ເດືອນກຸມພາ ລັດຖະບານ ຈະໄດ້ສຸມໃສ່ປະຕິບັດວຽກຈຸດສຸມຕົວຈິງ

ກອງປະຊຸມສະໄໝສາມັນຂອງລັດຖະບານປະຈຳເດືອນມັງກອນ 2024 ໄດ້ໄຂຂຶ້ນໃນວັນທີ 29 ແລະອັດລົງໃນວັນທີ 30 ມັງກອນ 2024 ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ; ມີບັນດາທ່ານຮອງນາຍົກລັດຖະມົນຕີ, ສະມາຊິກລັດຖະບານ, ຜູ້ຕາງໜ້າກະຊວງເຂົ້າຮ່ວມແບບເຊິ່ງໜ້າ; ການນໍາຂອງບັນດາແຂວງແລະນະຄອນຫຼວງວຽງຈັນເຂົ້າຮ່ວມຜ່ານລະບົບກອງປະຊຸມທາງໄກເພື່ອຮັບຟັງການລາຍງານສະພາບພົ້ນເດັ່ນປະຈຳເດືອນມັງກອນ ແລະທິດທາງແຜນການປະຈຳເດືອນກຸມພາ 2024.

ກອງປະຊຸມ ໄດ້ຄົ້ນຄວ້າ, ປຶກສາຫາລື ແລະເຫັນດີດ້ານຫຼັກການຮັບຮອງເອົາບົດສະຫຼຸບວຽກງານພົ້ນເດັ່ນປະຈໍາເດືອນມັງກອນ ແລະທິດທາງແຜນການປະຈຳເດືອນກຸມພາ 2024 ຂອງລັດຖະບານ; ໄດ້ຮັບຮອງເອົາລາຍງານການປະເມີນຄືນບັນດາໂຄງການບໍ່ແຮ່ທີ່ໄດ້ອະນຸມັດຜ່ານມາທັງໝົດແລະແຜນໃນຕໍ່ໜ້າ; ຮັບຮອງເອົາລາຍງານຜົນການສະຫຼຸບແລະປະເມີນການຈັດຕັ້ງປະຕິບັດກອງທຶນຂະໜາດນ້ອຍ ແລະ ຂະໜາດກາງ ໃນໄລຍະຜ່ານມາຕາມແຈ້ງການສະບັບເລກທີ 29/ຫສນຍ, ລົງວັນທີ 04 ມັງກອນ 2024; ຮັບຮອງເອົາຮ່າງກົດໝາຍວ່າດ້ວຍການກັນ ແລະຄວບຄຸມເຊື້ອເຮສໄອວີ/ພະຍາດເອດ(ສະບັບປັບປຸງ); ຮັບຮອງເອົາຮ່າງກົດໝາຍວ່າດ້ວຍການປົກປັກຮັກສາສິ່ງແວດລ້ອມ (ສະບັບປັບປຸງ); ຮັບຮອງເອົາຮ່າງກົດໝາຍ ວ່າດ້ວຍສະຫະກອນ (ສະບັບສ້າງໃໝ່) ແລະ ໄດ້ພິຈາລະນາຮ່າງດໍາລັດ ວ່າດ້ວຍກອງທຶນຄວາມປອດໄພທາງລົດໄຟ ເຊິ່ງດ້ານຫຼັກການ ແມ່ນເຫັນໄດ້ຄວາມສຳຄັນ ແລະ ຈຳເປັນຂອງວຽກງານດັ່ງກ່າວ.

ສຳລັບແຜນວຽກຈຸດສຸມໃນເດືອນກຸມພາ ທີ່ຈະມາເຖິງນີ້, ລັດຖະບານຈະໄດ້ສຸມໃສ່ປະຕິບັດວຽກຈຸດສຸມຕົວຈິງຈຳນວນໜຶ່ງດັ່ງນີ້: ວຽກງານປ້ອງກັນຊາດສືບຕໍ່ຈັດຕັ້ງປະຕິບັດຕາມ 4 ໜ້າທີ່ໃຫຍ່ 26 ແຜນງານ ຢ່າງຕັ້ງໜ້າແລະຕໍ່ເນື່ອງ ເພື່ອຮັບປະກັນສະຖຽນລະພາບທາງດ້ານການເມືອງ, ຄວາມສະຫງົບຕາມບໍລິເວນຊາຍແດນ, ພ້ອມທັງສືບຕໍ່ສຸມໃສ່ວຽກງານກໍ່ສ້າງຮາກຖານການເມືອງ ໃຫ້ມີຄວາມໜັກແໜ້ນເຂັ້ມແຂງຮອບດ້ານ. ວຽກງານປ້ອງກັນຄວາມສະຫງົບ: ສືບຕໍ່ສຸມໃສ່ຈັດຕັ້ງປະຕິບັດ 4 ແຜນງານ 41 ໂຄງການ, ເອົາໃຈໃສ່ແກ້ໄຂປະກົດການຫຍໍ້ທໍ້ທີ່ເກີດຂຶ້ນໃນສັງຄົມ ໂດຍສະເພາະ ລົງເລິກການຈັດຕັ້ງປະຕິບັດວາລະແຫ່ງຊາດເພື່ອແກ້ໄຂບັນຫາຢາເສບຕິດ ຕິດພັນກັບການຄຸ້ມຄອງອາວຸດເຖື່ອນ ແລະອາວຸດດັດແປງ;ສະກັດກັ້ນການກໍ່ອາຊະຍາກໍາທາງໄຊເບີ, ຄອນເຊັນເຕີ ລວມທັງການຄຸ້ມຄອງການນຳໃຊ້ສື່ສັງຄົມອອນລາຍແລະ ອື່ນໆ; ຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ຄວາມປອດໄພຮອບດ້ານໃຫ້ແກ່ກອງປະຊຸມສາກົນຕ່າງໆທີ່ຈັດຂຶ້ນຢູ່ ສປປ ລາວ ແລະ ໃຫ້ແກ່ນັກທ່ອງທ່ຽວທີ່ເຂົ້າມາໃນ ສປປ ລາວ.

ສໍາລັບການແກ້ໄຂວຽກງານເຄັ່ງຮ້ອນທາງດ້ານເສດຖະກິດ: ແມ່ນສືບຕໍ່ແກ້ໄຂບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າແລະໜີ້ສິນຕ່າງປະເທດຕາມແຜນເຄື່ອນໄຫວວຽກຈຸດສຸມ ຂອງຄະນະສະເພາະກິດ, ນິຕິກຳ ແລະ ແຈ້ງການທິດຊີ້ນຳຂອງກອງປະຊຸມຄະນະສະເພາະກິດໃນແຕ່ລະຄັ້ງ, ພ້ອມທັງສຸມໃສ່ປະຕິບັດຕາມທິດຊີ້ນຳ ກ່ຽວກັບມາດຕະການຮັບມືສະພາບການຂາດເຂີນນໍ້າມັນເຊື້ອໄຟ ແລະບັນຫາການສະໜອງໄຟຟ້າໃຫ້ບາງໂຄງການ; ສຸມໃສ່ເກັບລາຍຮັບເຂົ້າງົບປະມານລັດໃຫ້ໄດ້ຫຼາຍສຸດກຳລັງຄວາມສາມາດຕາມກົດໝາຍ, ລັດຖະບັນຍັດກ່ຽວຂ້ອງ ແລະຕາມທິດຫັນເປັນທັນສະໄໝ.

ສ່ວນຂົງເຂດພະລັງງານ ແລະບໍ່ແຮ່: ກວດກາຄືນບັນດານິຕິກຳ ແລະ ກົດໝາຍທີ່ກ່ຽວຂ້ອງກັບການເກັບລາຍຮັບຈາກໂຄງການບໍ່ແຮ່, ນິຕິກຳໃດຍັງບໍ່ທັນສອດຄ່ອງ, ເປັນອຸປະສັກບໍ່ສາມາດແຂ່ງຂັນໄດ້ ກໍໃຫ້ຄົ້ນຄວ້າປັບປຸງ; ສົ່ງເສີມການປຸງແຕ່ງເປັນຜະລິດຕະພັນສົ່ງອອກໃຫ້ຫຼາຍຂຶ້ນ. ຂົງເຂດທະນາຄານ: ສືບຕໍ່ຕິດຕາມ ແລະ ຄຸ້ມຄອງອັດຕາແລກປ່ຽນ ຢ່າງໃກ້ຊິດ, ທັງຊຸກຍູ້ການປະຕິບັດນະໂຍບາຍສິນເຊື່ອໃຫ້ຜູ້ປະກອບການ ເກັບຊື້ຜະລິດຕະພັນກະສິກຳ ສົ່ງອອກໄປຕ່າງປະເທດເພື່ອນຳເງິນຕາຕ່າງປະເທດໃຫ້ຫຼາຍຂຶ້ນ; ສ້າງ ແລະ ປະເມີນຄືນບັນດາມາດຕະການ, ເຄື່ອງມື, ນະໂຍບາຍເງິນຕາຕ່າງໆ, ຖ້ານິຕິກຳໃດໄດ້ຮັບຜົນດີກໍສືບຕໍ່ປະຕິບັດ, ອັນໃດທີ່ບໍ່ສອດຄ່ອງ ກໍໃຫ້ປັບປຸງແກ້ໄຂ; ສືບຕໍ່ເລັ່ງການເກັບກູ້ໜີ້ສິນນຳບັນດາບໍລິສັດຈຳນວນໜຶ່ງ ທີ່ໄດ້ລັດຖະບານໄດ້ຊີ້ນຳຜ່ານມາແລ້ວ. ຂົງເຂດອຸດສາຫະກຳ ແລະ ການຄ້າ: ຕິດຕາມເກັບກຳຂໍ້ມູນສະພາບການເໜັງຕີງລາຄາສິນຄ້າໃຫ້ຮູ້ໄດ້ສາເຫດການຂຶ້ນ-ລົງ ເພື່ອປະຕິບັດມາດຕະການໃນການຄຸ້ມຄອງລາຄາສິນຄ້າໃຫ້ທັນກັບສະພາບການ; ເລັ່ງສ້າງດຳລັດວ່າດ້ວຍກອງທຶນນ້າມັນເຊື້ອໄຟໃຫ້ສຳເລັດໄວ; ແກ້ໄຂສະພາບການຂາດແຄນນໍ້າມັນເຊື້ອໄຟ ດ້ວຍຫຼາຍວິທີ ແລະຫຼາຍມາດຕະການ. ຂົງເຂດໂຍທາທິການ ແລະ ຂົນສົ່ງ: ຄົ້ນຄວ້າການຫັນຄວາມຮັບຜິດຊອບໃຫ້ອົງການປົກຄອງທ້ອງຖິ່ນເປັນຜູ້ຄຸ້ມຄອງເສັ້ນທາງ ເພື່ອໃຫ້ແຂວງສາມາດບູລະນະຮັກສາ, ສ້ອມແປງ, ຟື້ນຟູທາງຫຼວງຈຸດທີ່ມີການເປ່ເພ ໃຫ້ມີຄວາມວ່ອງໄວ ແລະ ແກ້ໄຂການເດີນທາງໃຫ້ທັນສະພາບການ; ໃຫ້ສືບຕໍ່ອອກຄຳແນະນຳລະອຽດ ເພື່ອຈັດຕັ້ງປະຕິບັດການ ຊື້-ຂາຍ ຫຼື ໂອນກຳມະສິດການນຳໃຊ້ພາຫະນະ ໂດຍຜ່ານລະບົບທະນາຄານໃຫ້ເປັນຮູບປະທຳໂດຍໄວ ແລະບັນຫາອື່ນໆໃນແຕ່ລະຂົງເຂດໂດຍສະເພາະແມ່ນຂົງເຂດໂຍທາທິການ ແລະຂົນສົ່ງ, ຂົງເຂດກະສິກຳ ແລະປ່າໄມ້, ຂົງເຂດຊັບພະຍາກອນທຳມະຊາດ ແລະສິ່ງແວດລ້ອມ, ຂົງເຂດວຽກງານວັດທະນະທຳ-ສັງຄົມ ລວມທັງວຽກງານການຕ່າງປະເທດນໍາອີກ.

ຂ່າວ ແລະພາບ: ກົມປະຊາສຳພັນ ຫສນຍ

แชร์