ສະຖາບັນເຕັກໂນໂລຊີ ສຸດສະກະ ຈັບມືໂຮງແຮມ ຄຣາວພລາຊ່າ ວຽງຈັນພັດທະນາຊັບພະຍາກອນມະນຸດແບບຍືນຍົງ

ວັນທີ 22 ມັງກອນ 2024 ທີ່ ຫ້ອງປະຊຸມຊັ້ນ 5 ສະຖາບັນ ເຕັກໂນໂລຊີ ສຸດສະກະ (ວິທະຍາເຂດໂພນພະເນົາ) ໄດ້ຈັດພິທີເຊັນບົດບັນທຶກຄວາມເຂົ້າໃຈໃນການຮ່ວມມືທາງດ້ານວິຊາການ ແລະ ການພັດທະນາຊັບພະຍາກອນມະນຸດ ແບບຍືນຍົງ ລະຫວ່າງ ສະຖາບັນ ເຕັກໂນໂລຊີ ສຸດສະກະ ແລະໂຮງແຮມ ຄຣາວ ພລາຊ່າ ວຽງຈັນ ວ່າດ້ວຍການຈັດຕັ້ງ ແລກປ່ຽນທາງດ້ານວິຊາການ ແລະ ບັນດາກິດຈະກໍາທີ່ປິ່ນອ້ອມ ໃຫ້ກຽດໃນການລົງນາມໃນຄັ້ງນີ້ ໂດຍ ທ່ານ ປທ ນາງ ວັນຄໍາ ສຸລິຍາ ອໍານວຍການ ສະຖາບັນ ເຕັກໂນໂລຊີ ສຸດສະກະ ພ້ອມຄະນະຄູ-ອາຈານ ແລະ ທ່ານ ມູຣາລີ ວິສວານາທານ ຜູ້ຈັດການໃຫຍ່ ໂຮງແຮມ ຄຣາວ ພລາຊ່າ ວຽງຈັນ ໃນພິທີດັ່ງກ່າວແມ່ນໄດ້ໃຫ້ກຽດການເປັນສັກຂີພະຍານຈາກຄະນະບໍລິຫານ, ຫົວໜ້າພະແນກ-ຮອງຫົວໜ້າພະແນກ, ຄູ-ອາຈານ ຈາກທັງສອງພາກສ່ວນເຂົ້າຮ່ວມໃນພິທີດັ່ງກ່າວ.

ເພື່ອເຮັດໃຫ້ການຈັດຕັ້ງການຮ່ວມມືທາງດ້ານວິຊາການ ແລະການພັດທະນາຊັບພະຍາກອນມະນຸດແບບຍືນຍົງໄດ້ດໍາເນີນໄປໃນກອບຂອງການຮ່ວມມືເພື່ອບັນລຸຈຸດປະສົງຕາມລະດັບຄາດໝາຍ. ທັງສອງຝ່າຍໄດ້ຕົກລົງຮ່ວມມືກັນດັ່ງລຸ່ມນີ້: ສະຖາບັນ ເຕັກໂນໂລຊີສຸດສະກະມີໜ້າທີ່ສະໜອງອາຄານ-ສະຖານທີ່, ຫ້ອງຮຽນທິດສະດີ, ຫ້ອງຮຽນພາກປະຕິບັດ ເຂົ້າໃນການຈັດຕັ້ງການຮຽນ-ການສອນ. ອໍານວຍຄວາມສະດວກອື່ນໆເພື່ອຮັບໃຊ້ໃຫ້ແກ່ການຮຽນ-ການສອນ ແລະ ການຝຶກອົບຮົມ.ຈັດ ແລະນໍາສົ່ງ ນັກຮຽນ-ນັກສຶກສາລົງພາກປະຕິບັດຕົວຈິງຢູ່ ໂຮງແຮມ ຄຣພຊ ແລະແຕ່ງຕັ້ງຄະນະຜູ້ປະສານງານເພື່ອຕິດຕາມການປະຕິບັດການຮ່ວມມືກັບ ໂຮງແຮມ ຄຣພຊ ໃຫ້ມີປະສິດທິຜົນ.

ໂຮງແຮມ ຄຣາວ ພລາຊາ ວຽງຈັນ ມີໜ້າທີ່ສະໜອງສະຖານທີ່ໃຫ້ນັກສຶກສາໃນການມາຢ້ຽມຊົມ ແລະທັດສະນະສຶກສາ. ສະເໜີລາຄາທີ່ດີທີ່ສຸດສໍາລັບກຸ່ມນັກສຶກສາທີ່ຕ້ອງການເຂົ້າພັກ ແລະຮັບປະທານອາຫານ ແລະງານອື່ນໆທີ່ກ່ຽວຂ້ອງກັບນັກສຶກສາ, ສະໜອງສະຖານທີ່ ແລະຮັບເອົານັກຮຽນໃນສາຂາວິຊາທີ່ກ່ຽວຂ້ອງລົງຝຶກພາກປະຕິບັດຕົວຈິງຢູ່ ໂຮງແຮມ ຄຣພຊ; ຈັດຫາງານ ແລະປະກອບວຽກເຮັດງານທໍາໃຫ້ກັບນັກສຶກສາພາຍຫຼັງສໍາເລັດການສຶກສາຕາມຄວາມເໝາະສົມ. ອອກໃບຢັ້ງຢືນໃຫ້ນັກສຶກສາທີ່ລົງຝຶກງານ ຫຼັງຈາກຝຶກງານສໍາເລັດ. ຕອບສະໜອງສະຖານທີ່ໃນການທັດສະນະສຶກສາກ່ຽວກັບວຽກງານບໍລິການໃນໂຮງແຮມ,ຈັດຝຶກອົບຮົມ ແລະຍົກລະດັບທາງດ້ານວິຊາການ, ແລກປ່ຽນປະສົບການໃຫ້ແກ່ນ້ອງໆນັກສຶກສາທີ່ ສຕສ. ແຕ່ງຕັ້ງຄະນະປະສານງານເພື່ອຕິດຕາມການປະຕິບັດການຮ່ວມມືກັບ ສຕສ ໃຫ້ມີປະສິດທິຜົນ.

ການຈັດຕັ້ງປະຕິບັດທັງສອງຝ່າຍແຕ່ງຕັ້ງຄະນະຮັບຜິດຊອບການຮ່ວມມືເພື່ອວາງແຜນການດໍາເນີນງານຮ່ວມກັນ ກໍານົດວິທີການບໍລິຫານຄຸ້ມຄອງ ແລະວຽກງານວິຊາການພ້ອມທັງການຕິດຕາມປະເມີນຜົນ;ທັງສອງຝ່າຍຮ່ວມກັນປຶກສາຫາລື ແລະປັບປຸງແຜນການປະຕິບັດລະອຽດໃນແຕ່ລະໄລຍະຕາມຄວາມເໝາະສົມ,

แชร์