ລັດຖະມົນຕີທ່ອງທ່ຽວອາຊຽນບວກສາມ ຫາລືຫລາຍບັນຫາສຳຄັນ

ກອງປະຊຸມລັດຖະມົນຕີທ່ອງທ່ຽວອາຊຽນບວກສາມ ຄັ້ງທີ 23 (ຈີນ, ຍີ່ປຸ່ນ, ສ ເກົາຫລີ) ພາຍໃຕ້ຫົວຂໍ້ການທ່ອງທ່ຽວທີ່ມີຄຸນນະພາບ ແລະມີຄວາມຮັບຜິດຊອບ ເພື່ອຄວາມຍືນຍົງໃນອານາຄົດຂອງອາຊຽນ ໄດ້ຈັດຂຶ້ນໃນວັນທີ 26 ມັງກອນ 2024, ທີ່ໂຮງແຮມແລນມາກ ນະຄອນຫລວງວຽງຈັນ, ໂດຍການເປັນປະທານຮ່ວມຂອງທ່ານນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະທ່ອງທ່ຽວ (ຖວທ) ແລະ ທ່ານ ຫວາງຊາງ ອຸປະທູດຈີນປະຈໍາລາວ ມີບັນດາລັດຖະມົນຕີທ່ອງທ່ຽວປະເທດສະມາຊິກອາຊຽນ, ຈີນ, ຍີ່ປຸ່ນ, ສ.ເກົາຫລີ ແລະ ກອງເລຂາອາຊຽນເຂົ້າຮ່ວມ.

ທ່ານ ນາງ ສວນສະຫວັນ ວິຍະເກດ ມີຄໍາເຫັນວ່າ: ກອງປະຊຸມໃນຄັ້ງນີ້, ບັນດາລັດຖະມົນຕີທ່ອງທ່ຽວອາຊຽນ ແລະຜູ້ແທນຈາກປະເທດບວກສາມ ໄດ້ພ້ອມກັນປຶກສາຫາລືຫລາຍບັນຫາສຳຄັນໂດຍສະເພາະຄວາມຄືບໜ້າການພົວພັນຮ່ວມມືດ້ານການທ່ອງທ່ຽວລະຫວ່າງບັນດາປະເທດອາຊຽນ ກັບ ສປ ຈີນ, ຍີ່ປຸ່ນ, ສ ເກົາຫລີ ໃນໄລຍະຜ່ານມາ. ພ້ອມທັງ ຮັບຟັງຜົນຂອງກອງປະຊຸມເຈົ້າໜ້າທີອາວຸໂສທ່ອງທ່ຽວອາຊຽນ ບວກສາມ ຄັ້ງທີ 44 ໂດຍສະເພາະ ແມ່ນຜົນຂອງການຈັດຕັ້ງປະຕິບັດງານ ການຮ່ວມມືດ້ານການທ່ອງທ່ຽວອາຊຽນ ບວກ 2021-2025 ແລະ ອື່ນໆ. ພ້ອມນີ້, ກອງປະຊຸມຍັງໄດ້ສະແດງຄວາມຂອບໃຈຕໍ່ສູນອາຊຽນ-ຈີນ (ACC), ສູນອາຊຽນ-ຍີ່ປຸ່ນ (AJC) ແລະ ສູນອາຊຽນ-ສ ເກົາຫລີ (AKC) ທີ່ໄດ້ໃຫ້ການສະໜັບສະໜູນຢ່າງຕໍ່ເນື່ອງ ໃນການເສີມສ້າງ ສາຍພົວພັນລະຫວ່າງປະຊາຊົນ ກັບປະຊາຊົນ ແລະ ຄວາມເຂົ້າໃຈທາງດ້ານວັດທະນະທໍາ ຜ່ານການເຄື່ອນໄຫວຕ່າງໆ. ກອງປະຊຸມຍັງໄດ້ເນັ້ນໜັກເຖິງຄວາມສຳຄັນຂອງການຍົກລະດັບສີມືແຮງງານ ແລະຍົກລະດັບແຮງງານດ້ານການທ່ອງທ່ຽວ ແລະ ການສະໜອງເຄື່ອງມືອັນລໍ້າຄ່າລວມທັງເຕັກໂນໂລຊີດີຈິຕອນເພື່ອໃຫ້ສາມາດປັບຕົວເຂົ້າກັບວິທີການດຳເນີນທຸລະກິດໃໝ່ ຂອງຂະແໜງການທ່ອງທ່ຽວ. ພ້ອມທັງສະແດງຄວາມຂອບໃຈຕໍ່ປະເທດບວກສາມ ທີ່ຈະສືບຕໍ່ໃຫ້ການພັດທະນາທັກສະ ແລະຄວາມຮູ້ຄວາມສາມາດ ຂອງຜູ້ຊ່ຽວຊານດ້ານການທ່ອງທ່ຽວອາຊຽນໂດຍຜ່ານໂຄງການຝຶກອົບຮົມ ແລະກິດຈະກໍາຕ່າງໆ.

ທ່ານລັດຖະມົນຕີກະຊວງ ຖວທ ກ່າວວ່າ: ປີ 2024 ເປັນປີທີ່ມີຄວາມໝາຍສຳຄັນແມ່ນປີແລກປ່ຽນການໄປມາຫາສູ່ຂອງປະຊາຊົນຊຽນ-ຈີນ ເພື່ອຊຸກຍູ້ການຮ່ວມມືຮອບດ້ານ ໂດຍສະເພາະວຽກງານທ່ອງທ່ຽວ, ທັງເປັນປີ ເພື່ອສະເຫລີມສະຫລອງ ຄົບຮອບ 35 ປີ ແຫ່ງການສ້າງຕັ້ງ ສາຍພົວພັນຄູ່ເຈລະຈາອາຊຽນ-ສ.ເກົາຫລີ. ສປປ ລາວ ເຫັນໄດ້ຄວາມສຳຄັນຂອງການຮ່ວມມືດ້ານການທ່ອງທ່ຽວລະຫວ່າງອາຊຽນ ແລະອາຊຽນບວກສາມເພື່ອປະກອບສ່ວນເຂົ້າໃນການຈັດຕັ້ງຜັນຂະຫຍາຍ ວິໄສທັດປະຊາຄົມອາຊຽນ 2025 ແລະ ແຜນແມ່ບົດປະຊາຄົມເສດຖະກິດອາຊຽນ 2025 ລວມທັງແຜນງານການຮ່ວມມືອາຊຽນບວກສາມ 2023-2027. ພ້ອມທັງສະແດງຄວາມຫວັງວ່າກອງປະຊຸມໃນຄັ້ງນີ້ຈະໄດ້ປຶກສາຫາລື ແລະແລກປ່ຽນຄຳຄິດຄຳເຫັນ ເຊິ່ງກັນ ແລະກັນຢ່າງສ້າງສັນ, ກົງໄປກົງມາ ເພື່ອເພີ່ມທະວີການພົວພັນຮ່ວມມືໃນຂົງເຂດວຽກງານທ່ອງທ່ຽວບວກສາມໃຫ້ມີປະສິດທິພາບ ແລະປະສິດທິຜົນຍິ່ງໆຂຶ້ນ.

แชร์