ນະຄອນຫລວງວຽງຈັນ ໄດ້ຮັບລາງວັນຕົວເມືອງທ່ອງທ່ຽວສະອາດອາຊຽນ

ນະຄອນຫລວງວຽງຈັນ ເປັນເມືອງເອກຂອງ ສປປ ລາວ ມີເນື້ອທີ່ທັງໝົດ 3.920 km2 ກວມ 1,7% ຂອງເນື້ອທີ່ທົ່ວປະເທດເປັນທີ່ຕັ້ງຍຸດທະສາດທີ່ສຳຄັນທາງດ້ານການເມືອງ ການປົກຄອງແຫ່ງຊາດ ເປັນສູນກາງທາງດ້ານວັດທະນະທຳ ເສດຖະກິດ-ສັງຄົມ ຂອງຊາດ, ຊຶ່ງມາຮອດປະຈຸບັນນະຄອນຫລວງວຽງຈັນ ໄດ້ເປັນຕົວເມືອງສະອາດອາຊຽນ, ຊຶ່ງພິທີມອບ-ຮັບລາງວັນມາດຕະຖານຕົວເມືອງທ່ອງທ່ຽວສະອາດອາຊຽນ ຈັດຂຶ້ນໃນໂອກາດງານມະຫະກໍາທ່ອງທ່ຽວອາຊຽນ 2024 ທີ່ ສປປ ລາວ ໄດ້ຮັບກຽດເປັນເຈົ້າພາບ ຈັດຂຶ້ນລະຫວ່າງ 22-27 ມັງກອນ 2024 ນີ້.

ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫລງຂ່າວ, ວັດທະນະທໍາ ແລະທ່ອງທ່ຽວ ນະຄອນຫລວງວຽງຈັນ ໃຫ້ສໍາພາດວ່າ: ຄະນະກໍາມະການທີ່ກ່ຽວຂ້ອງໄດ້ປະເມີນ ແລະ ຄັດເລືອກຕາມຂັ້ນຕອນຕ່າງໆ ແລະ ເຫັນດີໃຫ້ນະຄອນຫລວງວຽງຈັນໄດ້ຮັບລາງວັນມາດຕະຖານຕົວເມືອງທ່ອງທ່ຽວສະອາດອາຊຽນ ເປັນຄັ້ງທີ 2 ຊຶ່ງຖືເປັນສິ່ງທີ່ດີ ແລະຈະປະກອບສ່ວນສໍາຄັນໃນການດຶງດູດນັກທ່ອງທ່ຽວສາກົນເຂົ້າມາທ່ອງທ່ຽວລາວກໍຄືທ່ອງທ່ຽວນະຄອນຫລວງວຽງຈັນ ນັບມື້ເພີ່ມຂຶ້ນ, ພ້ອມນີ້ທ່ານຍັງກ່າວຕື່ມວ່າຂໍມອບລາງວັນດັ່ງກ່າວນີ້ໃຫ້ປະຊາຊົນຊາວນະຄອນຫລວງວຽງຈັນທຸກຄົນ ແລະຈົ່ງພ້ອມກັນຮັກສານາມມະຍົດເມືອງທ່ອງທ່ຽວສະອາດອາຊຽນໄວ້ໃຫ້ມີຄວາມຍືນຍົງຕະຫລອດໄປ.

ໃນໄລຍະຜ່ານມາ, ນະຄອນຫລວງວຽງຈັນ ເຄີຍໄດ້ຮັບລາງວັນມາດຕະຖານຕົວເມືອງທ່ອງທ່ຽວສະອາດອາຊຽນ ມາແລ້ວ 1 ຄັ້ງ ຊຶ່ງໝົດອາຍຸໃນປີ 2023 ຜ່ານມານີ້. ສໍາລັບຂອບເຂດເນື້ອທີ່ທີ່ກໍານົດເປັນຕົວເມືອງທ່ອງທ່ຽວສະອາດອາຊຽນ ກວມເອົາຫລາຍບ້ານພາຍ ໃນ 4 ຕົວເມືອງໃນຂອງນະຄອນຫລວງວຽງຈັນ ຄື: ຈັນທະບູລີ, ສີສັດຕະນາກ, ໄຊເສດຖາ ແລະສີໂຄດຕະບອງ, ສ່ວນມາດຕະຖານການປະເມີນ ໂດຍລວມແມ່ນອິງໃສ່ 7 ຕົວຊີ້ວັດ ເປັນຕົ້ນ: ການຄຸ້ມຄອງສິ່ງແວດລ້ອມ, ຄວາມສະອາດ, ພື້ນຖານການທ່ອງທ່ຽວ, ຄວາມປອດໄພ ແລະອື່ນໆ.

แชร์