ຮອງນາຍົກ ພົບປະໂອ້ລົມພະນັກງານ-ນັກຮົບ ກອງພົນທີ 4

ວັນທີ 18ມັງກອນ 2024 ນີ້, ສະຫາຍ ພົນເອກ ວິໄລ ຫລ້າຄຳຟອງ ຮອງນາຍົກລັດຖະມົນຕີ, ລັດຖະມົນຕີ ກະຊວງປ້ອງກັນຄວາມສະຫງົບ, ສະຫາຍ ພົນຕີ ປະສິດ ທ່ຽງທຳ ຄະນະປະຈຳພັກກະຊວງປ້ອງກັນປະເທດ, ຫົວໜ້າກົມໃຫຍ່ເຕັກນິກກອງທັບພ້ອມດ້ວຍຄະນະໄດ້ເຄື່ອນໄຫວຢ້ຽມຢາມ ແລະ ພົບປະ-ໂອ້ລົມ ພະນັກງານ-ນັກຮົບ ກອງພົນທີ 4 ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20/1/1949-20/1/2024) ໂດຍໃຫ້ກຽດຕ້ອນຮັບຂອງທ່ານ ບຸນໂຈມ ອຸບົນປະເສີດ ກຳມະການສູນກາງພັກເລຂາພັກແຂວງເຈົ້າແຂວງສະຫວັນນະເຂດ ພອ້ມດວ້ຍຄະນະນໍາແຂວງ,ຄະນະນຳກະຊວງປ້ອງກັນປະເທດ, ຄະນະນຳຂອງສອງກຳລັງ ປກຊ-ປກສ ພ້ອມດວ້ຍ ຄະນະພັກ-ຄະນະບັນຊາ, ນາຍ ແລະພົນທະຫານ, ພະນັກງານປະຕິວັດອາວຸໂສ ແລະແຂກຖືກເຊີນເຂົ້າຮ່ວມ.

ສະຫາຍ ພົນຈັດຕະວາ ສົມຈິດ ກິດຕິຍະລາດ ຫົວໜ້າການເມືອງ ກອງພົນທີ 4 ໄດ້ລາຍງານໂດຍຫຍໍ້ສະພາບຈຸດພິເສດ, ທີ່ຕັ້ງ, ພາລະບົດບາດ ແລະໜ້າທີ່ການເມືອງຂອງກົມກອງ ລວມທັງຜົນ ງານທີ່ຍາດມາໄດ້ ໃນໄລຍະຜ່ານມາ ເຊິ່ງປະກອບສ່ວນຢ່າງຕັ້ງໜ້າ ເຂົ້າໃນການຈັດຕັ້ງປະຕິບັດມະຕິກອງກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງປ້ອງກັນປະເທດ ສາມາດປະຕິບັດບັນດາຄາດໝາຍສູ້ຊົນ ເຮັດໃຫ້ປະເທດຊາດມີສະຖຽນລະພາບ ທາງດ້ານການເມືອງ, ສັງຄົມມີຄວາມສະຫງົບ ໂດຍສະເພາະການປ້ອງກັນບັນດາເປົ້າໝາຍສຳຄັນ, ວັນບຸນປະຫວັດສາດ ແລະກອງປະຊຸມຕ່າງໆລະດັບຊາດ ແລະ ສາກົນ ມີຄວາມສະຫງົບ. ໄປຄຽງຄູ່ກັນນັ້ນ, ຄະ ນະພັກ-ຄະນະບັນຊາ ຍັງໄດ້ຖືເອົາວຽກງານປ້ອງກັນຊາດ-ປ້ອງກັນຄວາມສະຫງົບເປັນສໍາຄັນ, ຫັນເອົາກໍາລັງລົງກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ຕາມ 4 ເນື້ອໃນ 4 ຄາດໝາຍ, ສຸມໃສ່ສ້າງບ້ານປ້ອງກັນຊາດເຂັ້ມແຂງ, ກຸ່ມບ້ານປ້ອມໝັ້ນ ສູ້ຮົບເຂັ້ມແຂງໃຫ້ເພີ່ມຂຶ້ນທາງດ້ານຈໍານວນ ແລະຄຸນນະພາບ, ຍູ້ແຮງການອົບຮົມ-ຫັດແອບການເມືອງການ-ການທະຫານ, ພະລາທິການ, ເຕັກນິກ, ສິລະປະຍຸດ-ຍຸດທະວິທີຂອງທະຫານຮາບ ແລະເຫລົ່າຮົບວິຊາສະເພາະໃຫ້ມີຄວາມຊໍານິຊໍານານ,ເປັນກໍາລັງຫລັກແຫລ່ງໃຫ້ກະຊວງປ້ອງກັນປະເທດທາງດ້ານວຽກງານຮັບປະກັນເຮັດໃຫ້ສະພາບໃນ 3 ແຂວງພາກກາງ ມີຄວາມສະຫງົບ, ໄປຄວບຄູ່ກັບການຍົກສູງ ນໍ້າໃຈເພິ່ງຕົນເອງ, ກຸ້ມຕົນເອງ ແລະສ້າງຄວາມເຂັ້ມແຂງດ້ວຍຕົນເອງຕາມເງື່ອນໄຂທ່າແຮງບົ່ມຊ້ອນຂອງກົມກອງ. ນອກນັ້ນ, ຍັງເປັນເຈົ້າການປ້ອງກັນ, ກວດກາ, ຕິດຕາມເຂດຫລັກໝາຍຊາຍແດນຕ່າງໆ ແລະສັງຄົມທົ່ວໄປຮັບປະກັນສ້າງເງື່ອນໄຂໃຫ້ແກ່ການພັດທະນາເສດຖະກິດ-ສັງຄົມແຫ່ງຊາດ ໄດ້ຂະຫຍາຍຕົວຢ່າງຕໍ່ເນື່ອງ.

ໂອກາດນີ້, ສະຫາຍ ພົນເອກ ວິໄລ ຫລ້າຄຳຟອງ ໄດ້ມີຄໍາເຫັນໂອ້ລົມ ແລະເນັ້ນໃຫ້ຄະນະພັກ-ຄະນະບັນຊາກອງພົນທີ 4, ພະນັກງານ-ນັກຮົບ ສືບຕໍ່ຮັກສາມູນເຊື້ອ, ທາດແທ້ປະຕິວັດຂອງກອງ ທັບ, ຕໍ່ສູ້ເດັດດ່ຽວ, ພິລະອາດຫານ, ບໍ່ຍອມຈໍານົນຍາກປານໃດກໍບຸກ, ທຸກປານໃດກໍສູ້, ເຖິງຈະເສຍສະຫລະກໍບໍ່ຫວາດຫວັ່ນ, ຍາມໃດກໍສະໜອງຕາມຄວາມຮຽກຮ້ອງຕ້ອງການຂອງພັກດ້ວຍຄວາມຈົງຮັກພັກດີ, ບໍລິສຸດ ແລະ ເດັດດ່ຽວໜຽວແໜ້ນ, ກອງທັບເຮົາຍາມໃດກໍອີງໃສ່ປະຊາຊົນ, ເຮັດທຸກສິ່ງທຸກຢ່າງເພື່ອຜົນປະໂຫຍດຂອງປະຊາຊົນດ້ວຍຄວາມບໍລິສຸດໃຈ. ຍ້ອນແນວນັ້ນ ຈຶ່ງໄດ້ຮັບຄວາມເອົາໃຈໃສ່ເບິ່ງແຍງດູແລ, ຖະໜອນຫອມຮັກ ແລະ ອຸ້ມຊູຊ່ວຍເຫລືອຈາກປະຊາຊົນບັນດາເຜົ່າ, ອັນໄດ້ເປັນບໍ່ເກີດຂອງກໍາລັງແຮງ ທີ່ບໍ່ເຫືອດແຫ້ງຈັກເທື່ອ; ກອງທັບປະຊາຊົນລາວສົມແລ້ວທີ່ເປັນກອງທັບວິລະຊົນຂອງຊາດລາວ ຢ່າງແທ້ຈິງ. ຈາກນັ້ນ, ສະຫາຍ ພົນເອກ ວິໄລ ຫລ້າຄຳຟອງ ພ້ອມດ້ວຍຄະນະ ໄດ້ລົງຢ້ຽມຢາມພະນັກງານ-ນັກຮົບ ຢູ່ກອງພັນນ້ອຍ 619, ກອງພັນນ້ອຍ 634 ໂຮງງານນໍ້າມັງກອນຄຳຂອງກອງພົນພ້ອມທັງມອບວັດຖຸປັດໄຈຈຳນວນໜຶ່ງໃຫ້ກອງພົນທີ 4 ອີກດ້ວຍ.
ໂດຍ: ບົວລາ

แชร์