ຄໍາມ່ວນ ກຽມ27 ກິດຈະກຳເປີດປີທ່ອງທ່ຽວ

ໃນໂອກາດເປີດປີທ່ອງທ່ຽວລາວ 2024 ນີ້, ແຂວງຄຳມ່ວນ ໄດ້ກະກຽມຈັດກິດຈະກໍາທີ່ຕິດພັນກັບ 3 ຍອດຍິ່ງທີ່ເປັນທ່າແຮງທາງດ້ານການທ່ອງທ່ຽວຂອງແຂວງມີທັງໝົດ 27 ກິດຈະກຳ ລວມທັງກິດຈະດຳລະດັບຊາດ, ລະດັບແຂວງ ແລະ ລະດັບເມືອງ.

ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄຳມ່ວນ ຜູ້ຊີ້ນໍາວຽກງານວັດທະນະທຳ-ສັງຄົມ, ປະທານຄະນະກຳມະການຈັດງານປີທ່ອງທ່ຽວລາວ 2024 ແຂວງຄໍາມ່ວນ ໄດ້ຖະແຫລງຂ່າວຕໍ່ສື່ມວນຊົນແຂວງເມື່ອບໍ່ດົນນີ້ວ່າ: ເພື່ອກະກຽມຄວາມພ້ອມຮອບດ້ານໃນການເປີດປີທ່ອງທ່ຽວລາວ 2024 ພາຍໃຕ້ຄໍາຂວັນ “ທ່ອງທ່ຽວລາວປອດໄພ, ຊື່ນໃຈໃນວັດທະນະທຳ, ທຳມະຊາດ ແລະປະຫວັດສາດ ". ແຂວງຄໍາມ່ວນສົມທົບກັບກະຊວງຖະແຫລງຂ່າວ, ວັດທະນະທຳ ແລະທ່ອງທ່ຽວ (ຖວທ) ເຫັນດີເປັນເອກະພາບກຳນົດແຜນຈັດປີທ່ອງທ່ຽວລາວ 2024 ໂດຍພື້ນຖານໄດ້ກະກຽມຈັດກິດຈະກໍາທີ່ຕິດພັນກັບ 3 ຍອດຍິ່ງທີ່ເປັນທ່າແຮງທາງດ້ານການທ່ອງທ່ຽວຂອງແຂວງມີທັງໝົດ 27 ກິດຈະກໍາ. ໃນນັ້ນ, ກິດຈະກຳລະດັບຊາດ ເປັນສິ່ງຍອດຍິ່ງທາງດ້ານວັດທະນະທຳຄື: ບຸນນະມັດສະການພະທາດສີໂຄດຕະບອງ, ກິດຈະກຳລະດັບແຂວງຄື: ບຸນລະນຶກເຫດການ 21 ມີນາ 1946 ເປັນສິ່ງຍອດຍິ່ງທາງດ້ານປະຫວັດສາດ; ວົງຈອນທ່ອງທ່ຽວເດີລຸບ (The Loop) ສິ່ງຍອດຍິ່ງທາງດ້ານທຳມະຊາດ ແລະ ກິດຈະກຳລະດັບເມືອງຢູ່ຂັ້ນທ້ອງຖິ່ນຮາກຖານຈຳນວນ 24 ກິດຈະກຳ ແລະ ໃນວັນທີ 3 ກຸມພາ 2024 ທີ່ຈະມາເຖິງນີ້ ແຂວງພວກເຮົາ ຈະຈັດພິທີເປີດປີທ່ອງທ່ຽວລາວ 2024 ຂອງແຂວງ, ພ້ອມກັບການເປີດຕະຫລາດ ນັດວາງສະແດງຈຳໜ່າຍສິນຄ້າ ແລະ ຈັດເທສະການອາຫານ; ການແຂ່ງຂັນກິລາ ແລະສະແດງສິລະປະ-ວັນນະຄະດີຂອງມວນຊົນ ຢູ່ເທສະບານທ່າແຂກຕໍ່ໜ້າໂຮງຮຽນມັດທະຍົມຕອນປາຍທ່າແຂກ. ນອກນັ້ນຍັງມີບຸນນະມັດສະການພະທາດຕຸ້ມພາວັງ ເມືອງໜອງບົກ, ເທສະການເຫລົ້າໄຫຫວານ ຕຳນານເຜົ່າແສກ ຢູ່ແຫລ່ງທ່ອງທ່ຽວທ່າຝຣັ່ງວັງສີຄາມ, ບຸນກອງເຂົ້າໃຫຍ່ ແລະ ສະເຫລມ ສະຫລອງວັນສ້າງຕັ້ງເມືອງໄຊບົວທອງ ຄົບຮອບ 30 ປີ, ບຸນນະມັດສະການພະ ທາດເກດແກ້ວ ເມືອງມະ ຫາໄຊ, ບຸນຖໍ້າພະ ໜອງປາຝາ ບ້ານນາຂ້າງຊ້າງ ເມືອງທ່າແຂກ, ບຸນຫລິ້ນຫຸ່ນ ບ້ານກອງລໍ ເມືອງຄູນຄໍາ ຊຶ່ງເປັນແຫລ່ງທ່ອງທ່ຽວທີ່ມີຊື່ສຽງ ແລະ ໄດ້ຮັບຄວາມນິຍົມໃນລະ ດັບພາກພື້ນ ແລະ ສາກົນ, ບຸນອອກພັນສາປະວໍລະນາໃນທ້າຍປີ ແລະ ງານບຸນປະເພນີອື່ນໆ. ທັງນີ້, ກໍເພື່ອເປັນການສົ່ງເສີມໂຄສະນາ ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ສ້າງແຮງກະຕຸ້ນການທ່ອງທ່ຽວຢູ່ພາຍໃນປະເທດ ກໍຄື ແຂວງໃຫ້ມີຄວາມຄຶກຄື້ນ ລວມທັງການສົ່ງເສີມຜະລິດຕະພັນການທ່ອງທ່ຽວໃຫ້ມີຄວາມເຂັ້ມແຂງ ສ້າງລາຍຮັບໃຫ້ແກ່ທົ່ວສັງຄົມ ໄປພ້ອມກັບການຊຸກຍູ້ການພັດທະນາທາງດ້ານເສດ ຖະກິດ-ສັງຄົມຂອງແຂວງ ໃຫ້ມີການຂະຫຍາຍຕົວຢ່າງຕໍ່ເນື່ອງ.

ປັດຈຸບັນ, ທົ່ວແຂວງຄໍາມ່ວນມີແຫລ່ງທ່ອງທ່ຽວທີ່ໄດ້ສຳຫລວດແລ້ວ 210 ແຫ່ງ. ໃນນັ້ນ, ແຫລ່ງທ່ອງທ່ຽວທຳມະຊາດ 145 ແຫ່ງ, ວັດທະນະທໍາ 33 ແຫ່ງ ແລະ ປະຫວັດສາດ 32 ແຫ່ງ; ມີສະຖານທີ່ທ່ອງທ່ຽວທີ່ໄດ້ເປີດບໍລິການໃຫ້ແຂກເຂົ້າໄປທ່ຽວຊົມແລ້ວ 87 ແຫ່ງ, ແຫລ່ງທ່ອງທ່ຽວທີ່ໄດ້ຮັບການພັດທະນາແລ້ວ 23 ແຫ່ງ. ສະເພາະໃນປີນີ້ ຈະມີການເປີດແຫລ່ງທ່ອງທ່ຽວ ໃໝ່ຕື່ມອີກ 2 ແຫ່ງຄື: ແຫລ່ງທ່ອງທ່ຽວຂຸນກອງແລງ ເມືອງຫີນບູນ ແລະ ແຫລ່ງທ່ອງທ່ຽວຕາດສຽງລື ເມືອງບົວລະພາ. ພ້ອມກັນນີ້, ຍັງໄດ້ເອົາໃຈ ໃສ່ພັດທະນາ ແລະ ສ້າງເງື່ອນໄຂ ສິ່ງອຳນວຍຄວາມສະດວກໃຫ້ແກ່ຜູ້ປະກອບການສະຖານທີ່ບ້ານພັກ-ຣີສອດ, ໂຮງແຮມ, ຮ້ານອາຫານ ແລະ ສະຖານທີ່ຮ້ານກິນດື່ມຕ່າງໆຮ່ວມກັບຜູ້ປະກອບການທຸລະກິດການທ່ອງ ທ່ຽວ ແລະ ສະມາຄົມຕ່າງໆທີ່ກ່ຽວຂ້ອງ ຈັດເປັນກິດຈະກຳ-ລາຍການທ່ອງທ່ຽວທີ່ຕິດພັນກັບປີທ່ອງທ່ຽວນີ້.

ທ່ານຮອງເຈົ້າແຂວງຄໍາມ່ວນ ຍັງໃຫ້ຮູ້ອີກວ່າ: ເພື່ອເຮັດໃຫ້ການຈັດຕັ້ງປະຕິບັດແຜນກິດຈະກຳປີທ່ອງທ່ຽວລາວ 2024 ບັນລຸຕາມໝາຍທີ່ວາງໄວ້. ຄະນະພັກ-ອົງການປົກຄອງແຂວງ ໄດ້ຊຸກຍູ້ຂະແໜງການທີ່ກ່ຽວຂ້ອງຂັ້ນແຂວງ-ຂັ້ນເມືອງສຸມໃສ່ 9 ແຜນງານຫລັກຄື: ການໂຄສະນາປະຊາສຳພັນປີທ່ອງທ່ຽວລາວ 2024, ປັບປຸງໂຄ່ງລ່າງພື້ນຖານຂະໜາດນ້ອຍໃຫ້ແກ່ການທ່ອງທ່ຽວ, ສ້າງຂີດຄວາມສາມາດໃນຂະແໜງການທ່ອງທ່ຽວ, ການປູກຈິດສໍານຶກ, ການເຜີຍແຜ່ລະບຽບການ, ນິຕິກຳ, ການຈັດລະດັບມາດຕະຖານການທ່ອງທ່ຽວຂອງ ສປປ ລາວ ແລະ ມາດຕະຖານອາຊຽນ, ກິດຈະກຳສົ່ງເສີມການທ່ອງທ່ຽວພາຍໃນ ແລະ ຕ່າງປະເທດ, ການປັບປຸງລະບົບຂໍ້ມູນຂ່າວ ສານ, ການອອກແບບ ແລະ ການຈັດພິມສື່ສິ່ງພິມໂຄສະນາການທ່ອງທ່ຽວ ແລະ ການສ້າງຄວາມເຂັ້ມແຂງໃຫ້ກັບພາກທຸລະກິດ.
ໃນປີ 2023 ຜ່ານມາ, ມີນັກທ່ອງທ່ຽວເຂົ້າມາທ່ຽວແຂວງຄໍາມ່ວນທັງໝົດ 365.478 ເທື່ອຄົນ ທຽບໃສ່ປີ 2022 ຜ່ານມາເພີ່ມຂຶ້ນປະມານ 10%. ໃນນີ້, ມີນັກທ່ອງທ່ຽວພາຍໃນປະມານ 37%, ນັກທ່ອງທ່ຽວຕ່າງປະເທດ 63%, ສະເລ່ຍລາຍຮັບສະພັດໄດ້ທັງໝົດ 11.916.760 ໂດລາ. ສຳລັບຄາດໝາຍປີ 2024 ຈະດຶງດູດນັກທ່ອງທ່ຽວ ເຂົ້າມາທ່ຽວແຂວງຄໍາມ່ວນໃຫ້ໄດ້ຫລາຍກວ່າ 5 ແສນເທື່ອຄົນ. ໃນນີ້, ຄາດວ່າຈະມີນັກທ່ອງທ່ຽວພາຍໃນປະມານ 35%, ຕ່າງປະເທດປະມານ 65%; ສ້າງລາຍຮັບສະພັດຫລາຍກວ່າ 15 ລ້ານໂດລາ.

ໂອກາດນີ້, ທ່ານຮອງເຈົ້າແຂວງຄໍາມ່ວນ ຂໍຮຽກຮ້ອງມາຍັງບັນດາຜູ້ປະກອບການທຸລະກິດການທ່ອງທ່ຽວ ທັງພາກລັດ-ເອກະຊົນໃນທົ່ວສັງຄົມ ຕະຫລອດຮອດປະຊາຊົນລາວບັນດາເຜົ່າ ຈົ່ງໄດ້ຮ່ວມກັນສະໜັບສະໜູນ ແລະ ເປັນເຈົ້າພາບທີ່ດີ ໃນການຕ້ອນຮັບແຂກບ້ານ-ແຂກເມືອງ, ເອົາໃຈໃສ່ປັບປຸງສ້າງສິ່ງອໍານວຍຄວາມສະດວກດ້ານການທ່ອງທ່ຽວ, ສ້າງຜະລິດຕະພັນ-ລາຍການທ່ອງທ່ຽວໃຫ້ມີຄວາມຫລາກຫລາຍ, ຫລາຍຮູບ-ຫລາຍແບບ ສາມາດຕອບສະໜອງຄວາມຕ້ອງການກັບທ່າອ່ຽງຂອງນັກທ່ອງທັງພາຍໃນ ແລະຕ່າງປະເທດ, ປັບປຸງຄຸນນະພາບການບໍລິການການທ່ອງທ່ຽວ ໃຫ້ມີຄວາມປະທັບໃຈ, ອົບອຸ່ນຄ້າຍຄືຄອບຄົວດຽວກັນ, ມີຄວາມເປັນທຳ ແລະ ຮັບປະກັນຄວາມປອດໄພ ເຮັດໃຫ້ນັກທ່ອງທ່ຽວມາແລ້ວ ຢາກກັບມາຕື່ມອີກ; ເອົາໃຈໃສ່ເພີ່ມທະວີການໂຄສະນາ ໂດຍນຳໃຊ້ພາຫະນະສື່ມວນ ຊົນທັງພາຍໃນ ແລະ ຕ່າງ ປະເທດ ເພື່ອຊ່ວຍເປັນກະບອກສຽງໂຄສະນາຢ່າງກວ້າງຂວາງ ແລະທົ່ວເຖິງ ກ່ຽວກັບປີທ່ອງທ່ຽວລາວ 2024 ຂອງແຂວງຄໍາມ່ວນ ເພື່ອໃຫ້ນັກທ່ອງທ່ຽວໄດ້ຮັບຮູ້ ແລະ ເຂົ້າເຖິງຂໍ້ມູນຂ່າວສານສະດວກສະບາຍຂຶ້ນ ເຮັດໃຫ້ປີທ່ອງທ່ຽວລາວ 2024 ບັນລຸຜົນສຳ ເລັດຕາມຈຸດປະສົງ ແລະລະດັບຄາດໝາຍທີ່ວາງໄວ້, ແຂວງຄໍາມ່ວນ ພ້ອມແລ້ວທີ່ຈະອຳນວຍຄວາມສະດວກ ແລະ ຍິນດີຕ້ອນຮັບທຸກໆທ່ານເຂົ້າສູ່ດິນແດນພະທາດສີໂຄດຕະບອງງາມສະຫງ່າ ລຳຜະຫຍາມະຫາໄຊ ກຳແພງໃຫຍ່ພູຄັນນາ ຜາຫີນໜາມໜໍ່ ບໍ່ໄຟຟ້ານໍ້າເທີນ 2 ກອງລໍ-ນາຕານ ນໍ້າລອດຖ້ຳ ວິລະກຳ 21 ມີນາ 1946 ແຫ່ງນີ້.
ຂ່າວ: ມະນີວັນ

แชร์