ຍີ່ປຸ່ນ ຊ່ວຍອຸປະກອນເກັບຮັກສາ ແລະຂົນສົ່ງເລືອດໃຫ້ ລາວ

ລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອເປັນມູນຄ່າປະມານ 188,000 ໂດລາສະຫະລັດ ໃນການສະໜັບສະໜູນໂຄງການສະໜອງອຸປະກອນເກັບຮັກສາ ແລະ ຂົນສົ່ງເລືອດ ໃຫ້ແກ່ສະຖາບັນເລືອດແຫ່ງຊາດ ອົງການກາແດງລາວ ເພື່ອຍົກລະດັບການນຳສົ່ງເລືອດ ໃນ 6 ແຂວງພາກເໜືອ ພາຍໃຕ້​ໂຄງ​ການ​ເສີມ​ສ້າງ​ຄວາມ​ໝັ້ນ​ຄົງ​ຂອງ​ມະ​ນຸດ​ຂັ້ນ​ຮາກ​ຖານ (GGP). ໂຄງການຈະໃຫ້ການສະໜັບສະໜູນທຶນຮອນເພື່ອຈັດຫາອຸປະກອນການແພດທີ່ສຳຄັນແລະຈໍາເປັນໃນວຽກງານການບໍລິການເລືອດ ໃນສູນເລືອດແຂວງຫຼວງພະບາງ.

ພິທີເຊັນສັນຍາການຊ່ວຍເຫລືອໄດ້ຈັດຂຶ້ນເມື່ອວັນທີ 19 ມັງກອນ 2024 ທີ່ນະຄອນຫລວງວຽງຈັນ,ເປັນການລົງນາມ ລະຫວ່າງ ທ່ານ ໂຄບະຢະຊິ ເຄັນອິຈິ, ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ​ ແລະ ທ່ານ ດຣ. ຈັນທະລາ ສຸກສາຄອນ, ຫົວໜ້າສະຖາບັນເລືອດແຫ່ງຊາດໂດຍມີ ທ່ານ ສຈ. ດຣ. ພູທອນ ເມືອງປາກ, ປະທານອົງການກາແດງລາວ ແລະ ທ່ານ ຊິນຊຸເກະ ໂອກິລິ, ຜູ້ອຳນວຍການບໍລິສັດ ໄດໂດ ຈຳກັດຜູ້ດຽວ ໃຫ້ກຽດເຂົ້າຮ່ວມເປັນສັກຂີພະຍານ.

ທ່ານປະທານອົງການກາແດງລາວ ກ່າວວ່າ: ການຊ່ວຍເຫຼືອຈາກປະເທດຍີ່ປຸ່ນໃນຄັ້ງນີ້ ເປັນການປະກອບສ່ວນອັນໃຫຍ່ຫຼວງ ເຂົ້າໃນການຍົກລະດັບລະບົບຂົນສົ່ງເລືອດ ໃນ 6 ແຂວງພາກເໜືອ.ຊຶ່ງໂຄງການດັ່ງກ່າວ ຊ່ວຍສ້າງຄວາມເຂັ້ມແຂງໃຫ້ແກ່ສູນເລືອດແຂວງຫລວງພະບາງໃນການຕອບສະຫນອງເລືອດ ແລະ ສ່ວນປະກອບຂອງເລືອດໃຫ້ແກ່ບັນດາແຂວງໃກ້ຄຽງ, ພ້ອມທັງເປັນການປະກອບສ່ວນເຂົ້າໃນການປັບປຸງການບໍລິການດ້ານສາທາລະນະສຸກຂອງລັດຖະບານລາວ ໂດຍຜ່ານການພັດທະນາແຜນຍຸດທະສາດເລືອດແຫ່ງຊາດ 2021-2030 ”. ໂຄງການດັ່ງກ່າວແມ່ນ ລັດຖະບານຍີ່ປຸ່ນຈະໄດ້ສະໜອງອຸປະກອນການແພດທີ່ມີຄຸນະພາບສູງ ຜ່ານການຮ່ວມມືກັບ ບໍລິສັດ ໄດໂດ ຈຳກັດຜູ້ດຽວ ປະເທດຍີ່ປຸ່ນ.
 
ທ່ານ ຊິນຊຸເກະ ໂອກິລິ, ຜູ້ອຳນວຍການບໍລິສັດ ໄດໂດ ຈຳກັດຜູ້ດຽວ ກ່າວໃນພິທີເຊັນສັນຍາວ່າ “ພວກເຮົາກໍໄດ້ລິເລີ່ມສະໜອງອຸປະກອນຊ່ວຍເຫຼືອ ໃຫ້ແກ່ປະເທດລາວ ໃນໂຄງການຂັ້ນຮາກຖານປີ 2021, ນັບແຕ່ປີ 2022 ກໍໄດ້ມີການໝູນໃຊ້ໂຄງການຊ່ວຍເຫລືອດ້ານການຖ່າຍທອດເຕັກນິກການແພດ ຈາກກະຊວງແຮງງານ-ສະຫວັດດີການສັງຄົມ ແລະ ສາທາລະນະສຸກຍີ່ປຸ່ນ ໂດຍການສົ່ງຜູ້ຊ່ຽວຊານດ້ານເລືອດຍີ່ປຸ່ນໄປປະຈຳຢູ່ປະເທດລາວ ເພື່ອເປັນການປະກອບສ່ວນໃນການຍົກລະດັບຄວາມຮູ້ດ້ານການແພດ ແລະ ເລືອດໃນປະເທດລາວ. ນອກຈາກນີ້, ເພື່ອເພີ່ມປະລິມານການເກັບຮັກສາເລືອດໃນທົ່ວປະເທດ ຈຶ່ງຄວາມຈຳເປັນໃນການພັດທະນາລະບົບຕ່ອງໂສ້ຄວາມເຢັນ ແລະ ວິຊາສະເພາະການແພດລະດັບສູງເຊັ່ນ ການປົວມະເຮັງ, ພວກເຮົາຈະສືບຕໍ່ໃຫ້ຄວາມຄວາມມືເພື່ອສ້າງຄວາມເຂັ້ມແຂງດ້ານການບໍລິການເລືອດໃນອະນາຄົດ”.

ທ່ານ ໂຄບະຢະຊິ ເຄັນອິຈິ ໄດ້ໃຫ້ຄຳເຫັນ “ສູນເລືອດແຂວງຫຼວງພະບາງ ເປັນສູນເລືອດທີ່ມີຂະໜາດໃຫຍ່ ເປັນອັນດັບ 2 ໃນທົ່ວປະເທດ ຍັງມີໜ້າທີ່ສຳຄັນຄື ເປັນສູນເລືອດທີ່ສ້າງ ແລະ ນຳສົ່ງຖົງເລືອດໃຫ້ແກ່ 6 ແຂວງພາກເໜືອອີກດ້ວຍ.  ໂຄງການເສີມສ້າງຄວາມໝັ້ນຄົງຂອງມະນຸດຂັ້ນຮາກຖານ (GGP) ແມ່ນ ການສະໜອງທຶນທີ່ຈຳເປັນໃຫ້ແກ່ໂຄງການຂະໜາດນ້ອຍທີ່ໃຫ້ຜົນປະໂຫຍດໂດຍກົງແກ່ປະຊາຊົນຜູ້ອາໄສ ແລະ ມີຈຸດປະສົງເພື່ອການພັດທະນາເສດຖະກິດ-ສັງຄົມຂອງປະເທດລາວ ໂດຍອີງຕາມຄວາມຕ້ອງການພື້ນຖານຂອງມະນຸດເປັນຫຼັກ.

ຜ່ານມາ, ລັດຖະບານຍີ່ປຸ່ນໄດ້ໃຫ້ການສະໜັບສະໜູນໃຫ້ແກ່ ສະຖາບັນເລືອດແຫ່ງຊາດ ອົງການກາແດງລາວ ລວມເປັນມູນຄ່າຫຼາຍກວ່າ 281,000 ໂດລາສະຫະລັດ ເພື່ອຊຸກຍູ້ການບໍລິການເລືອດ ໃນໄລຍະ 5 ປີຜ່ານມາ. ປະເທດຍີ່​ປຸ່​ນຈະສືບຕໍ່ໃຫ້ການຊ່ວຍເຫຼືອປະເທດລາວໃນການປັບປຸງພື້ນຖານຊີວິດການເປັນຢູ່ຂັ້ນຮາກຖານຕໍ່ໄປເພື່ອຮັບ​ປະ​ກັນ “​ບໍ່​ໃຫ້​ມີ​ໃຜ​ຖື​ກ​ຖິ້ມ​ໄວ້​ທາງຫຼັງ” ຜ່ານການ​ແກ້​ໄຂ​ຄວາມ​ແຕກ​ໂຕນ​​ໃນພາກພື້ນ.

แชร์