3 ບໍລິສັດ ສະໜັບສະໜູນ ກອງປະຊຸມລັດຖະມົນຕີທ່ອງທ່ຽວອາຊຽນ

ໃນຕອນບ່າຍວັນທີ 22 ມັງກອນ 2024 ນີ້, ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ທັງເປັນ ຫົວໜ້າຄະນະຊີ້ ນຳລວມການຈັດມາຫາກຳການທ່ອງທ່ຽວອາຊຽນ 2024 ພ້ອມດ້ວຍຄະນະ ໄດ້ລົງຕິດຕາມຄວາມພ້ອມຮອບສຸດທ້າຍ ຢູ່ສະຖານທີ່ ຈັດກອງປະຊຸມ ລັດຖະມົນຕີທ່ອງທ່ຽວອາຊຽນ ທີ່ໂຮງແຮມແລນມາກ ແມ່ຂອງຣີເວີໄຊ ນະຄອນຫລວງວຽງຈັນ. ພ້ອມທັງໄດ້ຮັບເຄື່ອງຊ່ວຍເຫລືອ ຈາກບໍລິສັດພັດທະນາແຫລ່ງທ່ອງທ່ຽວນໍ້າຕົກຕາດເຍືອງ ມອບເສຶ້ອ 400 ໂຕ ມູນຄ່າ 40 ລ້ານກີບ, ບໍລິສັດທ່ອງທ່ຽວພັດທະນາຈໍາປາໃໝ່ ມອບເສື້ອ 200 ໂຕ ມູນຄ່າ 20 ລ້ານກີບ ແລະ ບໍລິສັດດາວເຮືອງ ຈຳກັດຜູ້ດຽວ ມອບກາເຟ 5 ແກັດ, ນໍ້າດື່ມດາວ 300ML, ໝາກໄມ້ອົບແຫ້ງດາວ 100 ກຣາມ ລວມມູນຄ່າທັງໝົດ 10 ລ້ານກວ່າກີບ.

ໃນໂອກາດນີ້, ທ່ານນາງ ສວນສະຫວັນ ວິຍະເກດ ກໍໄດ້ສະແດງຄວາມຂອບໃຈມາຍັງບັນດາບໍລິສັດດັ່ງກ່າວທີ່ໄດ້ປະກອບສ່ວນໃຫ້ການສະໜັບສະໜູນຕໍ່ກອງປະຊຸມລັດຖະມົນຕີທ່ອງທ່ຽວອາຊຽນທີ່ ສປປ ລາວ ເປັນເຈົ້າພາບເຊິ່ງເປັນການປະກອບສ່ວນສຳຄັນເຂົ້າໃນການຮັບໃຊ້ໃຫ້ແກ່ກອງປະຊຸມດັ່ງກ່າວ. ພ້ອມທັງໃຫ້ຄຳໝັ້ນສັນຍາວ່າ ຈະນຳໃຊ້ເຄື່ອງອຸປະໂພກ ແລະບໍລິໂພກ ທີ່ໄດ້ຮັບການຊ່ວຍເຫລືອໃນຄັ້ງນີ້, ໃຫ້ຖືກຕ້ອງຕາມເປົ້າໝາຍ ແລະເກີດປະໂຫຍດສູງສຸດ.
----------------------

ຂ່າວ: ກິດຕາ
ພາບ: ພອນປະດິດ

แชร์