3 ຝ່າຍ ບັນລຸການຮ່ວມມືພັດທະນາຄົນດ້ານຫຼັກຊັບ

ວັນທີ 23 ມີນາ ທີ່ອາຄານຕະຫຼາດຫຼັກຊັບ (ຕລຊລ); ຕລຊລ ຮ່ວມກັບມະຫາວິທະຍາໄລ ສຸພານຸວົງ ສປປ ລາວ ແລະສູນການຄົ້ນຄວ້າມະຫາວິທະຍາໄລໂຊ ສ. ເກົາຫຼີ ໄດ້ບັນລຸ ແລະເຊັນບົດບັນທຶກການປຶກສາ ຫາລືຮ່ວມກັນ 3 ຝ່າຍ ແນໃສ່ຊຸກຍູ້ການພັດທະນາຊັບພະຍາກອນມະນຸດ.

ການເຊັນບົດບັນທຶກການປຶກສາຫາລືຄັ້ງນີ້ໂດຍມີທ່ານ ຢາງແທໂກ ຮອງຜູ້ອຳນວຍການໃຫຍ່ ຕລຊລ; ທ່ານ ວົງປະສິດ ຈັນທະຄູນ ຮອງຄະນະບໍດີ ມະຫາວິທະຍາໄລສຸພາ ນຸວົງ ແລະ ທ່ານ ຊວິນ ຈອງ ຊໍວ ຜູ້ອຳນວຍ ການສູນການຄົ້ນຄວ້າ ມະຫາວິທະຍາ ໄລໂຊ ສ. ເກົາຫຼີ ໂດຍການເຂົ້າຮ່ວມເປັນສັກຂີພິຍານຂອງພະນັກງານ 3 ພາກສ່ວນ ໂດຍເນື້ອໃນຫຼັກໆກໍ່ແມ່ນຊຸກຍູ້ການພັດທະນາຊັບພະຍາກອນມະນຸດເປັນຕົ້ນແມ່ນການສົ່ງເສີມໂອກາດໃນການເຂົ້າເຝິກງານທີ່ ຕລຊລ, ການຈັດສໍາມະນາໃຫ້ແກ່ນັກສຶກສາມະຫາວິທະ ຍາໄລ ສຸພານຸວົງ, ສໍາລັບການຮ່ວມມື ລະ ຫວ່າງ ມະຫາວິທະຍາໄລສຸພານຸວົງ ສປປ ລາວ, ຕລຊລ ແລະສູນການຄົ້ນຄວ້າ ມະຫາວິທະຍາໄລໂຊ ສ.ເກົາຫຼີ ແນໃສ່ການພັດທະນາຫຼັກສູດ, ສະໜອງສື່ການຮຽນການສອນ, ການຈັດເຝິກອົບຮົມ, ເປີດໂອກາດໃຫ້ນັກສຶກສາມີໂອກາດໄດ້ໄປແລກປ່ຽນບົດຮຽນເພີ່ມຕື່ມໃນອະນາຄົດ.

ຖືວ່າ: ການເຊັນບົດບັນທຶກການປຶກສາຫາລືຮ່ວມກັນໃນເທື່ອນີ້ເປັນນິມິດໝາຍທີ່ດີຂອງ ທັງ 3 ຝ່າຍ ໂດຍສະເພາະນັກສຶກສາລາວທີ່ຈະໄດ້ຮຽນຮູ້ຊຶ່ງຈະໄດ້ຖືກສ້າງໃຫ້ກາຍເປັນຊັບພະຍາກອນມະນຸດເຂົ້າສູ່ຕະຫຼາດທຶນຢ່າງມືອາຊີບເພາະຕະຫຼາດຫຼັກຊັບ ສ.ເກົາຫຼີ ກໍ່ນອນຢູ່ໃນລະດັບຕົ້ນໆຂອງຕະຫຼາດທຶນສາກົນ.

แชร์