ເຈົ້າແຂວງຈໍາປາສັກ ຕ້ອນຮັບນັກທຸລະກິດລົງທຶນຢູ່ລາວ

ວັນທີ 26 ມັງກອນ 2024, ທ່ານ ປອ.ວິໄລວົງ ບຸດດາຄໍາ ເຈົ້າແຂວງຈໍາປາສັກ ໄດ້ຕ້ອນຮັບ ແລະເຮັດວຽກຮ່ວມກັບ ທ່ານ Shinichi naruuchi ຮອງປະທານ ກຸ່ມບໍລິສັດ ທີທີຊີເອວ ມະຫາຊົນຈຳກັດ ພ້ອມດ້ວຍການນໍາອົງການໄຈກ້າ ປະຈໍາລາວ ແລະ ບໍລິສັດ ຊີ້ໂກກື ພາວເວີ ຈຳກັດ ພ້ອມຄະນະ. ການຕ້ອນຮັບ ແລະຮ່ວມເຮັດວຽກຄັ້ງນີ້ ຈັດຂຶ້ນຢູ່ຫ້ອງປະຊຸມ 203, ສຳນັກງານປົກຄອງແຂວງ. ມີການນໍາພະແນກການກົມກອງທີ່ກ່ຽວຂ້ອງຂອງແຂວງ, ຕາງໜ້າລັດວິສ່ຫະກິດໄຟຟ້າລາວ ສໍານັກງານໃຫຍ່, ການນໍາລັດວິສາຫະກິດໄຟຟ້າລາວ ສາຂາ ແຂວງຈໍາປາສັກ ແລະພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.

ການພົບປະ ແລະຮ່ວມເຮັດວຽກຄັ້ງນີ້, ກ່ອນອື່ນ ທ່ານ Shinichi naruuchi ຮອງປະທານ ກຸ່ມບໍລິສັດ ທີທີຊີເອວ ມະຫາຊົນຈຳກັດ ໄດ້ລາຍງານຄວາມຄືບໜ້າໃນການກະກຽມຈັດຕັ້ງປະຕິບັດໂຄງການກໍ່ສ້າງໂຮງງານ ເພື່ອປົກຄຸມເຄື່ອງກໍາເນີດໄຮໂດຣເຈນ ແລະ ເຄື່ອງຂົ້ວກາເຟໄຮໂດຣເຈນ ໂດຍນໍາໃຊ້ເທັກໂນໂລ ທີ່ທັນສະໄໝ ຢູ່ໃນ ສປປ ລາວ ເວົ້າລວມ, ເວົ້າສະເພາະແມ່ນແຂວງຈໍາປາສັກ ຕາມທີ່ໄດ້ເຊັນບົດບັນທຶກຄວາມເຂົ້າໃຈ ໃນການໄດ້ສ້າງໂຮງງານຮ່ວມກັບ ບໍລິສັດ ເພັດສະຫວ່າງ ຮ່ວມພັດທະນາກາເຟ ໃນເດືອນພະຈິກ 2023 ທີ່ຜ່ານມາຢູ່ປະເທດຢູ່ປຸ່ນ. ບໍລິສັດ ເພັດສະຫວ່າງ ຮ່ວມພັດທະນາກາເຟເປັນ ບໍລິສັດທີ່ໄດ້ຮັບການສ້າງຕັ້ງຂຶ້ນແລະດໍາເນີນກິດຈະການພາຍໃຕ້ກົດໝາຍຂອງ ສປປ ລາວ. ບໍລິສັດ ທີທີຊີແອວ ມະຫາຊົນ ຈຳກັດ ເປັນບໍລິສັດທີ່ໄດ້ຮັບການສ້າງຕັ້ງຂຶ້ນ ແລະດຳເນີນກິດຈະການພາຍໃຕ້ກົດໝາຍຂອງປະເທດໄທ, ບໍລິສັດດັ່ງກ່າວມີຄວາມຕັ້ງໃຈທີ່ຈະກໍ່ສ້າງໂຮງງານຢູ່ໃນ ສປປ ລາວ ເພື່ອປົກຄຸມເຄື່ອງກໍາເນີດໄຮໂດຣເຈນ ແລະ ເຄື່ອງຂົ້ວກາເຟໄຮໂດຣເຈນ ໂດຍນໍາໃຊ້ເທັກໂນໂລ ທີ່ທັນສະໄໝ ເຊິ່ງໄດ້ຮັບທຶນສະໜັບສະໜູນຈາກລັດຖະບານຍີ່ປຸ່ນທັງໝົດ ຫຼື ບາງສ່ວນ. ບໍລິສັດ ເພັດສະຫວ່າງ ຮ່ວມພັດທະນາກາເຟ ມີສວນກາເຟ ແລະ ໂຮງງານປຸງແຕ່ງກາເຟ ຢູ່ໃນ ສປປ ລາວ, ແລະ ມີຄວາມຕັ້ງໃຈ ທີ່ຈະສາງຕັ້ງລະບົບຕ່ອງໂສ້ມູນຄ່າຄົບວົງຈອນຂອງກາເຟຂົ້ວໄຮໂດຣເຈນສີຂຽວ ໃນ ສປປ ລາວ ສໍາລັບລູກຄ້າລະດັບສູງ. ຍ້ອນແນວນັ້ນ, ຄູສັນຍາທັງສອງຝ່າຍໄດ້ຕົກລົງເຫັນດີເຊັນບົດບັດທຶກຄວາມເຂົ້າໃຈຮ່ວມກັນ ເພື່ອຢືນຢັນຂໍ້ຕົກລົງ ລະຫວ່າງຄູ່ສັນຍາທັງສອງຝ່າຍ ກ່ຽວກັບການສຶກສາຄວາມເປັນໄປໄດ້ທາງດ້ານເຕັກນິກ ແລະເສດຖະກິດ ສໍາລັບລະບົບຕ່ອງໂສ້ມູນຄ່າທີ່ຄົບວົງຈອນຂອງກາເຟຂົ້ວໄຮໂດຣເຈນສີຂຽວເຊິ່ງໂຄງການ ແລະ ການຈັດຕັ້ງທຸລະກິດຢ່າງເປັນທາງການພາຍໃຕ້ກອບໄລຍະເວລາຂອງບົດບັນທຶກຄວາມເຂົ້າໃຈສວນກາເຟ, ການປຸງແຕ່ງ, ເຄື່ອງກຳເນີດໄຮໂດຣເຈນສີຂຽວທີ່ນໍາໃຊ້ພະລັງງານທົດແທນ, ການຂົ້ວກາເຟໄຮໂດຣເຈນສີຂຽວ, ການຫຸ້ມຫໍ່ ແລະການຂົນສົ່ງ.

ທ່ານ Shinichi naruuchi ກ່າວຕື່ມວ່າ: ຖ້າຫາກການສຶກສາສໍາຫຼວດສະແດງໃຫ້ເຫັນວ່າມີຄວາມເປັນໄປໄດ້ສູງໂດຍການສະໜັບສະໜູນດ້ານການເງິນຈາກລັດຖະບານຍີ່ປຸ່ນ, ຄູ່ສັນຍາທັງສອງຝ່າຍອາດຈະປຶກສາຫາລືດ້ວຍຄວາມຈິງໃຈ ລວມທັງສະຫຼຸບຂໍ້ຕົກລົງຂັ້ນສຸດທ້າຍ, ສັນຍາການບໍລິການຂົວໄຮໂດຣເຈນສໍາລັບ ບໍລິສັດ ທີທີຊີແອວ ເພື່ອກວມເອົາຄ່າກະແສໄຟຟ້າ ແລະຄ່າໃຊ້ຈ່າຍຂອງຜູ້ປະຕິບັດງານເຊິ່ງເງິນອຸດໜູນຂອງລັດຖະບານຍີ່ປຸ່ນບໍ່ສາມາດສະໜັບສະໜູນໄດ້. ກໍາລັງການຜະລິດ ແລະ ກຳນົດການຂອງໂຮງງານເບື້ອງຕົ້ນ ຄູ່ສັນຍາທັງສອງຝ່າຍ ກໍາລັງພິຈາລະນາກໍາລັງການຜະລິດຂອງໂຮງງານເບື້ອງຕົ້ນ, ເຄື່ອງກໍາເນີດໄຮໂດຣເຈນສີຂຽວ 200 - 400 Nm3/ຊົ່ວໂມງ,ຄວາມຕອງການກະແສໄຟຟາ 1 - 2 ເມກາວັດ(MW), ສາມາດຂົ້າວກາເຟສີຂຽວ ໄດ້ 4.000 - 8.000 ໂຕນ/ປີ. ການສຶກສາຄວາມເປັນໄປໄດ້ນີ້ກຳນົດໃຫ້ສໍາເລັດພາຍໃນໄຕມາດທີ 1 ຫຼື 2 ຂອງປີ 2024. ການຮັບຮອງເອົາເງິນອຸດໜູນໂຄງການຈາກລັດຖະບານຍີ່ປຸ່ນ ແລະການກໍ່ສ້າງເລີ່ມດໍາເນີນການໃນ ໄຕມາດທີ 3 ຫຼື 4 ຂອງປີ 2024 ແລະຈະເລີ່ມການດໍາເນີນງານຂອງໂຄງການ ໃນປີ 2025 ຫຼື 2026.

ໃນໂອກາດນີ້, ທ່ານ ປອ.ວິໄລວົງ ບຸດດາຄໍາ ເຈົ້າແຂວງຈໍາປາສັກ ກໍໄດ້ກ່າວຕ້ອນຮັບຜູ້ຕາງໜ້າກຸ່ມບໍລິສັດ ທີທີຊີແອວ ມະຫາຊົນຈຳກັດ, ອົງການໄຈກ້າ ປະຈໍາລາວ ແລະບໍລິສັດ ຊີ້ໂກກື ພາວເວີ ຈຳກັດ ແລະສະແດງຄວາມຂອບໃຈ ທີ່ກຸ່ມບໍລິສັດ ທີທີຊີແອວ ທີ່ເລືອກເອົາແຂວງຈໍາເປັນບ່ອນສ້າງຕັ້ງໂຮງງານ.ໃນນາມຕາງຄະນະພັກ - ອົງການປົກຄອງແຂວງຢືນຢັນວ່າຈະໃຫ້ການຮ່ວມມື ແລະສະໜັບສະໜູນເຕັມທີ່ເພື່ອເຮັດໃຫ້ໂຄງການໄດ້ດໍາເນີນໄປຢ່າງມີຜົນສໍາເລັດ.
ຂ່າວ-ພາບ: ທູນທອງໃຈ 

แชร์