ນັກວິຊາການ-ຊ່ຽວຊານ ສຳມະນາການທ່ອງທ່ຽວອາຊຽນ

ກອງປະຊຸມສຳມະນາການທ່ອງທ່ຽວອາຊຽນ (ATC) ຈັດຂຶ້ນໃນລະຫວ່າງວັນທີ 25-26 ມັງກອນ 2024 ທີ່ສູນການຄ້າ ລາວ-ໄອເຕັກ, ນະຄອນຫລວງວຽງຈັນ ໂດຍມີທ່ານ ໂພສີ ແກ້ວມະນີວົງ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະທ່ອງທ່ຽວ (ຖວທ), ພ້ອມດ້ວຍບັນດານັກວິຊາການ, ຊ່ຽວຊານດ້ານການທ່ອງທ່ຽວຈາກຫຼາຍປະເທດເຂົ້າຮ່ວມ.

ທ່ານ ໂພສີ ແກ້ວມະນີວົງ ກ່າວວ່າ: ກອງປະຊຸມສໍາມະນາດ້ານການທ່ອງທ່ຽວອາຊຽນເປັນກອງປະຊຸມທີ່ມີຄວາມໝາຍສໍາຄັນຫຼາຍສໍາລັບວຽກງານການທ່ອງທ່ຽວ ແລະ ທັງເປັນການເປີດເວທີໃຫ້ບັນດານັກວິຊາການ, ຜູ້ຊ່ຽວຊານດ້ານການທ່ອງທ່ຽວຈາກທຸກມູມໂລກມີໂອກາດພົບປະແລກປ່ຽນຜົນສໍາເລັດ ແລະແນວຄວາມຄິດໃໝ່ໆ ໃນການຮ່ວມມື ແລະພັດທະນາການທ່ອງທ່ຽວໃນພາກພື້ນ ແລະສາກົນ. ໂດຍການສຳມະນາຄັ້ງນີ້, ມີຫລາກຫລາຍຫົວຂໍ້ທີ່ສຳຄັນ ແລະໜ້າສົນໃຈ ເຊິ່ງຜູ້ເຂົ້າຮ່ວມຈະໄດ້ພ້ອມກັນສົນທະນາ ແລະ ປືກສາຫາລື, ແລກປ່ຽນບົດຮຽນ ໃນຫົວຂໍ້ຕ່າງໆ ເປັນຕົ້ນ ບັນຫາຄວາມຍືນຍົງ ຂອງການພັດທະນາການທ່ອງທ່ຽວ, ການນໍາໃຊ້ສັງຄົມອອນລາຍ ເພື່ອໂຄສະນາການທ່ອງທ່ຽວ, ການນໍາໃຊ້ທ່າແຮງຂອງການທ່ອງທ່ຽວແບບຜະຈົນໄພເພື່ອສົ່ງເສີມການທ່ອງທ່ຽວແບບຍືນຍົງ. ນອກນັ້ນ, ຍັງຈະໄດ້ແລກປ່ຽນບົດຮຽນກ່ຽວກັບການສ້າງປະສົບການທີ່ເປັນເອກະລັກ ຂອງບັນດາຈຸດໝາຍປາຍທາງການທ່ອງທ່ຽວໃນຂົງເຂດອາຊີຕາເວັນອອກສ່ຽງໃຕ້ຈາກຜູ້ປະກອບການທີ່ປະສົບຜົນສຳເລັດດ້ານການທ່ອງທ່ຽວທັງພາຍໃນ ແລະພາກພື້ນ, ຈະໄດ້ພ້ອມກັນຮຽນຮູ້ກ່ຽວກັບ ຄວາມຕ້ອງການຂອງຕະຫລາດທ່ອງທ່ຽວຈີນເຊິ່ງຖືເປັນຕະຫລາດສຳຄັນ ຂອງພາກພື້ນອາຊີຕາ ເວັນອອກສ່ຽງໃຕ້.

ນອກຈາກນີ້, ບັນດາພາກທຸລະກິດໃນຂະແໜງການທ່ອງທ່ຽວຂອງ ສປປ ລາວ ຈະໄດ້ແລກປ່ຽນບົດຮຽນກັບບັນດາຜູ້ແທນກ່ຽວກັບການດຳເນີນທຸລະກິດການທ່ອງທ່ຽວ ແບບປະຊາຊົນມີສ່ວນຮ່ວມ ແລະ ສົນທະນາກ່ຽວກັບວິທີການບອກເລົ່າເລື່ອງລາວກ່ຽວກັບ ຈຸດໝາຍປາຍທາງການທ່ອງທ່ຽວ ເຊັ່ນ: ການເຊື່ອມໂຍງສະຖານທີ່ທ່ອງທ່ຽວກັບປະຫວັດສາດ, ບອກເລົ່າເລື່ອງລາວ ແລະຄວາມເຊື່ອຊື່ງຈະເປັນການເພີ່ມມູນຄ່າ ໃຫ້ກັບຈຸດໝາຍປາຍທາງການທ່ອງທ່ຽວນັ້ນຜ່ານເລື່ອງລາວປະຫວັດຄວາມເປັນມາ.

ໂອກາດນີ້, ທ່ານຮອງລັດຖະມົນຕີກະຊວງ ຖວທ ຍັງສະແດງຄວາມເຊື້ອໝັ້ນວ່າ: ຜົນຂອງການສົນທະນາແລກປ່ຽນຄຳຄິດຄຳເຫັນໃນແຕ່ລະຫົວຂໍ້ຈະນໍາໄປສູ່ການຮ່ວມມືກັນໃນການກໍານົດທິດທາງ,ແຜນການ, ແຜນງານ ແລະຜັນຂະຫຍາຍເປັນກິດຈະກໍາ ຫລືໂຄງການພັດທະນາຢ່າງລະອຽດເພື່ອສືບຕໍ່ພັດທະນາການທ່ອງທ່ຽວໃນຂົງເຂດອາຊຽນ ແລະ ໃນໂລກໃຫ້ມີການຂະຫຍາຍຕົວຂຶ້ນເລື້ອຍໆ. ພ້ອມທັງຖືໂອກາດນີ້, ເຊີນຊວນແຂກທີ່ເຂົ້າຮ່ວມງານຍາດເວລາທ່ຽວຊົມສະຖານທີ່ທ່ອງທ່ຽວທີ່ສຳຄັນພາຍໃນນະຄອນຫລວງວຽງຈັນ ແລະສະຖານທີ່ອຶ່ນໆໃນ ສປປ ລາວ, ຊີມອາຫານລາວ, ແລະຊື້ຂອງຝາກກັບຄືນເມືອບ້ານ, ທັງເປັນການເກັບກ່ຽວປະສົບການໂຄສະນາການທ່ອງ ທ່ຽວຂອງ ສປປ ລາວ ໃຫ້ກວ້າງຂວາງຂຶ້ນ.

แชร์