105 ບໍລິສັດ ວາງສະແດງຜະລິດຕະພັນທ່ອງທ່ຽວອາຊຽນ 2024

ງານວາງສະແດງຜະລິດຕະພັນທ່ອງທ່ຽວ ອາຊຽນ 2024 ພາຍໃຕ້ຫົວຂໍ້ "ການທ່ອງ ທ່ຽວທີ່ມີຄຸນນະພາບ ແລະຄວາມຮັບຜິດຊອບຍືນຍົງໃນອະນາຄົດຂອງອາຊຽນ” ຈັດຂຶ້ນຢ່າງເປັນທາງການໃນຕອນເຊົ້າວັນທີ 24 ມັງກອນນີ້ທີ່ສູນການຄ້າລາວໄອເຕັກ ນະຄອນຫລວງວຽງຈັນ, ໂດຍມີ ທ່ານນາງ ສວນສະຫວັນ ວິຍະເກດ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະທ່ອງທ່ຽວ, ພ້ອມດ້ວຍຜູ້ຕ່າງໜ້າຈາກບັນດາປະເທດສະມາຊິກອາຊຽນ ເຂົ້າຮ່ວມ.

ທ່ານ ນາງ ມະນີສາຄອນ ທຳມະວົງໄຊ ຮອງຫົວໜ້າກົມໂຄສະນາການທ່ອງທ່ຽວກະຊວງຖະແຫລງຂ່າວ, ວັດທະນະທຳ ແລະທ່ອງທ່ຽວ ໄດ້ໃຫ້ຮູ້ວ່າ: ງານວາງສະແດງຄັ້ງນີ້, ເປັນການໂຄສະນາ,ຊູກຍູ້ສົ່ງເສີມການທ່ອງທ່ຽວພາຍໃນອາຊຽນໃຫ້ກັບມາມີບັນຍາກາດຄຶກຄື້ນທັງເປັນການເປີດໂອກາດໃຫ້ຜູ້ບໍລິການດ້ານການທ່ອງທ່ຽວ, ບໍລິສັດທ່ອງທ່ຽວ, ໂຮງແຮມ ແລະສາຍການບິນ ໄດ້ພົບປະໂອ້ລົມ ແລະກ້າວໄປເຖິງການຊື້-ຂາຍ ລາຍການທ່ອງທ່ຽວຮ່ວມກັນ. ທັງນີ້,ກໍເພື່ອແນໃສ່ເຮັດໃຫ້ຕະຫລາດທ່ອງທ່ຽວອາຊຽນ ແລະພາກພື້ນສາກົນກັບຄືກຄື້ນພາຍຫລັງໄດ້ຮັບຜົນກະທົບຈາກການລະບາດຂອງພະຍາດໂຄວິດ-19.

ງານຄັ້ງນີ້ມີຈໍານວນຜູ້ຊື້ທັງຫມົດ 70 ພາກສ່ວນທີ່ເຂົ້າຮ່ວມງານຊຶ່ງເປັນຕົວແທນຂອງຫຼາຍປະເທດ ລວມທັງຝຣັ່ງ, ອັງກິດ, ເຢຍລະມັນ, ອີຕາລີ, ແອັດສະປາຍ, ແບນຊິກ, ຕວັກກີ, ອົດສະຕາລີ, ນິວຊີແລນ, ໂປໂລຍ, ໂຮນລັງ, ລັດເຊຍ, ຈີນ, ຍີ່ປຸ່ນ, ສ ເກົາຫຼີ,ອິນເດຍ, ສິງກະໂປ, ໄທ, ມາເລເຊຍ, ຟີລິບປິນ, ອິນໂດເນເຊຍ, ມຽນມາ, ຫວຽດນາມ ແລະ ກຳປູເຈຍ. ໂດຍມີຮ້ານວາງສະແດງຜະລິດຕະພັນທ່ອງທ່ຽວ, ໂຮງແຮມ, ສາຍການບິນຂອງບັນດາປະເທດສະມາຊິກອາຊຽນ, ລວມທັງຜະລິດຕະພັນລາວ, ອາຫານ ແລະ ເຄື່ອງດື່ມຈຳນວນໜຶ່ງເຂົ້າຮ່ວມວາງສະແດງ 34 ບູດ ທີ່ຕາງໜ້າໃຫ້ 105 ບໍລິສັດ. ໂດຍງານວາງສະແດງຄັ້ງນີ້ຈະດໍາເນີນໄປຮອດວັນທີ 27 ມັງກອນ ຈິ່ງສໍາເລັດ.

แชร์