ລາວ-ອົງການທ່ອງທ່ຽວໂລກ ພົບປະກັບການຮ່ວມມື

ກອງປະຊຸມພົບປະກັບກ່ຽວກັບການຮ່ວມມືດ້ານການທ່ອງທ່ຽວລາວ ແລະອົງການທ່ອງທ່ຽວໂລກໄດ້ຈັດຂຶ້ນໃນວັນທີ 24 ມັງກອນ 2024 ທີ່ນະຄອນຫລວງວຽງຈັນ, ລະຫວ່າງທ່ານນາງ ສວນສະຫວັນ ວິຍະເກດ ລັດຖະມົນຕີ ກະຊວງຖະແຫລງຂ່າວ, ວັດຖະນະທຳ ແລະທ່ອງທ່ຽວ ແລະທ່ານ ແຮລີຫວັງ ຫົວໜ້າປະຈຳພາກພື້ນອາຊີປາຊີຟິກ, ອົງການທ່ອງທ່ຽວໂລກ.

ທ່ານນາງ ສວນສະຫວັນ ວິຍະເກດ ກ່າວວ່າ: ສປປ ລາວ ໄດ້ເປັນເຈົ້າການຮ່ວມກັບ ອົງການທ່ອງທ່ຽວໂລກຈັດສໍາມະນາສຳລັບບັນດາປະເທດອະນຸພາກພື້ນລຸ່ມແມ່ນໍ້າຂອງ ຢູ່ແຂວງຈຳປາສັກ ໃນລະຫວ່າງວັນທີ 19-21 ກຸມພາ 2019 ພາຍໃຕ້ຫົວຂໍ້: “ການພັດທະນາການທ່ອງທ່ຽວແບບຍືນຍົງ ແລະການປົກປັກຮັກສາຊິວະນາໆພັນ” ຊຶ່ງມີຜູ້ເຂົ້ຮ່ວມຈາກປະເທດ ກໍາປູເຈຍ, ລາວ, ມຽນມາ, ໄທ, ຫວຽດນາມ ແລະ ຈີນ. ໃນປີ 2020 ອົງການທ່ອງທ່ຽວໂລກໄດ້ສືບຕໍ່ໃຫ້ການສະໜັບສະໜູນບັນດາປະເທດສະມາຊິກພາກພື້ນອາຊຽນ ແລະສາກົນ ຈັດຕັ້ງກອງປະຊຸມ, ສໍາມະນາ, ຝຶກອົບຮົມ ແລະແລກປ່ຽນບົດຮຽນ ພາຍໃຕ້ຫົວຂໍ້ຕ່າງໆ ເຊັ່ນ: ນະໂຍບາຍດ້ານການທ່ອງທ່ຽວ; ການພັດທະນາການທ່ອງທ່ຽວໃນເຂດຊົນນະບົດ; ການທ່ອງທ່ຽວແບບອະນຸລັກ ແລະການທ່ອງທ່ຽວໃນເຂດຊົນນະບົດ; ການທ່ອງທ່ຽວ ແລະ ເສດຖະກິດຂອງໂລກ ແນໃສ່ການປະກອບສ່ວນເຂົ້າໃນການພັດທະນາວຽກງານການທ່ອງທ່ຽວແບບຍືນຍົງຂອງອົງການສະຫະປະຊາຊາດທີ່ມີເປົ້າໝາຍຄື: ສົ່ງເສີມການຂະຫຍາຍຕົວທາງດ້ານເສດຖະກິດທີ່ຕໍ່ເນື່ອງທົ່ວເຖິງ ແລະຍືນຍົງ, ການມີວຽກເຮັດງານທຳທີ່ມີປະສິດທິຜົນ ແລະເຕັມສ່ວນ ແລະວຽກງານທີ່ມີກຽດສຳລັບໝົດທຸກຄົນ, ຮັບປະກັນຮູບແບບການອຸປະໂພກ-ບໍລິໂພກ ແລະການຜະລິດໃຫ້ມີຄວາມຍືນຍົງ, ອະນຸລັກ ແລະຊົມໃຊ້ມະຫາສະໝຸດ, ທະເລ ແລະຊັບພະຍາກອນທາງທະເລຢ່າງຍືນຍົງເພື່ອການພັດທະນາແບບຍືນຍົງ.

ຈາກນັ້ນກອງເລຂາອາຊຽນ ສະເໜີໃຫ້ ສປປ ລາວ ໃນນາມເປັນປະທານກອງປະຊຸມລັດຖະມົນຕີທ່ອງທ່ຽວອາຊຽນ ໃນຄັ້ງນີ້, ເພື່ອຂົນຂວາຍການຮ່ວມມືຈາກອົງການທ່ອງທ່ຽວໂລກ ຄື: ຂໍຝຶກອົບຮົມການເກັບກຳຂໍ້ມູນສະຖິຕິນັກທ່ອງທ່ຽວພາຍໃນໃຫ້ແກ່ບັນດາປະເທດສະມາຊິກ UNWTO ສໍາລັບປະເທດ CLMV ຫລື ASEAN, ຝຶກອົບຮົມກ່ຽວກັບການພັດທະນາການທ່ອງທ່ຽວ ແລະການຫັນເປັນທັນສະໄໝເພື່ອການທ່ອງທ່ຽວທີ່ຍືນຍົງໃນໄລຍະ ສປປ ລາວ ເປັນປະທານອາຊຽນ ແລະເປີດປີທ່ອງທ່ຽວລາວ 2024.

ສໍາລັບສະຖິຕິ,ນັກທ່ອງທ່ຽວສາກົນເຂົ້າມາທ່ອງທ່ຽວ ສປປ ລາວ ໃນ 11 ເດືອນ ປີ 2023 ມີ 3.088.323 ເທື່ອຄົນ. ໃນນັ້ນ,ພາກພື້ນອາຊຽນມີ 2.036.805 ເທື່ອຄົນ, ພາກພື້ນອາຊີປາຊີຟິກ 784.80 ເທື່ອຄົນ, ພາກພື້ນເອີຣົບ 179.137 ເທື່ອຄົນ, ພາກພື້ນອາເມລິກາ 76.780 ເທື່ອຄົນ, ພາກພື້ນອາຝຣິກາ ແລະ ຕາເວັນອອກກາງມີ 10.797 ເທື່ອຄົນ.

แชร์