ເປີດເປັນທາງການງານເທສະການອາຫານລາວ 2024

ສູນກາງສະຫະພັນແມ່ຍິງລາວ ຮ່ວມກັບ ສະມາຄົມນັກທຸລະກິດແມ່ຍິງ (ສທຍ) ໄດ້ເປີດງານເທສະການອາຫານລາວປະຈໍາປີ 2024 ພາຍໃຕ້ຄໍາຂວັນ: “ຊີມອາຫານລາວ ທ່ອງທ່ຽວລາວປີ 2024” (Tasting Lao food visit Laos year 2024) ຂຶ້ນຢ່າງເປັນທາງການໃນວັນທີ 23 ມັງກອນທີ່ສວນເຈົ້າອະນຸວົງ ນະຄອນຫລວງວຽງຈັນໂດຍໃຫ້ກຽດເຂົ້າຮ່ວມຂອງທ່ານ ປອ.ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ພ້ອມດ້ວຍບັນດາທ່ານພັນລະຍາການນໍາຂັ້ນສູງ,ຜູ້ຕາງໜ້າເອກອັກຄະລັດຖະທູດ,ທຸ​ຕານຸທູດຕ່າງປະເທດ ປະຈຳ ສປປ ລາວ, ຜູ້ສະໜັບສະໜູນ, ພ້ອມດ້ວຍສະມາຊິກ ສທຍ, ແລະຜູ້ປະກອບການເຂົ້າຮ່ວມ.

ທ່ານນາງ ຈັນທະຈອນ ວົງໄຊ ປະທານຄະນະບໍລິຫານສະມາຄົມນັກທຸລະກິດແມ່ຍິງຕາງໜ້າຄະນະກໍາມະການຈັດງານ​ເທສະການອາຫານປະຈຳ​ປີ 2024 ກ່າວວ່າ: ງານຄັ້ງນີ້ມີຈຸດປະສົງ:  1) ເພື່ອສ້າງຄວາມເຂັ້ມແຂງ ແລະຄວາມສາມັກຄີ ໃຫ້ແກ່ກັບສະມາຊິກພາຍໃນສະມາຄົມນັກທຸລະກິດຍິງ ແລະຜູ້ປະກອບການດ້ວຍກັນທົ່ວປະເທດ ແລະເພື່ອຕ້ອນຮັບນັກທ່ອງທ່ຽວທັງພາຍໃນ ແລະຕ່າງປະເທດເຂົ້າມາຊີມ, ຊື້ ແລະຖືກັບບ້ານໄດ້; 2) ເພື່ອເສີມສ້າງຄວາມສາມາດໃຫ້ຜູ້ປະກອບການທີ່ມາວາງຂາຍສິນຄ້າໃນງານໄດ້ຍົກສູງຄຸນນະພາບຂອງສິນຄ້າໂດຍສະເພາະການປຸງແຕ່ງອາຫານໃຫ້ຖືກຕາມມາດຕະຖານໃຫ້ເປັນທີ່ດຶງດູດລູກຄ້າຫລາຍຂຶ້ນກວ່າເກົ່າ, ເພື່ອຮອງຮັບແຂກລະດັບຊາດ ແລະລະດັບສາກົນ; 3) ເພື່ອສ້າງວຽກເຮັດງານທໍາ, ສ້າງລາຍໄດ້ໃຫ້ແກ່ຜູ້ປະກອບການທາງດ້ານອາຫານກ້າວໄປເຖິງສາມາດສ້າງເປັນ ແບຣນ(BRAND)ອາຫານເອກະລັກແບບລາວໆ ແລະຈັດຈໍາໜ່າຍອອກສູ່ສາກົນໄດ້ຫລາຍກວ່າເກົ່າ.  

ງານຄັ້ງນີ້ຈະໄດ້ດໍາເນີນໄປເປັນເວລາ 5 ວັນໂດຍເລີ່ມ ແຕ່ວັນທີ 23-27/01/2024, ເລີ່ມແຕ່ເວລາ 9:00 ຕອນເຊົ້າຮອດ 10:00 ໂມງກາງຄືນຂອງທຸກວັນ, ມີຮ້ານຂາຍແມ່ນ 180 ຮ້ານ, ໃນນັ້ນມີຮ້ານອາຫານເອກະລັກຂອງແຕ່ລະທ້ອງຖິ່ນແບບລາວໆ, ອາຫານລາວປະຍຸກ, ອາຫານປະເພດຂອງຫວານ ລວມ 165 ຮ້ານ, ສິນຄ້າຫັດຖະກໍາ 15 ຮ້ານ. ຄາດວ່າປີນີ້ຈະມີເມັດເງິນໝູນວຽນໃນງານເທດສະການອາຫານ ປະມານ 6 ຕື້ກີບ.      

ພາຍໃນງານມີການສະແດງສິລະປະພື້ນເມືອງລາວ, ຂາຍອາຫານລາວເອກະລັກຂອງ 18 ແຂວງໃນລາວ, ສາທິດການເຮັດເຂົ້າໜົມລາວ, ສໍາມະນາຫົວຂໍ້: ການບໍລິຫານທຸລະກິດຂະໜາດນ້ອຍ (ການວາງແຜນການຕະຫລາດ), ປະກວດ ແກະສະຫລັກໝາກໄມ້ນາໆພັນພ້ອມຂາຍເຂົ້າໜົມແບບລາວ ແລະອື່ນໆ.

แชร์