ເຊັນສັນຍາໂຄງການສຳປະທານຂຸດຄົ້ນ ແລະປຸງແຕ່ງແຮ່ບາຣິດ

ພິທີເຊັນສັນຍາໂຄງການສຳປະທານຂຸດຄົ້ນ ແລະປຸງແຕ່ງແຮ່ບາຣິດ ຢູ່ບ້ານພູເລັດ ເມືອງວຽງພູຄາ ແຂວງຫຼວງນໍ້າທາ ໄດ້ຈັດຂຶ້ນໃນ ວັນທີ 26 ມັງກອນ 2024 ທີ່ພະແນກແຜນການ ແລະ ການລົງທຶນແຂວງດັ່ງກ່າວໃຫ້ກຽດເຊັນບົດບັນທຶກລະຫວ່າງທ່ານ ວົງມະນີ ເພຶ່ອປະຊາ ຫົວໜ້າພະແນກແຜນການ ແລະການລົງທືນແຂວງກັບ ທ່ານ ນາງ ວຽງສະຫວັນ ຈິດທະວົງ ປະທານບໍລິສັດຈົ່ງລີລາວ ຈຳກັດ, ໂດຍມີທ່ານ ສີວິໄລ ປັນແກ້ວ ຮອງເຈົ້າແຂວງຫຼວງນ້ຳທາ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂິພິຍານ.

ທ່ານນາງ ສົມສີ ແກ້ວປະເສີດ ຫົວໜ້າຂະແໜງສົ່ງເສີມການລົງທຶນພະແນກແຜນການ ແລະການລົງທຶນແຂວງຫລວງນໍ້າທາໄດ້ຜ່ານເນື້ອໃນບົດສັນຍາກ່ຽວກັບໂຄງການສຳປະທານຂຸດຄົ້ນ ແລະ ປຸງແຕ່ງແຮ່ບາຣິດ ຂອງບໍລິສັດຈົ່ງລີລາວ ຈຳກັດ ອິງຕາມກົດໜາຍວ່າດວ້ຍການສົ່ງເສີມການລົງທຶນສະບັບເລກທີ 14/ສພຊ ລົງວັນທີ 17 ພະຈີກ 2016, ຂໍ້ຕົກລົງຂອງທ່ານເຈົ້າແຂວງໆຫຼວງນໍ້າທາສະບັບເລກທີ 978/ຈຂ ລົງວັນທີ 28 ທັນວາ 2023 ວ່າດ້ວຍການອະນຸມັດໃຫ້ບໍລິສັດ ຈົ່ງລີລາວ ຈຳກັດ ຂຸດຄົ້ນ ແລະປຸງແຕ່ງແຮ່ບາຣິດ ໂຄງການນີ້ຕັ້ງຢູ່ບ້ານພູເລັດ ເມືອງວຽງພູຄາ ແຂວງຫຼວງນໍ້າທາ ມີເນື້ອທີ່ທັງໝົດ 4 ເຮັດຕາ ເພື່ອຂຸດຄົ້ນ ແລະປຸງແຕ່ງແຮ່ບາຣິດທີ່ມີຄຸນນະພາບດີໄດ້ມາດຕະຖານ ເພື່ອຕອບສະໜອງພາຍໃນ ແລະ ສົ່ງອອກໄປຕ່າງປະເທດ ດ້ວຍທຶນຈົດທະບຽນຈຳນວນ 550.000 ໂດລາສະຫະລັດ, ມູນຄ່າການລົງທືນທັງໝົດ 400.000 ໂດລາສະຫະລັດ ບໍລິສັດໄດ້ວາງເງິນຄໍ້າປະກັນຈຳນວນ 10.000 ໂດລາສະຫະລັດ ອາຍຸສຳປະທານ 5 ປີນັບແຕ່ມື້ລົງລາຍເຊັນເປັນຕົ້ນໄປ , ຄ່າເຊົ່າສຳປະທານທີ່ດິນ, ພັນທະຕ່າງໆ ແລະຄ່າບໍລິການອື່ນໆແມ່ນປະຕິບັດຕາມລະບຽບການຂອງຂະແໜງການທີ່ກ່ຽວຂ້ອງ.
ຂ່າວ: ມຸນຕີ

แชร์