ລາວ-ອິນໂດເນເຊຍ ປຶກສາຫາລືດ້ານການທ່ອງທ່ຽວ

ໃນວັນທີ 25 ມັງກອນ 2024 ທີ່ນະຄອນຫລວງວຽງຈັນ,ທ່ານນາງ ສວນສະຫວັນ ວິຍະເກດ ລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະທ່ອງທ່ຽວ ສປປ ລາວ ໄດ້ພົບປະ ທ່ານ ຊານເດຍກາ ສາລາຮຸດິນ ອູໂນ ລັດຖະມົນຕີ ກະຊວງເສດຖະກິດ ແລະການທ່ອງທ່ຽວ ແຫ່ງ ສາທາລະນະລັດ ອິນໂດເນເຊຍ ເພື່ອປຶກສາຫາລືຮ່ວມມືດ້ານການທ່ອງທ່ຽວ ລະຫວ່າງ ລາວ-ອິນໂດເນເຊຍ ໃນໂອກາດເຂົ້າຮ່ວມກອງປະຊຸມ ລັດຖະມົນຕີທ່ອງທ່ຽວອາຊຽນ 2024.

ທ່ານນາງ ສວນສະຫວັນ ວິຍະເກດ ກ່າວວ່າ: ສປປ ລາວ ແລະ ອິນໂດເນເຊຍ ໄດ້ມີສາຍພົວພັນມິດຕະພາບ ແລະ ການຮ່ວມມືອັນດີງາມໃນຫລາຍຂົງເຂດ ເຊິ່ງພາຍຫລັງການເສີມສ້າງສາຍພົວພັນທາງການທູດຂອງສອງປະເທດ, ຂອບການຮ່ວມມືສອງຝ່າຍຂອງພວກເຮົາໄດ້ຮັບການເສີມຂະຫຍາຍໃຫ້ກວ້າງຂວາງ ແລະ ເລິກເຊິ່ງຍິ່ງຂຶ້ນ ອັນໄດ້ນໍາເອົາຜົນປະໂຫຍດມາສູ່ປະຊາຊົນສອງຊາດ ແລະ ການພັດທະນາໃນຂົງເຂດພາກພື້ນຂອງພວກເຮົາ ແລະ ຫວັງຢ່າງຍິ່ງວ່າ ທັງສອງກະຊວງ ຈະໄດ້ເຮັດວຽກຮ່ວມກັນ ຢ່າງໃກ້ຊິດດັ່ງທີ່ໄດ້ປຶກສາຫາລືຮ່ວມກັນ ໃນການພົບປະສອງຝ່າຍ ເພື່ອເພີ່ມທະວີຮັດແໜ້ນການຮ່ວມມື ໃນຂະແໜງການທ່ອງທ່ຽວ, ອັນເປັນສ່ວນປະກອບທີ່ສຳຄັນໜຶ່ງ ໃນການສະເຫລີມສະຫລອງມິດຕະພາບ ແລະ ການຮ່ວມມືໃນຂອບອາຊຽນ, ລວມທັງການເປັນປະທານອາຊຽນຂອງ ສປປ ລາວ ໃນປີ 2024 ນີ້.

ໄລຍະຜ່ານມາ ສປປ ລາວ ໄດ້ຮ່ວມມືກັບສະຖານເອກອັກຄະລັດຖະທູດ ອິນໂດເນເຊຍ ປະຈຳ ສປປ ລາວ ແລະ ກະຊວງເສດຖະກິດ ແລະ ການທ່ອງທ່ຽວອິນໂດເນເຊຍ ໄດ້ຈັດກອງປະຊຸມສຳມະນາ ຮ່ວມກັບພາກທຸລະກິດລາວ-ອິນໂດເນເຊຍ, ຈັດກິດຈະກໍາກ່ຽວກັບຄາລະວານລົດຈັກ “Wonderful Indonesia Motorbike Touring (WIMT) 2023” ໃນທ້າຍປີ ທີ່ຜ່ານມາ ເຊິ່ງການຈັດຄາລາວານລົດຄັ້ງນັ້ນ ມີຜູ້ເຂົ້າຮ່ວມທັງໝົດ 34 ທ່ານ, ຈຳນວນລົດຈັກ 25 ຄັນ, ເສັ້ນທາງແມ່ນ ເລີ່ມຈາກນະຄອນຈາກາຕາ ອິນໂດເນເຊຍ-ສິງກະໂປ-ມາເລເຊຍ-ໄທ-ກໍາປູເຈຍ ແລະ ສປປ ລາວ ໃນນັ້ນ ກໍໄດ້ຢ້ຽມຊົມສະຖານທີ່ທ່ອງທ່ຽວຂອງລາວຫລາຍແຫ່ງ.

ສຳລັບສະຖິຕິນັກທ່ອງທ່ຽວອິນໂດເນເຊຍ ເຂົ້າມາທ່ອງທ່ຽວ ສປປ ລາວ ໃນປີ 2023 ແມ່ນມີ 3.092 ເທື່ອຄົນ ເພີ່ມຂຶ້ນ 72% ຖ້າທຽບໃສ່ປີ 2022 ແລະ ສະເໜີລັດຖະບານ 2 ປະເທດ ພິຈາລະນາ ເປີດສາຍການບິນໂດຍຕົງ ລະຫວ່າງແຂວງຫລວງພະບາງ, ສປປ ລາວ ແລະ ບາຫລີ ປະເທດອິນໂດເນເຊຍ, ສະເໜີຝຶກອົບຮົມໃຫ້ຜູ້ບໍລິການຂອງ ສປປ ລາວ ກ່ຽວກັບການປຸງແຕ່ງອາຫານອິນໂດເນເຊຍ ໃຫ້ບັນດາທຸລະກິດ, ສະຖານທີ່ພັກແຮມ ແລະ ຮ້ານອາຫານ ເພື່ອກະກຽມຕ້ອນຮັບນັກທ່ອງທ່ຽວອິນໂດເນເຊຍ ແລະ ຫົວຂໍ້ການຝຶກອົບຮົມດ້ານວິຊາການທ່ອງທ່ຽວກ່ຽວກັບ ການຫັນຜະລິດຕະພັນການທ່ອງທ່ຽວ ໃຫ້ເຊື່ອມໂຍງກັບ ທຸລະກິດອື່ນໆ ເຊິ່ງເປັນຈຸດແຂງຂອງການທ່ອງທ່ຽວ ອິນໂດເນເຊຍ.

ສປປ ລາວ ມີຄວາມຕ້ອງການດຶງດູດນັກທ່ອງທ່ຽວ ຈາກເອີຣົບ ແລະ ອົດສະຕາລີ ທີ່ມາທ່ຽວບາຫລີ ປະເທດອິນໂດເນເຊຍ ໃຫ້ເດີນທາງມາທ່ຽວ ສປປ ລາວ. ຂະນະທີ່ປະເທດອິນໂດເນເຊຍ ກໍມີຄວາມຕ້ອງການດຶງດູດນັກທ່ອງທ່ຽວຈາກ ສປ ຈີນ ທີ່ມາທ່ຽວ ສປປ ລາວ ຕາມເສັ້ນທາງລົດໄຟ ໃຫ້ໄປທ່ຽວປະເທດອິນໂດເນເຊຍ. ດັ່ງນັ້ນ, ພວກເຮົາຄວນປຶກສາຫາລື ໃນການດຶງດູດຕະຫລາດນັກທ່ອງທ່ຽວ ດັ່ງກ່າວໃຫ້ເປັນຮູບປະທຳໃນຕໍ່ໜ້າ.

แชร์