ລັດຖະມົນຕີທ່ອງທ່ຽວອາຊຽນ ປຶກສາຫາລືແຜນຍຸດທະສາດ

ກອງປະຊຸມລັດຖະມົນຕີທ່ອງທ່ຽວອາຊຽນ ຄັ້ງທີ 27 ໄຂຂຶ້ນຢ່າງເປັນທາງການໃນວັນທີ 25 ມັງກອນ 2024 ທີ່ໂຮງແຮມແລນມາກ ແມ່ຂອງລີເວີໄຊ ນະຄອນຫຼວງວຽງຈັນ ໂດຍການເປັນປະທານຂອງທ່ານນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະທ່ອງທ່ຽວ (ຖວທ) ແລະ ທ່ານ ດາໂຕະ ຊິຣີ ທິອອງ ຄິງຊິງ ລັດຖະມົນຕີທ່ອງທ່ຽວສິລະປະ ແລະ ວັດທະນະທຳ ມາເລເຊຍ, ມີບັນດາລັດຖະມົນຕີທ່ອງທ່ຽວອາຊຽນ ແລະເລຂາທິການໃຫຍ່ອາຊຽນ ເຂົ້າຮ່ວມ.

ທ່ານນາງ ສວນສະຫວັນ ວິຍະເກດ ກ່າວວ່າ: ກອງປະຊຸມຄັ້ງນີ້ ໄດ້ປຶກສາຫາລື ແລະຮັບຟັງການລາຍງານຜົນຂອງກອງປະຊຸມເຈົ້າໜ້າທີ່ອາວຸໂສທ່ອງທ່ຽວອາຊຽນ ໂດຍສະເພາະແມ່ນຜົນຂອງການຈັດຕັ້ງແຜນຍຸດທະສາດການທ່ອງທ່ຽວອາຊຽນ 2016-2025 ລວມທັງການລາຍງານຈາກບັນດາອົງການຈັດຕັ້ງສາກົນ, ບັນດາອົງການທີ່ກ່ຽວຂ້ອງກັບອາຊຽນ ແລະ ພາກສ່ວນພາຍນອກອື່ນໆ ໃນການຈັດຕັ້ງກິດ ຈະກຳທີ່ສະໜັບສະໜູນໃຫ້ແກ່ການທ່ອງທ່ຽວອາຊຽນ ໃນໄລຍະຜ່ານມາ ແລະ ແຜນໃນຕໍ່ໜ້າ. ພ້ອມນີ້, ບັນດາທ່ານລັດຖະມົນຕີ ຈະໄດ້ປຶກສາຫາລືຕີລາຄາການຈັດຕັ້ງປະຕິບັດບັນດາກິດຈະກໍາບູລິມະສິດ ພາຍໃຕ້ແຜນຍຸດທະສາດການທ່ອງທ່ຽວອາຊຽນ ສໍາລັບປີ 2016-2025, ບັນດາກິດຈະກໍາບູລິມະສິດ ສໍາລັບປີ 2023-2024 ທີ່ໄດ້ຈັດຕັ້ງປະຕິບັດ ໂດຍ 4 ຄະນະກໍາມະການທ່ອງທ່ຽວອາຊຽນ. ນອກຈາກນີ້, ຍັງຈະໄດ້ປຶກສາຫາລືແລກປ່ຽນທັດສະນະກ່ຽວກັບ ການສ້າງຮ່າງແຜນຍຸດທະສາດທ່ອງທ່ຽວອາຊຽນ ຫລັງປີ 2025, ລວມເຖິງ ການຮ່ວມມືກັບບັນດາປະເທດຄູ່ຮ່ວມເຈລະຈາ, ອົງການທ່ອງທ່ຽວໂລກ ແລະ ຄູ່ຮ່ວມພັດທະນາຕ່າງໆ.

ທ່ານລັດຖະມົນຕີກະຊວງ ຖວທ ກ່າວຕື່ມວ່າ: ການທ່ອງທ່ຽວເປັນພາຫະນະຫລັກທີ່ສຳຄັນໃນການຂັບເຄື່ອນການຂະຫຍາຍຕົວຂອງເສດຖະກິດ, ການພັດທະນາແບບຍືນຍົງ ແລະ ຊຸກຍູ້ການພົວພັນຮ່ວມມືທີ່ແໜ້ນແຟ້ນກໍເພື່ອເຊື່ອມໂຍງເສດຖະກິດໃຫ້ມີຄວາມກົມກຽວ, ນໍາໃຊ້ນະວັດຕະກໍາໃຫ້ມີຄວາມຫລາກຫລາຍ, ການຊຸກຍູ້ສົ່ງເສີມການເຊື່ອມຈອດ ແລະ ການໄປມາຫາສູ່ຂອງປະຊາຊົນ ເຊິ່ງບໍ່ໄດ້ມີການຮ່ວມມືສະເພາະແຕ່ບັນດາປະເທດສະມາຊິກອາຊຽນເທົ່ານັ້ນ, ແຕ່ກໍຍັງມີການຮ່ວມມືກັບຫລາຍປະເທດໃນພາກພື້ນຕື່ມອີກ. ທັງນີ້, ກໍເພື່ອເປັນການປະກອບສ່ວນເຂົ້າໃນການຈັດຕັ້ງປະຕິບັດແຜນຍຸດທະສາດທ່ອງທ່ຽວອາຊຽນ 2016-2025, ແຜນແມ່ບົດເສດຖະ ກິດອາຊຽນ 2025 ແລະວິໄສທັດປະຊາຄົມອາຊຽນ 2025 ໃຫ້ປາກົດຜົນເປັນຈິງຕາມເປົ້າໝາຍລວມຂອງອາຊຽນ.

แชร์