,21 ຕື້ກີບ.

ສ່ວນວຽກງານການປຸກລະດົມຂົນຂວາຍບໍລິຈາກເລືອດ ແລະການສະໜອງເລືອດທີ່ປອດໄພ ມີຜູ້ບໍລິຈາກເລືອດທັງໝົດ 73.023 ຖົງ, ໃນນີ້ຢູ່ສູນກາງໄດ້ 36.115 ຖົງ ແລະ ທ້ອງຖິ່ນໄດ້ 36.908 ຖົງ,ຄາດໝາຍສູ້ຊົນປະຈຳປີ 2023 ໃຫ້ໄດ້ 73.000 ຖົງ, ແຕ່ປະຕິບັດລື່ນຄາດໝາຍ ໄດ້ 73.023 ຖົງ, ທົ່ວປະເທດສາມາດບັນລຸໄດ້ 100%, ກວດວິເຄາະເລືອດ ເຖິງຄວາມປອດໄພ ແລະ ແຈກຈ່າຍເລືອດໃຫ້ຄົນເຈັບທັງໝົດ 78.446 ຖົງ, ມີຄົນເຈັບໄດ້ຮັບການຊ່ວຍເຫຼືອຈາກການໃສ່ເລືອດເປັນຈໍານວນ 57.419 ຄົນ,ຝຶກອົບຮົມປະຖົມພະຍາບານໃຫ້ອາສາສະໝັກ, ພະນັກງານກາແດງ, ນັກສຶກສາໄດ້ທັງໝົດ 2.980 ຄົນ ແລະບໍລິການປະຖົມພະຍາບານ ຮັບໃຊ້ໃນວັນສຳຄັນຂອງຊາດ ໄດ້ທັງໝົດ 4.014 ຄົນ, ໄດ້ເອົາໃຈໃສ່ຊ່ວຍເຫຼືອຜູ້ປະສົບອຸບັດເຫດ 2.392 ຄັ້ງ, ຊ່ວຍຄົນເຈັບ 2.954 ຄົນ ແລະ ນຳສົ່ງຄົນເຈັບ ໄປໂຮງໝໍ 1.835 ຄັ້ງ ແລະ ມີໜ່ວຍກູ້ໄພທັງໝົດ 9 ໜ່ວຍ, ຢູ່ສູນກາງ 1 ໜ່ວຍ ແລະຢູ່ແຂວງມີ 8 ໜ່ວຍ. ນອກຈາກນັ້ນ, ຍັງໄດ້ເອົາໃຈໃສ່ພົວພັນຮ່ວມມືສາກົນເພື່ອຍາດແຍ່ງເອົາທຶນມາພັດທະນາວຽກງານກາແດງເຊັ່ນ: ໄດ້ເຊັນສັນຍາ ລະຫວ່າງ ສະຫະພັນກາແດງ ແລະຊີກວົງເດືອນແດງສາກົນ ແລະລັດຖະບານ ສປປ ລາວ ວ່າດ້ວຍເພື່ອສ້າງຕັ້ງຫ້ອງການຜູ້ຕາງໜ້າ ຢູ່ ສປປ ລາວ.

แชร์