ໄຊຍະ ພ້ອມຈັດງານມະຫາກໍາບຸນຊ້າງ ແລະປີທ່ອງທ່ຽວ 2024

ແຫລ່ງຂ່າວຈາກ ແຂວງໄຊຍະບູລີ ໃຫ້ຮູ້ວ່າ: ແຂວງໄຊຍະບູລີ ຈັດກອງປະຊຸມປຶກສາຫາລືກ່ຽວກັບການກະກຽມຈັດງານມະຫາກໍາບຸນຊ້າງ ແລະປີທ່ອງທ່ຽວລາວ ປະຈໍາປີ 2024 ໃນວັນທີ 29 ມັງກອນ 2024 ໂດຍມີທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີເຂົ້າຮ່ວມ.

ໃນກອງປະຊຸມ, ທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ, ປະທານຈັດມະຫາກໍາບຸນຊ້າງ ປະຈໍາປີ 2024ໄດ້ລາຍງານຄວາມຄືບໜ້າໃນການກະກຽມເປີດງານ, ເຊິ່ງມາຮອດປັດຈຸບັນ ແມ່ນໄດ້ແຕ່ງຕັ້ງຄະນະຮັບຜິດຊອບຊີ້ນຳ ລວມມີ 9 ອະນຸກຳມະການຄື: ດ້ານເສດຖະກິດ ແລະລະດົມທຶນ; ດ້ານສະຖານທີ່; ດ້ານຂະບວນຊ້າງ ແລະ ກ້ອນມວນຊົນບັນດາເຜົ່າ; ດ້ານພິທີກໍາທາງສາສະໜາ ແລະການຄົບງັນ; ດ້ານຮັບແຂກ ແລະພິທີການ; ດ້ານປ້ອງກັນ; ດ້ານສຸຂະພາບ ແລະເຫດການສຸກເສີນ; ດ້ານກອງເລຂາ; ດ້ານຍ້ອງຍໍ. ຜ່ານມາໄດ້ມີການປະຊຸມເພື່ອປຶກສາຫາລື ແລະລາຍງານການກະກຽມຂອງແຕ່ລະອະ ນຸກໍາມະການ.

ພ້ອມກັນນັ້ນ, ກໍໄດ້ອອກຂໍ້ຕົກລົງຂອງປະທານຈັດງານໃນການແບ່ງຄວາມຮັບຜິດຊອບໃຫ້ປະທານ, ຮອງປະທານເພື່ອເປັນການຕິດຕາມຊີ້ນຳຢ່າງໃກ້ຊິດໂດຍໄດ້ລົງເລິກຕິດຕາມວຽກງານທີ່ສໍາຄັນຄື: ວຽກງານປ້ອງກັນຄວາມສະຫງົບ; ວຽກງານຮັກສາສຸຂະພາບ ແລະເຫດສຸກເສີນ; ວຽກງານຂະບວນຊ້າງ; ວຽກງານເສດຖະກິດ ແລະ ລະດົມທຶນເຊິ່ງມາຮອດປັດຈຸບັນການກຽມຄວາມພ້ອມຂອງແຕ່ລະອະນຸກໍາມະການແມ່ນມີຄວາມພ້ອມຮອບດ້ານເປັນຕົ້ນການຝຶກຊ້ອມຂອງແຕ່ລະກ້ອນກໍາລັງ, ການຝຶກຊ້ອມຂອງຂະບວນການຊ້າງ, ໄດ້ປັບປຸງສະຖານທີ່ຈັດງານໃຫ້ມີຄວາມສວຍງາມ, ບົດກ່າວເປີດ-ກ່າວປິດງານ, ສະຖານທີ່ວາງສະແດງສິນຄ້າຂອງແຕ່ລະເມືອງ ແລະຊາວຄ້າຂາຍຈາກຕ່າງແຂວງ, ຕ່າງປະເທດ, ສະຖານທີ່ພັກເຊົາເຊັ່ນ: ໂຮງແຮມ, ເຮືອນພັກ, ໂຮມສະເຕ ແລະຮ້ານອາຫານ ເພື່ອຮອງຮັບໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດ.

แชร์