ຍິງປືນສະແດງ-ສາທິດຍຸດທະວິທີສູ້ຮົບສະຫຼອງວັນສ້າງຕັ້ງກອງທັບ ຄົບຮອບ 75 ປີ

ກະຊວງປ້ອງກັນປະເທດ ໄດ້ຈັດກິດຈະກຳຍິງປືນສະແດງ ແລະສາທິດຍຸດທະວິທີການສູ້ຮົບເພື່ອສະເຫລີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ໃນວັນທີ 17 ມັງກອນ 2024 ຢູ່ສະໜາມຫັດແອບວິທະຍາຄານນາຍທະຫານບົກກົມມະດຳ ເມືອງໂພນໂຮງ ແຂວງວຽງຈັນ ໂດຍມີທ່ານ ທອງລຸນ ສີສຸລິດ ປະທານປະເທດ, ທ່ານ ສອນໄຊ ສີພັນດອນ ນາຍົກລັດຖະມົນຕີ, ທ່ານ ບຸນທອງ ຈິດມະນີ ຮອງປະທານປະເທດ, ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ມີຮອງນາຍົກລັດຖະມົນຕີ, ບັນດາການ ນໍາພັກ, ລັດພ້ອມດ້ວຍນາຍ ແລະ ພົນທະຫານ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ໃນຄັ້ງນີ້, ມີຫຼາຍລາຍການສະແດງທີ່ໜ້າຕື່ນເຕັ້ນ ແລະປະທັບໃຈເປັນຕົ້ນການສະແດງສິລະປະກອນ, ສະແດງມວຍຫັດກາຍ, ມວຍສູ້ຮົບ, ສະແດງຍຸດທະວິທີສູ້ຮົບບຸກຄົນ, ຍິງເປີດປ້າຍຄຳຂວັນ (ນໍ້າໃຈ 20 ມັງກອນ ໝັ້ນຍືນ), ສະແດງປິດລັບຫລອນຕີ ສູນບັນຊາຂອງສັດຕູ, ການສະແດງໂດດຈ້ອງລົງດັບສູນສັດຕູຢູ່ແນວຫລັງ (ທໍາລາຍກຸ່ມສາງອາວຸດຂອງສັດຕູ), ການນຳໃຊ້ປືນໃຫຍ່ເຄື່ອນທີ່ 122 ມມ ແລະປືນເບແອັມ-21, ການນຳໃຊ້ລົດຕັງ T-72 ເຄື່ອນທີ່ ແລະ ຄົງທີ່ ຍິງທຳລາຍເປົ້າໝາຍເຫລົ່າຮົບລົດຕັງຍານເກາະ, ການນໍາໃຊ້ກຳລັງໄຟຍິງກຽມ, ເຫລົ່າຮົບຊ່າງແສງສົ່ງໂບກຝ່າບິນ,ເປີດທາງໄຂໃຫ້ເພື່ອປະຕິບັດບຸກຕີສັດຕູ,ການກອບກູ້ທະຫານຖືກບາດເຈັບອອກຈາກສະໜາມ,ການນຳໃຊ້ປືນ 57 ມມ ຍິງດັບສູນເປົ້າໝາຍເທິງອາກາດ, ການສະແດງສືບຂ່າວສະໜາມສັດຕູຫລອນຕີທາດພິດເຄມີ ແລະ ປະ ຕິບັດລຶບລ້າງທາດພິດໃຫ້ຄົນ ແລະ ພາຫະນະສູ້ຮົບເຫລົ່າຮົບເຄມີ; ສະແດງການຂັບຂີ່ລົດຕັງ ຂອງເອື້ອຍນ້ອງຍິງກອງພັນໃຫຍ່ 661, ນຳໃຊ້ກ້ອນກຳລັງສະແດງຮູບແຖວຄົງທີ່, ເຄື່ອນທີ່, ປະສານສຽງເສບ, ສະແດງຮູບແຖວເປັນຄື້ນປະສານສຽງເສບ ແລະ ສະແດງຮູບແຖວຮ້ອງເພງ ໄດ້ນຳໃຊ້ 4 ຝູງບິນ ຄື: ຝູງບິນຍົນຫັດແອບຂັ້ນຕົ້ນ, ຝູງບິນຍົນຂຶ້ນຊື່, ຝູງບິນອາຍພົ່ນຫັດແອບ, ຍັກ 130 ເປັນເຄື່ອງບິນສູ້ຮົບບິນສະແດງຢູ່ເທິງດ່ານຟ້າ. ພ້ອມນີ້, ຍັງມີທີມເຄື່ອງບິນກອງທັບອາກາດປະຊາຊົນຈີນນົກເຂົາແດງມາຮ່ວມສ້າງບັນຍາກາດ ໂດຍນໍາໃຊ້ເຄື່ອງບິນອາຍພົ່ນ GL8 ຈໍານວນ 8 ລໍາ ບິນສະແດງຢູ່ເທິງຟ້າໃຫ້ໄດ້ຊົມຢ່າງສວຍງາມ.

ໂອກາດດັ່ງກ່າວ, ທ່ານ ພົທ ຄຳລຽງ ອຸທະໄກສອນ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບ ໄດ້ໃຫ້ຮູ້ວ່າ: ນການຈັດກິດຈະກຳໃນຄັ້ງນີ້, ນອກຈາກເປັນການສະເຫລີມສະຫລອງວັນສ້າງຕັ້ງກອງທັບຄົບຮອບ 75 ປີແລ້ວ, ຍັງເປັນການສະແດງໃຫ້ເຫັນເຖິງຄວາມເຂັ້ມແຂງຂອງ ກອງທັບປະຊາຊົນລາວກໍຄືຍຸດທະວິທີໃນການສູ້ຮົບຂອງແຕ່ລະກົມກອງ ແລະອື່ນໆ.

ກອງທັບປະຊາຊົນລາວກຳເນີດເກີດຂຶ້ນໃນທ່າມກາງປະເທດຊາດຖືກພວກລ່າເມືອງຂຶ້ນເຂົ້າມາຮຸກຮານ ແລະຄອບຄອງປະເທດລາວໂດຍພາຍໃຕ້ການນຳພາຂອງພັກ, ປະຊາຊົນລາວບັນດາເຜົ່າ ໄດ້ລຸກຮືຂຶ້ນຕໍ່ສູ້ຕ້ານການຮຸກຮານ ຢ່າງເປັນຂະບວນຟົດຟື້ນໃນທົ່ວປະເທດ, ໃນວັນທີ 20 ມັງກອນ 1949 ກອງທັບລາວອິດສະຫລະໄດ້ຮັບການປະກາດສ້າງຕັ້ງຂຶ້ນ (ເຊິ່ງເປັນຕົ້ນກຳເນີດຂອງກອງທັບເຮົາໃນປັດຈຸບັນ) ຢູ່ເຂດລາວຮຸ່ງ ພຽງສາ ເມືອງຊຽງຄໍ້ ແຂວງຫົວພັນ ໂດຍແມ່ນ ປະທານ ໄກສອນ ພົມວິຫານ ເປັນຜູ້ປະກາດສ້າງຕັ້ງ ແລະ ຊີ້ນຳບັນຊາໂດຍກົງ, ນັບແຕ່ກອງທັບໄດ້ຮັບການສ້າງຕັ້ງຂຶ້ນ ກໍໄດ້ຮັບພາລະອັນໜັກໜ່ວງຕໍ່ສູ້ຕ້ານກັບຈັກກະພັດຜູ້ຮຸກຮານທັງແບບເກົ່າ ແລະ ໃໝ່ທີ່ມີອາວຸດ, ພາຫະ ນະສົງຄາມ ແລະ ກຳລັງພົນທີ່ເໜືອກວ່າ. ເພື່ອປົກປັກຮັກສາປະເທດຊາດ ແຕ່ດ້ວຍນໍ້າໃຈຮັກຊາດເດັດດ່ຽວໜຽວແໜ້ນ, ບໍ່ຍອມຈໍານົນກອງທັບໄດ້ຮ່ວມກັບປະຊາຊົນລາວບັນດາເຜົ່າສືບຕໍ່ດຳເນີນການຕໍ່ສູ້ຢ່າງອົງອາດກ້າຫານຍິ່ງຕີຍິ່ງໄດ້ຮັບໄຊຊະນະ, ຍິ່ງຕີຍິ່ງເຕີບໃຫຍ່ເຂັ້ມແຂງຈົນສາມາດປົດປ່ອຍປະເທດຊາດໄດ້ຢ່າງສົມບູນ ແລະ ສ້າງຕັ້ງລະບອບໃໝ່ ສາທາລະນະລັດປະ ຊາທິປະໄຕປະຊາຊົນລາວ ໃນວັນທີ 2 ທັນວາ 1975. ພາຍຫລັງປະເທດຊາດໄດ້ຮັບການປົດປ່ອຍກອງທັບກໍໄດ້ປະຕິບັດສອງໜ້າທີ່ຍຸດທະສາດປົກປັກຮັກສາ ແລະສ້າງສາພັດທະນາປະເທດຊາດ, ສືບຕໍ່ເສີມຂະຫຍາຍທາດແທ້ມູນເຊື້ອຂອງກອງທັບ, ປັບປຸງກໍ່ສ້າງກໍາລັງ, ອົບຮົບ-ຫັດແອບ, ປັບປຸງລະບຽບແບບແຜນເຮັດໃຫ້ກອງທັບນັບມື້ເຕີບໃຫຍ່ເຂັ້ມແຂງ ແລະທັນສະໄໝຂຶ້ນເທື່ອລະກ້າວ.
ທີ່ມາ: ຂປລ

แชร์