ບໍລິສັດ ພູເບ້ຍ ມາຍນິງ ຈັດສະແດງຜົນງານຢູ່ແຂວງໄຊສົມບູນ ເນື່ອງໃນໂອກາດແຂວງດັ່ງກ່າວສະເຫຼີມສະຫຼອງຄົບຮອບ 10 ປີ

ບໍລິສັດ ພູເບ້ຍ ມາຍນິງ ໄດ້ຈັດສະແດງຜົນງານການປະກອບສ່ວນທີ່ດີດ້ານເສດຖະກິດ-ສັງຄົມ ຕໍ່ກັບອໍານາດການປົກຄອງ ແລະປະຊາຊົນແຂວງໄຊສົມບູນ ຢູ່ທີ່ງານວາງສະແດງສິນຄ້າ ແລະ ອາຫານ ຊຶ່ງຈັດຂຶ້ນໃນລະຫວ່າງວັນທີ 7 ຫາ 11 ມັງກອນ. ງານດັ່ງກ່າວແມ່ນສ່ວນໜຶ່ງຂອງຫຼາຍໆງານທີ່ແຂວງຈັດຂຶ້ນເພື່ອສະເຫຼີມສະຫຼອງວັນສ້າງຕັ້ງແຂວງໄຊສົມບູນຄົບຮອບ 10 ປີ.

ເພື່ອເປັນການຊຸກຍູ້ງານສະເຫຼີມສະຫຼອງຂອງແຂວງ, ບໍລິສັດ ພູເບ້ຍ ມາຍນິງ ໄດ້ມອບເງິນຈໍານວນ 103 ລ້ານກີບໂດຍມີທ່ານ ສຸກສະຫວັດ ວົງພູມເຫຼັກ, ຮອງເຈົ້າແຂວງໄຊສົມບູນ, ເຊິ່ງເປັນຜູ້ຕາງໜ້າອໍານາດການປົກຄອງແຂວງໄຊສົມບູນ ຮັບເອົາເງິນປະກອບສ່ວນດັ່ງກ່າວ. 

ຢູ່ທີ່ງານວາງສະແດງຄັ້ງນີ້, ຕົວແທນຂອງບໍລິສັດ ໄດ້ຈັດເຄື່ອງວາງສະແດງທີ່ສຸມໃສ່ໂຄງການຕ່າງໆຈາກທຶນພັດທະນາຊຸມຊົນຂອງບໍລິສັດ ພູເບ້ຍ ມາຍນິງ (CDF) ແລະ ໂຄງການປັບປຸງຊີວິດການເປັນຢູ່ແບບຍືນຍົງ (SLP) ຊຶ່ງຊ່ວຍໃຫ້ຜູ້ເຂົ້າຮ່ວມງານຮຽນຮູ້ຫຼາຍຂຶ້ນກ່ຽວກັບການສະໜັບສະໜູນຂອງພວກເຮົາໃຫ້ບັນດາຊຸມຊົນທ້ອງຖິ່ນຢູ່ແຂວງໄຊສົມບູນ. ນອກຈາກນັ້ນ ຜູ້ເຂົ້າຮ່ວມງານຍັງໄດ້ພົບປະກັບຊຸມຊົນທ້ອງຖິ່ນທີ່ເຂົ້າຮ່ວມໂຄງການ SLP, ເພື່ອໂອ້ລົມເຖິງໂອກາດຕ່າງໆໃນການຮ່ວມມືດ້ານການຄ້າໃນອະນາຄົດ ແລະ ມີໂອກາດຈັດຊື້ໝາກໄມ້ ແລະ ຜັກສະອາດທີ່ຜະລິດໃນທ້ອງຖິ່ນ. 

ວຽກງານ SLP ຂອງບໍລິສັດ ແມ່ນເລີ້ມດໍາເນີນໃນປີ 2018 ເພື່ອຊ່ວຍຊຸມຊົນທ້ອງຖິ່ນພັດທະນາຜະລິດຕະພັນກະສິກໍາສະອາດ ແລະ ຄຸນນະພາບດີ ເພື່ອຂາຍເປັນສິນຄ້າ. ປັດຈຸບັນ, ບໍລິສັດ ພູເບ້ຍ ມາຍນິງ ໄດ້ສໍາເລັດໂຄງການ CDF 436 ໂຄງການຢູ່ບ້ານນໍ້າໂມ້, ບ້ານນໍ້າຍອນ ແລະ ບ້ານນາໄຊສະຫວ່າງ, ຕະຫຼອດ 15 ປີຜ່ານມາ, ຕົກເປັນເງິນຈໍານວນ 4,945,772 ໂດລາສະຫະລັດ,. CDF ສຸມໃສ່ 6 ຂະແໜງການຄື: ກະສິກໍາ, ການສຶກສາ, ສາທາລະນະສຸກຊຸມຊົນ, ການສະໜອງພື້ນຖານໂຄງລ່າງ, ການພັດທະນາທຸລະກິດຂະໜາດນ້ອຍ & ການເຂົ້າເຖິງແຫຼ່ງທຶນ, ແລະການສ້າງຂີດຄວາມສາມາດໃຫ້ອົງການຈັດຕັ້ງທ້ອງຖິ່ນ. 

ທ່ານ ດາລິງ ເຊັງ, ຜູ້ອໍານວຍການໃຫຍ່ ແລະປະທານບໍລິຫານຂອງບໍລິສັດ ແພນອອສ໌, ສະແດງຄວາມຍິນດີກັບພາກລັດ ແລະປະຊາຊົນແຂວງໄຊສົມບູນ ສໍາລັບມິດຕະພາບທີ່ດີ ຕະຫຼອດທົດສະວັດຜ່ານມາ.

ທ່ານ ດາລິງ ເຊັງກ່າວວ່າ “ຕະຫຼອດໄລຍະ 10 ປີຜ່ານມາ, ບໍລິສັດ ພູເບ້ຍ ມາຍນິງ ໄດ້ຮ່ວມມືກັບພາກລັດຂັ້ນແຂວງ ແລະສູນກາງ ເພື່ອປັບປຸງຊີວິດການເປັນຢູ່ຂອງບັນດາຊຸມຊົນທ້ອງຖິ່ນພາຍໃນປະເທດເວົ້າລວມ, ເວົ້າສະເພາະແມ່ນແຂວງໄຊສົມບູນ. ໃນປີ 2022, ການມອບພັນທະຕ່າງໆຂອງພວກເຮົາເຂົ້າໃນງົບປະມານຂອງແຂວງໄຊສົມບູນ ລວມທັງໝົດຈໍານວນ 56.9 ລ້ານໂດລາສະຫະລັດ, ຄິດເປັນ 77 ສ່ວນຮ້ອຍຂອງການປະກອບສ່ວນທັງໝົດຂອງບໍລິສັດ ພູເບ້ຍ ມາຍນິງ ໃນປະເທດ. ໃນປີ 2023, ຄາດວ່າບໍລິສັດ ພູເບ້ຍ ມາຍນິງ ຈະມອບພັນທະປະມານ 70 ລ້ານໂດລາສະຫະລັດໃຫ້ແຂວງໄຊສົມບູນ.

“ການມອບພັນທະດັ່ງກ່າວນີ້ ແລະການລົງທຶນໃນ CDF ແລະ SLP ອື່ນໆ ແມ່ນສ່ວນສໍາຄັນຂອງເປົ້າໝາຍໄລຍະຍາວຂອງພວກເຮົາເພື່ອເຮັດໃຫ້ທຸລະກິດເຕີບໃຫຍ່ຂະຫຍາຍຕົວ ຢູ່ແຂວງໄຊສົມບູນ ແລະສ້າງຜົນດີດ້ານເສດຖະກິດ-ສັງຄົມໃຫ້ປະເທດ.”

ທ່ານ ຈັນເພັງ ບຸນນະຜົນ, ປະທານບໍລິສັດ ພູເບ້ຍ ມາຍນິງ, ໃຫ້ຮູ້ຕື່ມອີກວ່າ “ພວກເຮົາມຸ້ງໝັ້ນທີ່ຈະຂະຫຍາຍທຸລະກິດໃນລາວໄປອີກທົດສະວັດໜຶ່ງ ແລະສືບຕໍ່ສ້າງອຸດສາຫະກໍາບໍ່ແຮ່ໃຫ້ເຂັ້ມແຂງໃນລາວ. ພວກເຮົາມີຄວາມສາມາດດ້ານການເງິນ ແລະເຕັກນິກໃນການຈັດຕັ້ງ ແລະລົງທຶນເຂົ້າໃນໂຄງການໃໝ່ໆ ຊຶ່ງຈະນໍາເອົາຄວາມຈະເລີນຮຸ່ງເຮືອງມາໃຫ້ລັດຖະບານ ແລະປະຊາຊົນລາວ.”

 

แชร์