ເຊກອງ ເປີດປີທ່ອງທ່ຽວ 2024 ພາຍໃຕ້ຄໍາຂວັນ ທ່ອງທ່ຽວກັງຫັນລົມ ຊົມທໍາມະຊາດ

ໃນວັນທີ 24 ມັງກອນທີ່ຜ່ານມາ ແຂວງເຊກອງ ຈັດພິທີເປີດປີທ່ອງທ່ຽວລາວ 2024 ແລະບຸນນະມັດສະການເສົາຫຼັກເມືອງບັນດາເຜົ່າ ແລະ ອະນຸສາວະລີອົງແກ້ວ ທີ່ເດີ່ນສວນເສົາຫຼັກເມືອງ ໂດຍການເປັນປະທານຂອງທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ, ມີທ່ານ ວັນສີ ກົວມົວ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ), ມີທ່ານເຈົ້າແຂວງ-ຮອງເຈົ້າແຂວງສະຫວັນນະເຂດ, ສາລະວັນ, ຈໍາປາສັກ, ອັດຕະປື, ການນໍາ-ອະດີດການນໍາ ແລະ ແຂກຖືກເຊີນເຂົ້າຮ່ວມ.

ໃນໂອກາດນີ້, ທ່ານ ຄໍາສອນ ກອນເຍີ ຮອງເຈົ້າແຂວງເຊກອງ ປະທານຄະນະຊີ້ນໍາ ຄະນະຮັບຜິດຊອບກະກຽມເປີດປີທ່ອງທ່ຽວລາວ 2024 ຂັ້ນແຂວງ ໄດ້ລາຍງານໃຫ້ຮູ້ວ່າ: ພິທີເປີດປີທ່ອງທ່ຽວລາວທີ່ແຂວງເຊກອງໄດ້ຈັດຂຶ້ນພ້ອມກັບງານບຸນນະມັດສະການເສົາຫຼັກເມືອງບັນດາເຜົ່າ ແລະ ອະນຸສາວະລີອົງແກ້ວ ຊຶ່ງໄດ້ກໍານົດຄໍາຂວັນ: “ ທ່ອງທ່ຽວກັງຫັນລົມ ຊົມທໍາມະຊາດ ນໍ້າຕົກຕາດ ອາກາດສົດໃສ ໄປທ່ຽວຊົມວັດທະນະທໍາເຜົ່າອັນລໍ່າເລີດສິ່ງປະເສີດໂສມດາກຈຶງສູນລວມເປັນໜຶ່ງເສົາຫຼັກເມືອງ ລືເຮືອງສຽງແຄນ ແດນວິລະຊົນ ” ໂດຍໄດ້ກໍານົດເອົາ 6 ກິດຈະກໍາຫຼັກຄື: ບຸນຊ່ວງເຮືອເມືອງລະມາມ, ບຸນສະຫຼອງຜົນສໍາເລັດຂອງເຜົ່າກະຕູບ້ານກັນດອນໃໝ່ເມືອງທ່າແຕງ, ບຸນຊ່ວງເຮືອ-ແພເມືອງດາກຈຶງ, ບຸນພາເຂົ້າໂດຍສານບ້ານຈະແຣະເມືອງກະລຶມ ແລະສະເຫຼີມສະຫຼອງວັນສ້າງ ຕັ້ງແຂວງເຊກອງ ຄົບຮອບ 40 ປີ ເພື່ອຮອງຮັບນັກທ່ອງທ່ຽວ ແລະສ້າງຂະບວນການໃຫ້ຟົດຟື້ນ.

ທົ່ວແຂວງມີແຫຼ່ງທ່ອງທ່ຽວທາງດ້ານປະຫວັດສາດ 9 ແຫ່ງ, ທຳມະຊາດ 22 ແຫ່ງ ແລະວັດທະນະທຳ 7 ແຫ່ງ. ພ້ອມນີ້,ຍັງມີແຫຼ່ງທ່ອງທ່ຽວທາງດ້ານກະສິກໍາ, ອຸດສາຫະກໍາ, ໂຮງແຮມ, ເຮືອນພັກ, ຮ້ານອາຫານ ແລະສິ່ງອຳນວຍຄວາມສະດວກດ້ານຕ່າງໆ ໃນການຮອງຮັບນັກທ່ອງທ່ຽວທີ່ຈະມາທ່ຽວຊົມແຂວງເຊກອງ.

ໃນໂອກາດນີ້, ທ່ານ ເຫຼັກໄຫຼ ສີວິໄລ ໄດ້ມີຄໍາເຫັນວ່າ: ພິທີເປີດປີທ່ອງທ່ຽວລາວທີ່ແຂວງເຊກອງຄັ້ງນີ້ ຖືເປັນຄັ້ງທີ 4 ຊຶ່ງເປັນເຫດການທີ່ສໍາຄັນ ເພື່ອສະແດງໃຫ້ເຫັນວ່າ ປະຊາຊົນບັນດາເຜົ່າຊາວແຂວງເຊກອງ ໄດ້ມີຄວາມສາມັກຄີ ແລະ ຫ້າງຫາກະກຽມການເປັນເຈົ້າພາບທີ່ດີ ເພື່ອຕ້ອນຮັບນັກທ່ອງທ່ຽວທີ່ມາຈາກທົ່ວທຸກມູນໂລກ ພ້ອມທັງເປັນການເປີດກວ້າງການຮ່ວມມື, ການເຊື່ອມໂຍງພາກພື້ນ ແລະ ສາກົນ ເພື່ອແນໃສ່ດຶງດູດການລົງທຶນ, ດຶງດູດນັກທ່ອງທ່ຽວ ຍູ້ແຮງການພັດທະນາເສດຖະກິດ-ສັງຄົມ, ສ້າງອາຊີບ-ສ້າງວຽກເຮັດງານທໍາ ແລະ ສ້າງລາຍໄດ້ໃຫ້ປະຊາຊົນ. ພ້ອມນັ້ນ, ການຈັດງານບຸນນະມັດສະການເສົາຫຼັກເມືອງບັນດາເຜົ່າ ແລະ ອະນຸສາ ວະລີອົງແກ້ວ ຊຶ່ງນອກຈາກເປັນການສົ່ງເສີມການທ່ອງທ່ຽວແລ້ວ, ຍັງເປັນການໂຄສະນາ, ການອະນຸລັກປົກປັກຮັກສາ ແລະສົ່ງເສີມວັດທະນະທໍາ, ຮີດຄອງປະເພນີອັນດີງາມຂອງຊາດ, ຂອງປະຊາຊົນບັນດາເຜົ່າໃຫ້ຊາວໂລກໄດ້ຮັບຮູ້ ແລະ ຢູ່ຄູ່ກັບປະຊາຊົນແຂວງເຊກອງຕະຫຼອດໄປ. ສະນັ້ນ, ໃນປີທ່ອງທ່ຽວລາວ 2024 ຂໍເຊີນ ຊວນປະຊາຊົນຊາວແຂວງເຊກອງເຂົ້າຮ່ວມການຜະລິດ, ການສະໜອງ ແລະການບໍລິການດ້ານຕ່າງໆດ້ວຍຮອຍຍິ້ມ, ຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ຄວາມສະອາດສວຍງາມໃນສະຖານທີ່ບໍລິການຕ່າງໆ ເພື່ອສ້າງຄວາມປະທັບໃຈໃຫ້ແກ່ນັກທ່ອງທ່ຽວມາເຫັນເຊກອງແລ້ວ ຢາກກັບມາອີກ.
ທີ່ມາ: ປະຊາຊົນ

แชร์