ທຫລ ຊຸກຍູ້ນະໂຍບາຍສິນເຊື່ອ ເພື່ອກະຕຸ້ນເສດຖະກິດ ແລະກະຈາຍແຫຼ່ງທຶນສູ່ທ້ອງຖິ່ນ

ໃນວັນທີ 16 ມັງກອນ 2024 ນີ້, ທີ່ສາຂາທະນາຄານແຫ່ງ ສປປ ລາວ (ທຫລ) ພາກເໜືອແຂວງຊຽງຂວາງ ໄດ້ຈັດກອງປະຊຸມຊຸກຍູ້ການຈັດຕັ້ງປະຕິບັດນະໂຍບາຍສິນເຊື່ອເພື່ອກະຕຸ້ນເສດຖະກິດ ແລະນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນຂຶ້ນ,ໂດຍການເປັນປະທານຂອງທ່ານ ນາງ ຂັນແກ້ວ ຫຼ້າມະນີເງົາ ຮອງຜູ້ວ່າການ ທຫລ, ຄະນະຊີ້ນໍາລວມການຈັດຕັ້ງປະຕິບັດນະໂຍບາຍສິນເຊື່ອເພື່ອກະຕຸ້ນເສດຖະກິດ ແລະ ນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນ, ມີບັນດາທ່ານຮອງເຈົ້າແຂວງ 3 ແຂວງຄື: ຊຽງຂວາງ, ຫົວພັນ ແລະໄຊສົມບູນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ຈຸດປະສົງຂອງກອງປະຊຸມແມ່ນເພື່ອລາຍງານຄວາມຄືບໜ້າ ແລະຊຸກຍູ້ການຈັດຕັ້ງປະຕິບັດນະໂຍບາຍສິນເຊື່ອເພື່ອກະຕຸ້ນເສດຖະກິດ ແລະນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນຂອງສາມແຂວງພາກເໜືອຄື: ຊຽງຂວາງ, ຫົວພັນ ແລະໄຊສົມບູນ ເພື່ອແລກປ່ຽນ, ຖອດຖອນບົດຮຽນ ແລະປຶກສາຫາລືການຈັດຕັ້ງ 2 ນະໂຍບາຍສິນເຊື່ອແນໃສ່ຮັບປະກັນປະສິດທິພາບ ແລະປະສິດທິຜົນຂອງນະໂຍບາຍ. ພ້ອມທັງຮັບຟັງການເຜີຍແຜ່ຄໍາແນະນໍາການຈັດຕັ້ງປະຕິບັດ 2 ນະໂຍບາຍ ຊຶ່ງໄດ້ລວມເອົາບັນຫາທີ່ບັນດາແຂວງຍົກຂຶ້ນ ເພື່ອໃຫ້ມີຄວາມເອກະພາບ ແລະຮັບປະກັນການຈັດຕັ້ງປະຕິບັດໄປໃນທິດທາງດຽວກັນ ແລະຮັບຟັງການນໍາສະເໜີກ່ຽວກັບການສະໜອງແຫຼ່ງທຶນຂອງກອງທຶນສົ່ງເສີມວິສາຫະກິດຂະໜາດນ້ອຍ ແລະກາງ.

ນະໂຍບາຍສິນເຊື່ອເພື່ອກະຕຸ້ນເສດຖະກິດແລະນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນເປັນໜຶ່ງໃນນະໂຍບາຍທີ່ສໍາຄັນ ແລະຮີບດ່ວນຂອງລັດຖະບານ (ຂໍ້ຕົກລົງ ສະບັບເລກທີ 93/ນຍ, ລົງວັນທີ 14 ກໍລະກົດ 2023) ເພື່ອແກ້ໄຂຄວາມຫຍຸ້ງຍາກທາງດ້ານເສດຖະກິດຊຶ່ງມີເປົ້າໝາຍສຸມໃສ່ສົ່ງເສີມການຜະລິດເປັນສິນຄ້າ ແລະ ບໍລິການ ຂອງ 03 ຂະແໜງການເປົ້າໝາຍ ຄື: ຂະແໜງການກະສິກໍາ ແລະ ປ່າໄມ້, ຂະແໜງອຸດສາຫະກໍາປຸງແຕ່ງ ແລະ ຫັດຖະກໍາ, ຂະແໜງການບໍລິການ-ທ່ອງທ່ຽວ ແລະ ຂະແໜງການຄ້າທີ່ເປັນປາຍແຫຼມເພື່ອທົດແທນການນໍາເຂົ້າ-ສົ່ງເສີມການຜະລິດເພື່ອສົ່ງອອກ, ສ້າງວຽກເຮັດງານທຳແລະປະກອບສ່ວນເຂົ້າໃນການຮັກສາສະຖຽນລະພາບມະຫາພາກດ້ານການເງິນ-ເງິນຕາໃຫ້ເຂັ້ມແຂງແນ່ໃສ່ການພັດທະນາເສດຖະກິດໃຫ້ມີການຂະຫຍາຍຕົວແບບຍືນຍົງ ແລະ ສ້າງເງື່ອນໄຂໃຫ້ຫົວໜ່ວຍທຸລະກິດ (ຈຸລະວິສາຫະກິດ, ວິສາຫະກິດຂະໜາດນ້ອຍ, ກາງແລະວິສາຫະກິດຂະໜາດໃຫຍ່ຈຳນວນໜຶ່ງ) ໃນຂະແໜງບູລິມະສິດຂອງລັດສາມາດເຂົ້າຫາແຫຼ່ງທຶນທີ່ມີຕົ້ນທຶນເໝາະສົມໃນການສ້າງ, ຂະຫຍາຍແລະປັບປຸງຖານການຜະລິດ-ປຸງແຕ່ງ, ບໍລິການ-ການຄ້າຂອງຕົນທັງຮັບປະກັນການຜະລິດສະໜອງສະບຽງອາຫານ ແລະເຄື່ອງອຸປະໂພກ-ບໍລິໂພກພາຍໃນ.

ທັງ 2 ນະໂຍບາຍສິນເຊື່ອດັ່ງກ່າວໄດ້ເລີ່ມດໍາເນີນການແຕ່ເດືອນກັນຍາ 2023 ເປັນຕົ້ນມາ ແລະເຫັນໄດ້ວ່າທຸກພາກສ່ວນກ່ຽວຂ້ອງກໍໄດ້ເອົາໃຈໃສ່ຈັດຕັ້ງປະຕິບັດຜັນຂະຫຍາຍຢ່າງຕັ້ງໜ້າ. ໃນນັ້ນ ວຽກງານທີ່ສໍາເລັດສ່ວນໃຫຍ່ແມ່ນການສ້າງນິຕິກໍາເປັນຕົ້ນຂໍ້ຕົກລົງ, ຄໍາແນະນໍາ ແລະແບບຟອມລາຍງານຕ່າງໆ ພ້ອມທັງລະບຽບການທີ່ປິ່ນອ້ອມ. ນອກນັ້ນ, ທີ່ປະຊຸມຍັງໄດ້ຄົ້ນຄວ້າ ແລະອະນຸມັດໃຫ້ຫົວໜ່ວຍທຸລະກິດຈໍານວນໜຶ່ງໄດ້ເຂົ້າຮັບການສົມທົບດອກເບ້ຍ ແລະຮັບແຫຼ່ງທຶນດອກເບ້ຍຕໍ່າ.

ຫຼັງຈາກນັ້ນ, ໃນວັນທີ 17 ມັງກອນ, ທ່ານຮອງຜູ້ວ່າການ ທຫລ ພ້ອມຄະນະກໍໄດ້ລົງເກັບກຳຂໍ້ມູນສຳພາດຜູ້ປະກອບການຮ່ວມກັບທະນາຄານທຸລະກິດທີ່ສະເໜີຂໍນະໂຍບາຍສິນເຊື່ອ 2 ເປົ້າໝາຍຄື:1) ບໍລິສັດໄຊຍະວົງຟາມຈຳກັດຜູ້ດຽວດຳເນີນທຸລະກິດລ້ຽງໄກ່ພັນໄຂ່ ຢູ່ບ້ານລີ ເມືອງແປກ ແຂວງຊຽງຂວາງ ຂໍສະເໜີນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນຈໍານວນ 800 ລ້ານກີບ ຜ່ານທະນາຄານຮ່ວມທຸລະກິດລາວ-ຫວຽດສາຂາຊຽງຂວາງ; ແລະ2)ທ່ານ ດວງຖາວອນ ດວງພະຈັນ ດໍາເນີນທຸລະກິດປະເພດຟາມລ້ຽງງົວ ຢູ່ບ້ານນາສົງ ເມືອງຜາໄຊ ແຂວງຊຽງຂວາງ ກຳລັງຢູ່ໃນຂັ້ນຕອນປະກອບແບບຟອມ ຈະຂໍສະເໜີນະໂຍບາຍສິນເຊື່ອເພື່ອກະຕຸ້ນເສດຖະກິດຈຳນວນ 8 ຕື້ກີບ (ສົມທົບດອກເບ້ຍ 5% ຂອງດອກເບ້ຍທະນາຄານ 11,3%ຕໍ່ປີ) ຜ່ານທະນາຄານສົ່ງເສີມກະສິກຳສາຂາຊຽງຂວາງ.

แชร์