ຈີນ ກາຍເປັນຄູ່ຄ້າສຳຄັນຂອງ ສປປ ລາວ ບັນລຸມູນຄ່າການຄ້າ 2 ສົ້ນໄດ້ເກືອບ 500 ລ້ານໂດລາ

ອີງຕາມຂໍ້ມູນຈາກສູນຂໍ້ມູນຂ່າວສານທາງດ້ານການຄ້າ ຂອງ ສປປ ລາວ ປະຈຳເດືອນ ທັນວາ 2023, ສປ ຈີນ ໄດ້ກາຍເປັນຄູ່ຄ້າສຳຄັນຂອງ ສປປ ລາວ ໂດຍມີມູນຄ່າການຄ້າ 2 ສົ້ນກວ່າ 499 ລ້ານໂດລາ ແບ່ງເປັນ ສົ່ງອອກ 200,3 ລ້ານ ໂດລາ ແລະ ນຳເຂົ້າ 298,7 ລ້ານໂດລາ.

ໂດຍສະຖິຕິ 4 ເດືອນທ້າຍ ປີ 2023 ມູນຄ່າການຄ້າ 2 ສົ້ນ ສປປ ລາວ-ຈີນ ສາມາດບັນລຸໄດ້ 1.384 ລ້ານໂດລາ ແບ່ງເປັນ ເດືອນກັນຍາ 400 ລ້ານໂດລາ, ເດືອນ ຕຸລາ 378 ລ້ານໂດລາ, ເດືອນ ພະຈິກ 448,3 ລ້ານໂດລາ ແລະເດືອນທັນວາ 499 ລ້ານໂດລາ.

ເດືອນທັນວາ ຍັງເປັນເດືອນທຳອິດທີ່ ສປປ ລາວ ນຳເຂົ້າສິນຄ້າຈາກ ສປ ຈີນ ຫຼາຍທີ່ສຸດ ແຊງໜ້າ ປະເທດໄທ . ໂດຍນຳເຂົ້າຈາກຈີນ ມູນຄ່າ 298,7 ລ້ານ ໂດລາ ແລະ ນຳເຂົ້າຈາກໄທ ປະມານ 271,3 ລ້ານໂດລາ.

ໂດຍມູນຄ່າການນໍາເຂົ້າ ແລະສົ່ງອອກສິນຄ້າຂອງ ສປປ ລາວ ປະຈໍາເດືອນ 12 ປີ 2023 ບັນລຸໄດ້ ປະມານ 1.235 ລ້ານໂດລາ ໂດຍໃນນີ້ມີການ ສົ່ງອອກທັງໝົດ ປະມານ 531.3 ລ້ານໂດລາ ແລະ ນຳເຂົ້າທັງໝົດ ປະມານ 703,6 ລ້ານໂດລາ ເສຍດຸນການຄ້າປະມານ 172,5 ລ້ານໂດລາ ບໍ່ນັບລວມການຂາຍໄຟຟ້າ.

ປະເທດທີ່ ສປປ ລາວ ສົ່ງອອກຫຼາຍ 05 ອັນດັບ ໄດ້ແກ່ ຈີນ ປະມານ 200.3 ລ້ານ ໂດລາ, ຫວຽດນາມ 118.1 ລ້ານ ໂດລາ, ໄທ 88.2 ລ້ານໂດລາ, ອົດສະຕາລີ 37.9 ລ້ານ ໂດລາ ແລະອີນເດຍ ປະມານ 18.6 ລ້ານ ໂດລາ.

ສ່ວນ ປະເທດ ທີ່ ສປປ ລາວ ນໍາເຂົ້າຫຼາຍ 05 ອັນດັບ ໄດ້ແກ່ ຈີນ 298.7 ລ້ານ ໂດລາ, ໄທ ປະມານ 271.3 ລ້ານ ໂດລາ, ຫວຽດນາມ 34 ລ້ານ ໂດລາ, ສະຫະລັດອາເມລິກາ 24.1 ລ້ານ ໂດລາ ແລະ ຍີ່ປຸ່ນ ປະມານ 24.1 ລ້ານ ໂດລາ.

ໂດຍໃນນີ້, ສິນຄ້າສົ່ງອອກຫຼັກ 5 ອັນດັບ ປະກອບມີ: ຄໍາປະສົມ, ຄຳແທ່ງ 72.4 ລ້ານ ໂດລາ, ຢາງພາລາ 44.6 ລ້ານໂດລາ, ແຮ່ທອງ 38,5 ລ້ານໂດລາ, ເຈ້ຍ ແລະ ເຄື່ອງທີ່ເຮັດດ້ວຍເຈ້ຍ 37,2 ລ້ານໂດລາ, ມັນຕົ້ນ 34.8 ລ້ານໂດລາ.

ສິນຄ້ານໍາເຂົ້າຫຼັກ 5 ອັນດັບ ປະກອບມີ: ກາຊວນ 94.1 ລ້ານໂດລາສະຫະລັດ, ອຸປະກອນກົນຈັກ (ນອກຈາກເຄື່ອງກົນຈັກພາຫະນະ) 78.1 ລ້ານໂດລາ, ພາຫະນະທາງບົກ (ນອກຈາກລົດຈັກ,ລົດໄຖ) 69.2 ລ້ານໂດລາ, ເຄື່ອງໄຟຟ້າ ແລະ ອຸປະກອນໄຟຟ້າ 36 ລ້ານໂດລາ, ເຫຼັກ ແລະເຄື່ອງທີ່ເຮັດດ້ວຍເຫຼັກ, ເຫຼັກກ້າ 33 ລ້ານໂດລາ.
ທີ່ມາ: ວຽງຈັທາຍ

แชร์