ແນວຄວາມຄິດ “ຫຼຸດຜ່ອນຄວາມທຸກຍາກຢ່າງຖືກກັບເປົ້າໝາຍ” ໄດ້ແຕກດອກອອກຜົນຢູ່ປະເທດລາວຢ່າງໄພສານ

ປີ 2023 ທີ່ຫາກໍຜ່ານໄປນັ້ນແມ່ນປີທີ່ທ່ານສີຈິ້ນຜິງປະທານປະເທດຈີນສະເໜີແນວຄວາມຄິດ“ຫຼຸດຜ່ອນຄວາມທຸກຍາກຢ່າງຖືກກັບເປົ້າໝາຍ”ຄົບຮອບ 10 ປີ.ໃນ 10 ປີຜ່ານມາ, ປະຊາຊົນຜູ້ທຸກຍາກຂອງຈີນເກືອບ 100 ລ້ານຄົນໄດ້ຫຼຸດພົ້ນອອກຈາກຄວາມທຸກຍາກ, ເຊິ່ງໄດ້ສະເໜີແບບແຜນຂອງຈີນໃຫ້ແກ່ພາລະກິດຫຼຸດຜ່ອນຄວາມທຸກຍາກຂອງໂລກ. ນອກນີ້, ຈີນຍັງໄດ້ຕັ້ງໜ້າເຂົ້າຮ່ວມການຮ່ວມມືສາກົນດ້ານການຫຼຸດຜ່ອນຄວາມທຸກຍາກ, ແນວຄວາມຄິດ “ຫຼຸດຜ່ອນຄວາມທຸກຍາກຢ່າງຖືກກັບເປົ້າໝາຍ”ໄດ້ແຕກໜໍ່ຈໍ່ແໜງແລະແຕກດອກອອກຜົນຢູ່ຫຼາຍປະເທດ. ສຳລັບປະເທດລາວແລ້ວ, ແນວຄວາມຄິດ “ຫຼຸດຜ່ອນຄວາມທຸກຍາກຢ່າງຖືກກັບເປົ້າໝາຍ”ເປັນບົດຮຽນອັນລໍ້າຄ່າ.

ຫວ່າງກ່ອນນີ້ບໍ່ດົນ, ຜູ້ຕາງໜ້າພາກສ່ວນລັດທີ່ກ່ຽວຂ້ອງຂອງລາວໄດ້ເຂົ້າຮ່ວມກອງປະຊຸມເວທີເປິກສາຫາລືການຫຼຸດຜ່ອນຄວາມທຸກຍາກແລະການພັດທະນາ “ສິບແປດຖໍ້າ” ທີ່ຈັດຂຶ້ນຢູ່ກິ່ງແຂວງປົກຄອງຕົນເອງເຜົ່າຖູເຈ່ຍເຜົ່າມົ້ງຊ່ຽງຊີ່ແຂວງຫູໜານຈີນ. ໃນກອງປະຊຸມ, ທ່ານນາງ ທອງໃບ ສີສົມພອນ ຮອງຫົວໜ້າຫ້ອງການກະສິກຳປ່າໄມ້ນະຄອນຫຼວງພະບາງແຂວງຫຼວງພະບາງລາວໄດ້ຕາງໜ້າຝ່າຍລາວ ລົງນາມໃນບົດບັນທຶກເຈດຈຳນົງວ່າດ້ວຍການແຮກສ່ຽວລະຫວ່າງບ້ານສິບແປດຖ້ຳ ເມືອງຮວ່າຢວນ ກິ່ງແຂວງຊ່ຽງຊີ່ແຂວງຫູໜານຈີນ ກັບບ້ານຖິ່ນຊົມນະຄອນຫຼວງພະບາງແຂວງຫຼວງພະບາງຂອງລາວ. ເທື່ອນີ້ແມ່ນນາງທອງໃບໄດ້ມາຢ້ຽມຢາມຈີນເປັນຄັ້ງທຳອິດ, ຫຼັງຈາກທີ່ໄດ້ສຳຜັດກັບຜົນງານການພັດທະນາຂອງຊົນນະບົດຈີນແລ້ວ, ທ່ານໄດ້ເວົ້າດ້ວຍຄວາມຕື່ນເຕັ້ນດີໃຈວ່າ: “ເຊື່ອວ່າບ້ານຖິ່ນຊົມຈະຄືກັນກັບບ້ານຊຽງລ້ອມ, ຄົ້ນຫາທາງອອກໄດ້ ແລະຫຼຸດພົ້ນອອກຈາກຄວາມທຸກຍາກໄດ້.”

ບ້ານຊຽງລ້ອມທີ່ທ່ານນາງທອງໃບ ສີສົມພອນ ເວົ້າເຖິງນັ້ນ, ກໍເປັນພຶດຕິກຳຕົວຈິງທີ່ສຳເລັດຜົນຂອງບົດຮຽນຫຼຸດຜ່ອນຄວາມທຸກຍາກຢູ່ປະເທດລາວ. ເດືອນກັນຍາປີ 2017, ໂຄງການຊ່ວຍເຫຼືອດ້ານເຕັກໂນໂລຊີແຫ່ງການຮ່ວມມືສາທິດການຫຼຸດຜ່ອນຄວາມທຸກຍາກຢູ່ອາຊີຕາເວັນອອກຂອງຈີນ (ພາກຢູ່ລາວ) ໄດ້ເລີ່ມຕົ້ນຢ່າງເປັນທາງການ, ໂດຍມີ 2 ບ້ານເປັນເປົ້າໝາຍໂຄງການດັ່ງກ່າວ, ບ້ານໜຶ່ງແມ່ນບ້ານຊໍ້ຢູ່ນະຄອນຫຼວງວຽງຈັນ, ອີກບ້ານໜຶ່ງແມ່ນບ້ານຊຽງລ້ອມແຂວງຫຼວງພະບາງ. ໂຄງການດັ່ງກ່າວໄດ້ນຳເອົາແນວຄວາມຄິດ “ຫຼຸດຜ່ອນຄວາມທຸກຍາກຢ່າງຖືກກັບເປົ້າໝາຍ”ເຂົ້າສູ່ປະເທດລາວ, ໂດຍໄດ້ໃຊ້ມາດຕະການຕ່າງໆ, ເຊັ່ນ: ປັບປຸງສິ່ງກໍ່ສ້າງພື້ນຖານໂຄງລ່າງຢູ່ເຂດຊຸມຊົນ, ສິ່ງກໍ່ສ້າງບໍລິການສາທາລະນະ, ປັບປຸງຊີວິດການເປັນຢູ່, ສະໜອງການສະໜັບສະໜູນດ້ານເຕັກໂນໂລຊີແລະອື່ນໆ, ເຮັດໃຫ້ບ້ານເຫຼົ່ານີ້ມີໂສມໜ້າອັນໃໝ່, ຊີວິດການເປັນຢູ່ຂອງຊາວບ້ານໄດ້ຮັບການປັບປຸງດີຂຶ້ນຢ່າງຫຼວງຫຼາຍ.

ປັດຈຸບັນໂຄງການຫຼຸດຜ່ອນຄວາມທຸກຍາກທີ່ຈີນຊ່ວຍເຫຼືອລາວນັ້ນໄດ້ຮັບປະສິດທິຜົນຢ່າງພົ້ນເດັ່ນ. ໂຄງການກໍ່ສ້າງເພື່ອຫຼຸດຜ່ອນຄວາມທຸກຍາກຢູ່ຊົນນະບົດຂອງລາວທີ່ປະຕິບັດໂດຍກຸ່ມບໍລິສັດລົງທຶນກໍ່ສ້າງຢຸນນານຈີນນັ້ນເປັນໜຶ່ງໃນ8 ໂຄງການໃຫຍ່ຊ່ວຍເຫຼືອລາວຂອງຈີນ, ເຊິ່ງລວມທັງການຊ່ວຍເຫຼືອສ້າງ 100 ໂຄງການສາທາລະນະສຸກຢູ່ຊົນນະບົດ, 100 ໂຄງການສະໜອງນໍ້າປະປາຢູ່ຊົນນະບົດ, 100 ໂຄງການໄຟເຍືອງທາງຢູ່ຊົນນະບົດ, ແລະ 100 ໂຄງການໂທລະພາບດີຈີຕອນຢູ່ຊົນນະບົດ. ເຊິ່ງໂຄງການໄລຍະໜຶ່ງໄດ້ຊ່ວຍເຫຼືອ 30 ບ້ານຢູ່ນະຄອນຫຼວງວຽງຈັນ ແລະ ແຂວງຫຼວງພະບາງເພື່ອປັບປຸງເງື່ອນໄຂການຜະລິດແລະດຳລົງຊີວິດ, ເຊັ່ນ: ການສຶກສາ, ສາທາລະນະສຸກ, ການສະໜອງນໍ້າປະປາ, ສະໜອງພະລັງໄຟຟ້າ, ໂທລະພາບດີຈີຕອນແລະອື່ນໆ. ສໍາລັບໂຄງການໄລຍະສອງຈະເລີ່ມດຳເນີນຢູ່ 40 ບ້ານຢູ່ແຂວງຜົ້ງສາລີ, ແຂວງຫຼວງນໍ້າທາ, ແຂວງອຸດົມໄຊແລະແຂວງຫົວພັນ.

ການຊ່ວຍເຫຼືອເຄື່ອງຂອງບໍ່ທໍ່ກັບການຊ່ວຍເຫຼືອໃນດ້ານວິທີທີ່ສ້າງຄວາມເຂັ້ມແຂງດ້ວຍຕົນເອງ, ວຽກງານຫຼຸດຜ່ອນຄວາມທຸກຍາກຂອງລາວບໍ່ຄວນອາໄສແຕ່ການຊ່ວຍເຫຼືອເທົ່ານັ້ນ. ການສ້າງລະບົບລະບຽບການຜ່ານຜ່າຄວາມຫຍຸ້ງຍາກໃນການລຶບລ້າງຄວາມທຸກຍາກທີ່ມີສີສັນພິເສດຂອງຈີນ, ເປັນບົດຮຽນສຳຄັນຂອງຈີນໃນການລຶບລ້າງຄວາມທຸກຍາກ. ໂດຍຖອດຖອນບົດຮຽນດ້ານການຫຼຸດຜ່ອນຄວາມທຸກຍາກຂອງຈີນ, ກະຊວງກະສິກຳປ່າໄມ້ລາວໄດ້ສ້າງຕັ້ງອົງການຫຼຸດຜ່ອນຄວາມທຸກຍາກ, ເພື່ອວາງແຜນດຳເນີນງານລະດັບຊາດ ປີ 2018, ໂດຍຜ່ານການວິເຄາະຢ່າງແມ່ນຢຳ, ລາວໄດ້ກຳນົດເອົາ 1.511 ບ້ານທຸກຍາກ, ເພື່ອດຳເນີນການຊ່ວຍເຫຼືອຢ່າງຖືກກັບເປົ້າໝາຍ, ໄດ້ດຳເນີນການທົດລອງຢູ່ແຂວງຫຼວງພະບາງແລະແຂວງວຽງຈັນ, ພ້ອມທັງໄດ້ສົ່ງໜ່ວຍງານຫຼຸດຜ່ອນຄວາມທຸກຍາກລົງຕິດຕາມແລະຊີ້ນຳວຽກງານຢ່າງໃກ້ຊິດ, ໃນບາດກ້າວຕໍ່ໄປລາວຍັງຈະເປີດກວ້າງບົດຮຽນດັ່ງກ່າວໃຫ້ກວ້າງອອກໄປ.

ປັດຈຸບັນນີ້, ປະເທດລາວພວມສຸມກຳລັງດຳເນີນວຽກງານຫຼຸດຜ່ອນຄວາມທຸກຍາກ, ສຸມຄວາມພະຍາຍາມເພື່ອໃຫ້ພົ້ນອອກຈາກສະພາບດ້ອຍພັດທະນາ, ສຳລັບບົດຮຽນຂອງຈີນໃນການລຶບລ້າງຄວາມທຸກຍາກແລະພັດທະນາຊົນນະບົດໃຫ້ຈະເລີນຮຸ່ງເຮືອງນັ້ນ, ເປັນບົດຮຽນອັນລ້ຳຄ່າສຳລັບປະເທດລາວ. ຈີນຈະສືບຕໍ່ໃຫ້ການຊ່ວຍເຫຼືອແກ່ພາລະກິດຫຼຸດຜ່ອນຄວາມທຸກຍາກຂອງລາວ, ເພີ່ມທະວີການແລກປ່ຽນບົດຮຽນ ແລະການຮ່ວມມືໃນຂົງເຂດຫຼຸດຜ່ອນຄວາມທຸກຍາກ ແລະພັດທະນາຊົນນະບົດໃຫ້ຈະເລີນຮຸ່ງເຮືອງ.

แชร์