ອັດຕະປື ຈະຢຸດການຂຸດຄົ້ນຄຳຕົກຂ້ອນ ນັບແຕ່ປີ 2024 ເປັນຕົ້ນໄປ

ຕາມການຕົກລົງຂອງຄະນະປະຈຳພັກແຂວງ, ນັບແຕ່ປີ 2024 ເປັນຕົ້ນໄປ ແຂວງອັດຕະປື ຈະໄດ້ຢຸດຕິການຂຸດຄົ້ນຄໍາຕົກຂ້ອນໃນທົ່ວແຂວງຊຶ່ງລາຍລະອຽດໄດ້ມອບໃຫ້ພະແນກພະລັງງານ ແລະ ບໍ່ແຮ່ແຂວງ ຮ່າງຄຳສັ່ງດັ່ງກ່າວ, ຄາດວ່າຈະໄດ້ລົງລາຍເຊັນ ແລະ ເລີ່ມຈັດຕັ້ງປະຕິບັດໃນໄວໆນີ້.

ທ່ານ ພົນໂທ ວັນທອງ ກອງມະນີ ເຈົ້າແຂວງອັດຕະປື ໄດ້ລາຍງານໃນກອງປະຊຸມສະໄໝສາ ມັນເທື່ອທີ 6 ຂອງສະພາປະຊາຊົນ ແຂວງອັດຕະປື ຊຸດທີ II ໃນວັນທີ 16-18 ມັງກອນ 2024 ກ່ຽວກັບແຜນພັດທະນາເສດຖະກິດ-ສັງຄົມ ຂອງອົງການປົກຄອງແຂວງວ່າ: ຕໍ່ກັບການຕັດສິນໃຈ ແລະ ການຕົກລົງຂອງຄະນະປະຈຳພັກແຂວງ ຕໍ່ກັບການໄດ້ຢຸດຕິການຂຸດຄົ້ນຄໍາຕົກຂ້ອນໃນທົ່ວແຂວງ ໄດ້ສ້າງຄວາມປະທັບໃຈ ແລະ ໃຫ້ການສະໜັບສະໜູນຈາກສະມາຊິກສະພາປະຊາຊົນແຂວງເປັນຈຳນວນຫລາຍ ໂດຍຢຶດໝັ້ນກຳນົດເອົາຫລັກການນຳພາຂອງພັກ ແລະ ລະບຽບກົດໝາຍຂອງລັດເປັນທີ່ຕັ້ງ, ການລົງທຶນຕ້ອງຮັບປະກັນໄດ້ຕໍ່ໜ້າກົດໜາຍ ແລະ ລະບຽບການຂອງລັດວາງອອກຢ່າງເຄັ່ງຄັດ ເພາະ ວ່າການຢຸດຕິການຂຸດຄົ້ນຄຳຕົກຂ້ອນ ທີ່ຕັ້ງຈຸດຂຸດຄົ້ນຕາມແຄມສາຍນ້ຳເຊກອງ, ເຊກະໜານ ແລະ ຕາມຫ້ວຍຮ່ອງຕ່າງໆ ໃນໄລຍະຜ່ານມາແມ່ນມີຜົນກະທົບ ທີ່ຕິດພັນກັບການດຳລົງຊີວິດຂອງປະຊາຊົນ ຢູ່ບາງທ້ອງຖິ່ນ ແລະ ບາງຈຸດບໍ່ຮັບປະກັນຄວາມປອດໄພທາງດ້ານສະພາບແວດລ້ອມ ແລະ ບັນຫາອື່ນໆທີ່ອາດຈະເກີດຂຶ້ນ. ສ່ວນບັນຫາກ່ຽວກັບການຂຸດຄົ້ນໄມ້ ແມ່ນໃຫ້ເຂັ້ມງວດການປະຕິບັດຄໍາສັ່ງ ເລກທີ 16 ຂອງເຈົ້າແຂວງ, ລົງວັນທີ 28 ກັນຍາ 2023 ວ່າດ້ວຍການເພີ່ມທະວີ ຄວາມເຂັ້ມງວດໃນການຄຸ້ມຄອງ, ປົກປັກຮັກສາປ່າໄມ້.

ທ່ານ ພົນໂທ ວັນທອງ ກອງມະນີ ຍັງໃຫ້ຮູ້ອີກວ່າ: ສຳລັບທິດທາງແຜນພັດທະນາເສດຖະກິດ-ສັງຄົມ ປະຈຳປີ 2024. ນອກຈາກຈະໄດ້ຢຸດຕິການຂຸດຄົ້ນຄໍາຕົກຂ້ອນໃນທົ່ວແຂວງ, ຈະສູ້ຊົນໃຫ້ ລວມຍອດຜະລິດຕະພັນພາຍໃນ(GDP) ເພີ່ມຂຶ້ນບໍ່ຫລຸດ 6,92% ໂດຍອີງໃສ່ທ່າແຮງບົ່ມຊ້ອນ ແລະ ສະພາບເອື້ອອຳນວຍທາງດ້ານການຊອກແຫລ່ງລາຍຮັບເຂົ້າງົບມານແຫ່ງລັດ. ໃນນີ້, ຂະແໜງກະສິກຳ ເພີ່ມຂຶ້ນ 8,49% ກວມເອົາ 48,43% ຂອງ GDP; ຂະແໜງອຸດສາຫະກຳ ເພີ່ມຂຶ້ນ 4,27% ກວມເອົາ 23,27% ແລະ ຂະແໜງບໍລິການ ເພີ່ມຂຶ້ນ 5,05% ກວມເອົາ 28,29% ຂອງ GDP, ລວມຍອດຜະລິດຕະພັນພາຍໃນ ຄິດເປັນມູນຄ່າຕາມລາຄາໃນປີ 6.61 ຕື້ກີບ; ສະເລ່ຍຕໍ່ຫົວຄົນ 40,28 ລ້ານກີບ ຫລື ເທົ່າກັບ 2.120 ໂດລາ. ພ້ອມທັງເກັບລາຍຮັບງົບປະມານ ໃຫ້ໄດ້ 750 ຕື້ກີບ ເພີ່ມຂຶ້ນ 29%. ໃນນີ້, ລາຍຮັບສູນກາງປະຕິບັດຢູ່ແຂວງ 116,4 ຕື້ກີບ, ລາຍຮັບທ້ອງຖິ່ນ 576,74 ຕື້ກີບ; ເລັ່ງທວງເກັບກູ້ໜີ້ສິນ ໃຫ້ໄດ້ 9,16 ລ້ານໂດລາ ແລະ 14,46 ຕື້ກີບ; ດຸ່ນດ່ຽງໃຫ້ສູນກາງ 259,15 ຕື້ກີບ ແລະ ລາຍຈ່າຍ 317,59 ຕື້ກີບ(ບໍ່ທັນໄລ່ຄ່າເພີ່ມເງິນເດືອນໃຫ້ພະນັກງານ-ລັດຖະກອນ); ຄວບຄຸມອັດຕາເງິນເຟີ້ ສະເລ່ຍໝົດປີ ໃຫ້ເພີ່ມຂຶ້ນຢູ່ໃນລະດັບ 1 ຕົວເລກ ແລະ ຄວບຄຸມອັດຕາສ່ວນໜີ້ບໍ່ເກີດດອກອອກຜົນ ໃຫ້ຢູ່ໃນລະດັບບໍ່ເກີນ 3% ຂອງຍອດສິນເຊື່ອທັງໝົດ.

ສ່ວນມູນຄ່າການນຳເຂົ້າ ແລະ ສົ່ງອອກ ຈະປະຕິບັດໃຫ້ໄດ້ 179,45 ລ້ານໂດລາ. ໃນນີ້, ມູນຄ່າການສົ່ງອອກ ໃຫ້ໄດ້ 163,45 ລ້ານໂດລາ ແລະ ນຳເຂົ້າ 16 ລ້ານໂດລາ; ການຄ້າເກີນດູນ 147,45 ລ້ານໂດລາ; ສູ້ຊົນລະດົມການລົງທຶນທົ່ວສັງຄົມ ໃຫ້ໄດ້ 3.084,5 ຕື້ກີບ ຫລື ເທົ່າກັບ 47% ຂອງ GDP. ໃນນີ້, ການລົງທຶນຈາກງົບປະມານລັດ ປະມານ 38,5 ຕື້ກີບ ກວມເອົາ 1,25% ຂອງການລົງທຶນລວມທັງໝົດ; ການລົງທຶນຈາກການຊ່ວຍເຫລືອທາງການເພື່ອການພັດທະນາ(ODA) ປະມານ 215 ຕື້ກີບ ກວມເອົາ 6,97%, ການລົງທຶນຈາກພາກເອກະຊົນພາຍໃນ ແລະ ຕ່າງປະເທດປະມານ 1.258 ຕື້ກີບ, ກວມເອົາ 40,78% ແລະ ການສະໜອງສິນເຊື່ອຂອງທະນາຄານ ປະມານ 1.573 ຕື້ກີບ, ກວມເອົາ 51%, ກໍານົດເປົ້າໝາຍການລົງທຶນຢ່າງລະອຽດ ໂດຍສະເພາະ ໂຄງການໃໝ່ ແລະ ຈັດໂຄງການໃຫ້ເປັນຈຸດສຸມບູລິມະສິດ.
ຂ່າວ: ມັດສາ

แชร์