ສທຍລ ແລກປ່ຽນບົດຮຽນກັບນັກທຸລະກິດຍິງພາກກາງ ແລະ ພາກໃຕ້

 ເພື່ອເປັນການກະກຽມເປີດກອງປະຊຸມໃຫຍ່ຂອງນັກທຸລະກິດແມ່ຍິງທົ່ວປະເທດປີ 2020 ທັງເປັນການສ້າງເງື່ອນໄຂໃຫ້ມີການຊຸກຍູ້ຊ່ວຍເຫຼືອ ແລະ ປ່ຽນປະສົບການດ້ານທຸລະກິດນຳກັນ, ສະມາຄົມນັກທຸລະກິດແມ່ຍິງລາວ (ສທຍລ) ຈິ່ງໄດ້ຈັດຕັ້ງການລົງເຄື່ອນໄຫວພົບປະແລກປ່ຽນບົດຮຽນລະຫວ່າງ ສທຍລ ແລະນັກທຸລະກິດແມ່ຍິງ 6 ແຂວງພາກກາງ ແລະພາກໃຕ້ຂຶ້ນໃນວັນທີ 4-5 ເມສາ ທີ່ແຂວງຈຳປາສັກ, ໂດຍພາຍໃຕ້ການຊີ້ນຳນຳພາ ແລະ ເຂົ້າຮ່ວມຂອງ ທ່ານ ນາງ ນາລີ ສີສຸລິດ ພັນລະຍາທ່ານນາຍົກລັດຖະມົນຕີແຫ່ງ ສປປ ລາວ, ພ້ອມນັ້ນຍັງມີປະທານສະມາຄົມ ແລະສະມາຊິກຂອງສະມາຄົມເຂົ້າຮ່ວມ.

 ສຳລັບການລົງເຄື່ອນໄຫວໃນຄັ້ງນີ້ແມ່ນໄດ້ເລີ່ມຈາກການລົງຢ້ຽມຢາມກິດຈະການຂອງນັກທຸລະກິດຕົວແບບດີເດັ່ນຂອງນັກທຸລະກິດຍິງແຂວງຈຳປາສັກເປັນຕົ້ນແມ່ນຢ້ຽມຢາມສວນກາເຟຫຼັກ 48 ເມືອງປາກຊ່ອງຂອງ ທ່ານ ນາງ ເຫຼື້ອງລິດດັງ ຢູ່ຫ້ວຍໝາກຈັນ, ເຂົ້າຢ້ຽມຢາມໂຮງງານຜະລິດກາເຟຫຼັກ 26 ປາກເຊ ແລະ ສະຖານທີ່ທ້ອງທ່ຽວຕາດເຢືອງ, ຢ້ຽມຊົມສູນສະຫະກອນຫັດຖະກຳດີເດັ່ນຂອງສະມາຊິກທຸລະກິດຍິງແຂວງ ແລະ ເຂົ້າຊົມສູນຊັບພະສິນຄ້າທີ່ທັນສະ ໄໝ, ຊຶ່ງເປັນກິດຈະກຳຂອງປະທານ ສທຍລ ຄົນໃໝ່ກໍຄືກຸ່ມບໍລິສັດຕັງຈະເລີນໂດຍຈຸດປະສົງແມ່ນເພື່ອໃຫ້ນັກທຸລະກິດມີການຊຸກຍູ້ຊ່ວຍເຫຼືອເຊິ່ງກັນ ແລະກັນ, ສ້າງຄວາມຊິນເຄີຍໃຫ້ຜູ້ສືບທອດທີ່ໜຸ່ມນ້ອຍໄດ້ຮູ້ຈັກ, ເຫັນໄດ້ຈຸດລິເລີ່ມ ແລະການເຕີບໃຫຍ່ເຂັ້ມແຂງຂອງນັກທຸລະກິດແມ່ຍິງລາວ

 ໃນການລົງເຄື່ອນໄຫວໃນເທື່ອນີ້ນອກຈາກລົງໄປຊຸກຍູ້ຫົວໜ່ວຍນັກທຸລະກິດແລ້ວຍັງຖືໂອກາດລົງໄປຢ້ຽມຢາມ ແລະຊ່ວຍເຫຼືອໂຮງຮຽນປະຖົມສູນເສຍອົງ ຄະ, ພ້ອມມອບເງິນຈຳນວນ 33 ລ້ານກີບໃຫ້ກັບໂຮງຮຽນ, ພ້ອມນັ້ນທາງຄະນະກໍໄດ້ສືບຕໍ່ປະຕິບັດພາລະກິດຂອງ ສທຍລ ແລະຮັບຟັງການຊີ້ນຳຈາກທ່ານ ນາລີ ສີສຸລິດ ພັນລະຍາທ່ານນາຍົກລັດຖະມົນຕີແຫ່ງ ສປປ ລາວ ຕໍ່ກັບການຈັດຕັ້ງປະຕິບັດວຽກງານຂອງ ສທຍລ ເພື່ອເປັນການຊຸກຍູ້ສົ່ງເສີມ ແລະອຳນວຍຄວາມສະດວກໃຫ້ເຂົາເຈົ້າສາມາດດຳເນີນທຸລະກິດໄດ້ດີກວ່າເກົ່າ.

ຂ່າວ: ພິມພອນ

แชร์