ລາວ-ໄທ ເພີ່ມທະວີຮ່ວມມືດ້ານການທ່ອງທ່ຽວ

ກອງປະຊຸມ ພົບປະຫາລືເພີ່ມທະວີການຮ່ວມມືກັນດ້ານການທ່ອງທ່ຽວ ລະຫວ່າງ ກະຊວງຖະແຫຼ່ງຂ່າວ, ວັດທະນາທຳ ແລະທ່ອງທ່ຽວ, ສປປ ລາວ ແລະກະຊວງທ່ອງທ່ຽວ ແລະກິລາ ແຫ່ງຣາຊະອານາຈັກໄທ ໄດ້ມີຂຶ້ນໃນວັນທີ 25 ມັງກອນ 2024 ທີ່ໂຮງແຮມແລນມາກ ແມ່ຂອງລີເວີໄຊ ນະຄອນຫຼວງວຽງຈັນ.

ໃນໂອກາດພົບປະຫາລື ທ່ານນາງ ສວນສະຫວັນ ວິຍະເກດ ລັດຖະມົນຕີ ກະຊວງຖະແຫຼ່ງຂ່າວ,ວັດທະນາທຳ ແລະ ທ່ອງທ່ຽວ ໄດ້ສະແດງຄວາມຍິນດີຕ້ອນຮັບ ທ່ານນາງ ສຸດາວັນ ວັງສຸພາກິດໂກສົນ ລັດຖະມົນຕີ ກະຊວງທ່ອງທ່ຽວ ແລະ ກິລາ ແຫ່ງຣາຊະອານາຈັກໄທ ພ້ອມດ້ວຍຄະນະ ທີ່ມາເຂົ້າຮ່ວມກອງປະຊຸມລັດຖະມົນຕີທ່ອງທ່ຽວ ອາຊຽນ ແລະ ບັນດາກິດຈະກຳປິ່ນອ້ອມທີ່ ສປປ ລາວ ໃນຄັ້ງນີ້. ສປປ ລາວ ແລະ ຣາຊະອານາຈັກໄທ ມີສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງສອງກະຊວງ ໃນຂະແໜງການທ່ອງທ່ຽວຂອງ ສອງປະເທດ ລາວ-ໄທ ໃນຖານບ້ານໃກ້ເຮືອນຄຽງ ທັງໃນຂອບສອງຝ່າຍ ແລະ ຫຼາຍຝ່າຍ ເພື່ອຜົນປະໂຫຍດຂອງປະຊາຊົນສອງຊາດ ລາວ-ໄທ, ກໍຄືເພື່ອສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາທີ່ຍືນຍົງ ຢູ່ໃນພາກພື້ນ ແລະ ໃນໂລກ ແລະ ຕີລາຄາສູງ ຕໍ່ກັບໝາກຜົນການຮ່ວມມືສອງຝ່າຍໃນຂະແໜງ ທ່ອງທ່ຽວ ໃນຊຸມປີຜ່ານມາ ໂດຍສະເພາະການລົງນາມບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານການທ່ອງທ່ຽວຮ່ວມກັນ ໃນປີ 2016 ເຖິງປະຈຸບັນ ບົດບັນທຶກດັ່ງກ່າວໄດ້ສິ້ນສຸດແລ້ວ, ແຕ່ໃນການສະໜັບສະໜູນ ໃນການພັດທະນາຊັບພະຍາກອນມະນຸດ ຈາກລັດຖະບານໄທ ຍັງສືບຕໍ່ຢ່າງບໍ່ຢຸດຢັ້ງ ໂດຍຜ່ານການຢ້ຽມຢາມແລກປ່ຽນດ້ານວິຊາການ, ເຂົ້າຮ່ວມບັນດາກອງປະຊຸມ ແລະ ເທສະການສາກົນ, ຝຶກອົບຮົມໄລຍະສັ້ນ, ທຶນການສຶກສາໄລຍະຍາວ ອັນໄດ້ປະກອບສ່ວນເຂົ້າໃນການເສີມຂະຫຍາຍສາຍພົວພັນການຮ່ວມມື, ທັງເປັນການສ້າງຄວາມເຂັ້ມແຂງໃນຂະແໜງການທ່ອງທ່ຽວ.

ສອງຝ່າຍຍັງໄດ້ປຶກສາຫາລື 2 ປະເດັນຄື: ຂໍ້ລິເລີ່ມ Self-drive partnership program ທີ່ຝ່າຍໄທ ສະເໜີຈັດໃຫ້ມີກອງປະຊຸມຫຼາຍຝ່າຍ ຮ່ວມກັບ ກຳປູເຈຍ, ລາວ, ມາເລເຊຍ ແລະ ຫວຽດນາມ.ອີງໃສ່ສະຖິຕິນັກທ່ອງທ່ຽວໄທ ເຂົ້າມາທ່ອງທ່ຽວລາວ ໃນ 11 ເດືອນຂອງປີ 2023 ມີຈຳນວນ 1,2 ລ້ານເທື່ອຄົນ ຖືເປັນອັນດັບໜຶ່ງ ຈາກນັກທ່ອງທ່ຽວທັງໝົດ ທີ່ເຂົ້າມາທ່ຽວ ສປປ ລາວ. ກ່ຽວກັບຂໍ້ລິເລີ່ມ ການສ້າງ MOU ດ້ານການທ່ອງທ່ຽວ ຊຶ່ງປະຈຸບັນສອງຝ່າຍ ແມ່ນປະຕິບັດໄປຕາມຂອບການຮ່ວມມື ຄະນະກຳມະການຮ່ວມມືລາວ-ໄທ (JC) ທີ່ມີກະຊວງ ການຕ່າງປະເທດເປັນກອງ ໂດຍສະເພາະການສືບຕໍ່ລົງນາມບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານການທ່ອງທ່ຽວ ເພື່ອສືບຕໍ່ວຽກງານການຮ່ວມມືດັ່ງກ່າວ. ມອບໃຫ້ວິຊາການຂອງສອງຝ່າຍ ໄດ້ມີການພົບປະແລກປ່ຽນດ້ານເນື້ອໃນ ເພື່ອໃຫ້ມີຄວາມເປັນເອກະພາບກັນ ແລະ ຜ່ານຂະບວນການອະນຸມັດພາຍໃນຂອງຕົນກ່ອນການລົງນາມຮ່ວມກັນ.

แชร์