ລາວໂທລະຄົມ ສະໜອງອິນເຕີເນັດ 5G ໃນກອງປະຊຸມລັດຖະມົນຕີທ່ອງທ່ຽວອາຊຽນ

ກອງປະຊຸມລັດຖະມົນຕີທ່ອງທ່ຽວອາຊຽນ 2024 ທີ່ ສປປ ລາວ ເປັນເຈົ້າພາບ, ບໍລິສັດ ລາວໂທລະຄົມ ມະຫາຊົນ ໄດ້ສະໜອງອິນເຕີເນັດຄວາມໄວສູງ ແພັກແກັດຊິມໃຈດີ ສຳລັບນັກທ່ອງທ່ຽວ ໃຫ້ບັນດານັກທ່ອງທ່ຽວທີ່ເຂົ້າຮ່ວມກອງປະຊຸມ ໄດ້ນໍາໃຊ້ເຕັກໂນໂລຊີຂອງລາວໂທລະຄົມມະນາຄົມເພື່ອຄວາມສະດວກສະບາຍໂດຍເລີ່ມແຕ່ວັນທີ 22-27 ມັງກອນ 2024 ນີ້.

ທ່ານ ເພັດສະຫວັນ ເຄື່ອນວິໄລ ຮອງຫົວໜ້າພະແນກຝ່າຍການຕະຫຼາດ-ການຂາຍ ບໍລິສັດ ລາວໂທລະຄົມມະຫາຊົນໃຫ້ສຳພາດວ່າໃນໂອກາດເຂົ້າຮ່ວມງານງານວາງສະແດງຜະລິດຕະພັນທ່ອງທ່ຽວອາຊຽນ 2024 ວ່າ: ບໍລິສັດລາວໂທລະຄົມ ມະນາຄົມ ມະຫາຊົນ ສະແດງຄວາມຂອບໃຈຍັງກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວ ທີ່ເຊື່ອໝັ້ນ ແລະ ໃຫ້ໂອກາດບໍລິສັດຂອງພວກເຮົາໄດ້ໃຫ້ບໍລິການທາງດ້ານເຕັກໂນໂລຊີ ອິນເຕີເນັດຄວາມໄວສູງ ແລະ ການສະໜອງໝາຍເລກໂທລະສັບ “Jai Dee SIM” ແມ່ນຊິມນັກທ່ອງທ່ຽວທີ່ຮອງຮັບ 5G ອິນເຕີເນັດຄວາມໄວສູງ ເພື່ອອຳນວຍຄວາມສະດວກໃນການໃຊ້ງານຂອງບັນດາແຂກເຂົ້າຮ່ວມພາຍໃນງານ, ໃນນັ້ນ ບໍລິສັດ ໄດ້ສະໜອງອິນເຕີເນັດຢູ່ 3 ຈຸດຄື: ຫ້ອງປະຊຸມໂຮງແຮມແລນມາກແມ່ຂອງລີເວີໄຊ, ໂຮງແຮມດອນຈັນພາເລດ ແລະ ສູນການຄ້າລາວ-ໄອເຕັກ.

ນອກຈາກນີ້ລາວໂທລະຄົມໄດ້ນຳເອົາດ້ານເຕັກໂນໂລຊີໃໝ່ໆເຊັ່ນ: ນະວັດຕະກຳທີ່ບິນສຳຫຼວດເທິງອາກາດ (Drone), ນະວັດຕະກຳເຕັກໂນໂລຊີທີ່ນຳໃຊ້ເຂົ້າໃນວຽກງານກະສິກຳ (IFarm Solutions), ແອັບພິເຄຊັ່ນກະເປົາເທິງມືຖື e-wallet (M-MoneyX) ທີ່ໃຊ້ຊຳລະໂອນຈ່າຍສິນຄ້າ ແລະບໍລິການຂອງລາວໂທລະຄົມທີ່ຮອງຮັບລູກຄ້າທັງພາຍໃນ ແລະຕ່າງປະເທດ, Smart Rewards ແອັບພິເຄຊັ່ນທີ່ສະສົມຄະແນນ ແລະເອົາຄະແນນແລກສິດທິພິເສດກັບຮ້ານຄ້າຕ່າງໆ, (VR) ນະວັດຕະກຳທີ່ຈຳລອງພາບ, ສະຖານທີ່ສະເໝືອນຈິງ.

ລາວໂທລະຄົມ ຍຶດໝັ້ນໃນການສະໜັບ ສະໜູນວຽກງານແຜນຍຸດທະສາດການພັດທະນາປະເທດຊາດໃນຕໍ່ໜ້າໃຫ້ທັນສະໄໝໃນຍຸກດິຈິຕອນ ເເລະພ້ອມທັງປະຕິບັດນະໂຍບາຍຂອງພາກລັດໃຫ້ສອດຄ່ອງເເນວທາງການທ່ອງທ່ຽວປີ 2024 ພາຍໃຕ້ຫົວຂໍ້: ການທ່ອງທ່ຽວທີ່ມີຄຸນນະພາບ ເເລະຄວາມຮັບຜິດຊອບເພື່ອຄວາມຍືນຍົງຂອງອາຊຽນ “Quality and Responsible Tourism – Sustaining ASEAN Future”.

แชร์