ຂະບວນຍ່າງເພື່ອສຸຂະພາບ ຄວາມສາມັກຄີເປັນປຶກແຜ່ນລະຫວ່າງກອງທັບ ແລະປະຊາຊົນລາວ

ພິທີເປີດຂະບວນຍ່າງເພື່ອສຸຂະພາບ ຄວາມສາມັກຄີເປັນປຶກແຜ່ນລະຫວ່າງກອງທັບ ແລະ ປະຊາຊົນລາວເນື່ອງໃນໂອກາດສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20 ມັງກອນ 1949-20 ມັງກອນ 2024) ຈັດຂຶ້ນໃນວັນທີ 18 ມັງກອນນີ້ ທີ່ບຶງທາດຫຼວງ ນະຄອນຫຼວງວຽງຈັນ ໃຫ້ກຽດເຂົ້າຮ່ວມຕັດແຖບຜ້ານໍາພາຂະບວນຍ່າງໂດຍທ່ານ ທອງລຸນ ສີສຸລິດ ເລຂາທິການໃຫຍ່ ປະທານປະເທດ ແຫ່ງ ສປປ ລາວ ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ ມີບັນດາທ່ານການນໍາພັກ-ລັດ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ພະນັກງານປະຕິວັດອາວຸໂສບໍານານພະນັກງານ-ລັດຖະກອນ ທະຫານ ຕໍາຫຼວດ ແລະມວນຊົນເຂົ້າຮ່ວມ.

ໃນພິທີ ທ່ານ ນາງ ອິນລາວັນ ແກ້ວບຸນພັນ ກໍາມະການສູນກາງພັກ ຮອງປະທານສູນກາງແນວລາວສ້າງຊາດທັງເປັນຄະນະຮັບຜິດຊອບລະດັບຊາດສະເຫຼີມສະຫຼອງວັນດັ່ງກ່າວ ໄດ້ກ່າວວ່າ: 20 ມັງກອນ 1949 ແມ່ນວັນສ້າງຕັ້ງກອງທັບປະຊາຊົນລາວ ເຊິ່ງເປັນວັນປະຫວັດສາດສໍາຄັນຂອງຊາດ ຂອງພັກ ຂອງກອງທັບລາວ ທີ່ໝູນວຽນມາ ຄົບຮອບ 75 ປີ ບົນເສັ້ນທາງແຫ່ງການສ້າງຕັ້ງ ສູ້ຮົບມີໄຊ ແລະ ເຕີບໃຫຍ່ຂະຫຍາຍຕົວ ກອງທັບໄດ້ຜ່ານຜ່າຄວາມຫຍຸ້ງຍາກ ເສຍສະຫຼະນາໆປະການ ຕໍ່ສູ້ເພື່ອປະຊາຊົນຕີເອົາຊະນະສັດຕູທີ່ໃຫຍ່ໂຕ ເຂັ້ມແຂງກວ່າພວກເຮົາບໍ່ຈັກວ່າເທົ່າໃດທົບ ປົດປ່ອຍປະເທດຊາດ ສືບຕໍ່ປົກປັກຮັກສາ ແລະ ສ້າງສາພັດທະນາປະເທດຊາດ ສົມຊື່ວ່າ ກອງທັບວິລະຊົນ, ຊາດລາວວິລະຊົນ, ຄົນລາວພິລະອາດຫານ ດ້ວຍຄວາມເອກອ້າງທະນົງໃຈຕໍ່ມູນເຊື້ອແຫ່ງການກຳເນີດ ເຕີບໃຫຍ່ເຂັ້ມແຂງ ສູ້ຮົບມີໄຊຂອງກອງທັບປະຊາຊົນລາວ.

ຕະຫຼອດໄລຍະ 75 ປີ ຜ່ານມາ ກອງທັບປະຊາຊົນລາວເຮົາ ໄດ້ເຮັດສຳເລັດພາລະກິດອັນຍິ່ງໃຫຍ່ ແລະໜັກໜ່ວງ ທີ່ປະເທດຊາດ ແລະປະຊາຊົນມອບໝາຍໃຫ້ຢ່າງສະຫງ່າງາມ ສ້າງຜົນງານດີເດັ່ນ ວິລະກຳອັນລໍ້າເລີດປະດັບໄວ້ໃນໜ້າປະຫວັດສາດຢ່າງສົມກຽດ ສົມແລ້ວທີ່ເປັນກອງທັບວິລະຊົນຊາດລາວວິລະຊົນໄດ້ຮັບການຍ້ອງຍໍສັນລະເສີນ ຈາກພັກ-ລັດ ວ່າ: ກອງທັບຍາມໃດກໍນໍາໜ້າໃນທຸກວຽກງານເດັດດ່ຽວຜ່ານຜ່າອຸປະສັກ ຕີເອົາຊະນະສັດຕູທຸກໂຕເຮັດສຳເລັດໜ້າທີ່ສົມເປັນກຳລັງແກ່ນສານທີ່ເຂັ້ມແຂງຂອງການປະຕິວັດ ເປັນເຄື່ອງມືອັນແຫຼມຄົມຂອງພັກກອງທັບກັບປະຊາຊົນບັນດາເຜົ່ານັ້ນຄື “ປາກັບນໍ້າ” ເປັນປັດໄຈສໍາຄັນກວ່າໝູ່ໃນພາລະກິດຕໍ່ສູ້ຂອງກອງທັບເຮົາໂດຍອີງໃສ່ປະຊາຊົນເປັນກໍາລັງໜູນຊ່ວຍຢ່າງໜັກແໜ້ນເພື່ອຕໍ່ສູ້ປົກປ້ອງປະເທດຊາດກໍຄືໝາກຜົນ ຂອງການປະຕິວັດໄວ້ໃຫ້ໝັ້ນຄົງ.

ຂະບວນການກໍໄດ້ເລີ່ມຕົ້ນດ້ວຍການຍ່າງ ແລະຮັບຊົມການສະແດງຝູງເຄື່ອງບິນກີລາຈາກກອງທັບ ປະຊາຊົນລາວ ແລະ ສປ ຈີນ ບິນສະແດງ ຢ່າງສະຫງ່າອົງອາດ ແລະງົດງາມ ເພື່ອເປັນການສ້າງບັນຍາກາດເຮັດໃຫ້ງານສະເຫຼີມສະຫຼອງ 75 ປີ ຂອງກອງທັບປະຊາຊົນລາວມີຄວາມຄຶກຄື້ນມ່ວນຊື່ນ.
ຂ່າວ-ພາບ: ຍຸພິນທອງ

แชร์