ຫາລືວຽກຮ່ວມມືຕ່າງປະເທດໃນຂະແໜງ ຖວທ

ວັນທີ 10 ເມສາ 2019 ກົມຮ່ວມມືສາກົນໄດ້ຈັດຕັ້ງກອງປະຊຸມແລກປ່ຽນປຶກສາຫາລືໃນການຈັດຕັ້ງປະຕິບັດວຽກງານຮ່ວມມືກັບຕ່າງປະເທດໃນຂະແໜງ ການຖະແຫຼງຂ່າວ, ວັດທະນະທຳ ແລະ ທ່ອງທ່ຽວຮ່ວມກັບແຂວງພາກກາງ ແລະ ພາກໃຕ້ຈັດຂຶ້ນທີ່ນະຄອນປາກເຊ, ແຂວງຈຳປາສັກ ໃຫ້ກຽດເປັນປະທານ ໂດຍທ່ານ ສະຫວັນຄອນ ລາຊມຸນຕີ ຮອງລັດຖະມົນຕີທັງເປັນຜູ້ຊີ້ນຳວຽກງານຮ່ວມມືຕ່າງປະເທດ, ກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ, ຊຶ່ງມີຜູ້ເຂົ້າຮ່ວມຈາກ 3 ແຂວງພາກກາງ ແລະ 4 ພາກໃຕ້ຈຳນວນຫຼາຍກວ່າ 60 ທ່ານ ໃນກອງປະຊຸມທ່ານປະທານໄດ້ເນັ້ນໜັກໃນກອງປະຊຸມເພື່ອຖອດຖອນບົດຮຽນແລກປ່ຽນປຶກສາຫາລືຈັດຕັ້ງປະຕິບັດວຽກງານການຕ່າງປະເທດໃຫ້ດຳເນີນໄປຢ່າງຖືກຕ້ອງກັບແນວທາງການຕ່າງປະເທດຂອງພັກ, ລັດວາງອອກ. ຊຶ່ງເປັນການກະກຽມເນື້ອໃນໃຫ້ແກ່ກອງປະຊຸມສະຫຼຸບວຽກງານການຕ່າງປະເທດຄັ້ງທີ 14 ທີ່ກະຊວງການຕ່າງປະເທດຈະເປັນເຈົ້າພາບຈັດຕັ້ງໃນເດືອນຕຸລາ 2019 ທີ່ຈະມາເຖິງນີ້.

  ກອງປະຊຸມໄດ້ຮັບຟັງການນຳສະເໜີຈາກບັນດາກົມທີ່ກ່ຽວຂ້ອງເຊັ່ນ: ວຽກງານການຕ່າງປະເທດອັນຮີບດ່ວນໃນປີ 2019 ສະເໜີໂດຍ ທ່ານ ບຸນເລື່ອນ ບຸບຜາ ຫົວໜ້າກົມຮ່ວມມືສາກົນ; ການຈັດຕັ້ງປະຕິບັດວຽກງານຮ່ວມມືກັບເພື່ອນມິດຍຸດທະສາດ ແລະສາກົນທາງດ້ານການປັບປຸງສື່ຍຸກໃໝ່ສະເໜີໂດຍ ທ່ານ ປິ່ນປາຖະໜາ ພັນທະມາລີ ຫົວໜ້າກົມສື່ມວນຊົນ; ການຮ່ວມມືກັບຕ່າງປະເທດໃນຂະແໜງການປະຕິສັງຂອນມໍລະດົກທາງວັດທະນະທຳ ແລະເປັນພາຄີຂອງອົງການຈັດຕັ້ງສາກົນສະເໜີໂດຍ ທ່ານ ທອງໃບ ໂພທິສານ ຫົວໜ້າກົມມໍລະດົກ; ແລະວຽກງານຮ່ວມມື ແລະ ຜົນສຳເລັດດ້ານການທ່ອງທ່ຽວສະ ເໜີ ໂດຍທ່ານ ສູນ ມະນີວົງສ໌ ຫົວໜ້າກົມໂຄ ສະນາການທ່ອງທ່ຽວ.

  ພ້ອມດຽວກັນນີ້, ຍັງໄດ້ມີໂອກາດຮັບຟັງການປະກອບຄຳເຫັນ ແລະນຳສະເໜີບາງບົດຮຽນຂອງທ້ອງຖິ່ນເພື່ອພ້ອມກັນຄົ້ນຄວ້າເຖິງບັນຫາຕ່າງໆທີ່ເປັນອຸ ປະສັກໃຫ້ແກ່ວຽກງານການຮ່ວມມືສາກົນເພື່ອພ້ອມກັນຊອກຫາວິທີທາງແກ້ໄຂບັນຫາ ແລະຂໍ້ບົກຜ່ອງເຫຼົ່ານັ້ນເພື່ອເປັນເອກະພາບໃນດ້ານຫຼັກການໃນການປະຕິບັດວຽກງານໃນຕໍ່ໜ້າ.

ຂ່າວ: ນສພ ເສດຖະກິດ-ສັງຄົມ

แชร์