ເປີດເປັນທາງການ ວິທະຍາໄລ ເສນຮີວ

ວິທະຍາໄລ ເສນຮີວ (ST HUGH'S COLLEGE VIENTIANE) ໄດ້ຈັດຂຶ້ນໃນທີ 15 ມັງກອນ 2024 ທີ່ ໂນນສະຫວັນ, ເມືອງໄຊເສດຖາ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມມີ ທ່ານຮອງສາດສະດາຈານ ພຸດ ສົມມາລາວົງ ລັດຖະມົນຕີກະຊວງສຶກສາທິການ ແລະກິລາ, ທ່ານນາງ ເຂັມມະນີ ພົນເສນາ ລັດຖະມົນຕີ ຫົວໜ້າຫ້ອງວ່າການສໍານັກງານປະທານປະເທດ, ທ່ານນາງ ຈັນທະຈອນ ວົງໄຊ ຮອງປະທານ ສະພາການຄ້າ ແລະອຸດສະຫະກຳແຫ່ງຊາດລາວ, ມີຄະນະກົມອະຊີວະ ແລະກົມປະກັນຄຸນະພາບການສຶກສາ, ຄະນະຜູ້ອໍານວຍການ ວິທະຍາໄລ ເສນຮີວ ພ້ອມດ້ວຍແຂກຖືກເຊີນ ແລະພາກສ່ວນທີ່ກ່ຽວຂ້ອງ.

ທ່ານນາງ ປາດຖະໜາ ປັນຍາທິບ ຜູ້ອໍານວຍການໃຫຍ່ ວິທະຍາໄລ ເສນຮີວ ກ່າວວ່າ: ຈາກການສຶກສາມາເປັນເວລາ 20 ກວ່າປີ ແລະ ເປັນຜູ້ກໍ່ຕັ້ງໂຮງຮຽນນານາຊາດປັນຍາທິບ ໄດ້ເລັງເຫັນຄວາມສໍາຄັນຂອງການສຶກສາ ຫຼັງຈາກຮຽນຈົບລະດັບມັດທະຍົມແລ້ວ ເຂົາເຈົ້າຈະໄປຕໍ່ໃສ ຊຶ່ງມັນຈໍາເປັນອັນໜຶ່ງທີ່ຢາກສ້າງໂຮງຮຽນນີ້ຂຶ້ນ ເພື່ອເປັນທາງເລືອກອີກທາງໜຶ່ງ ໃຫ້ກັບນັກສຶກສາ ນອກຈາກຈະເດີນທາງໄປຕ່າງປະເທດແລ້ວ ຢູ່ໃນປະເທດກໍມີການສຶກສາທີ່ດີ ແລະ ໄດ້ມາດຕະຖານສາກົນຄືກັນ ຊຶ່ງເປັນທີ່ມາຂອງການກໍ່ຕັ້ງວິທະຍາໄລ ເສນຮີວ. ຊຶ່ງວິທະຍາໄລແຫ່ງນີ້ ໄດ້ມີການຄົ້ນຄວ້າຕັ້ງແຕ່ປີ 2015 ເປັນຕົ້ນມາ ໂດຍໄດ້ປຶກສາຫາລືຢ່າງໃກ້ຊິດກັບຄະນະບໍລິຫານຫຼາຍໆທ່ານໃນນັ້ນມີທ່ານ ຮີວ ອີວານສ ອະດີດເອກອັກຄະລະຖະທູດອັງກິດ ປະຈໍາ ສປປ ລາວ ຜູ້ມີອຸດົມການທາງດ້ານການສຶກສາອັນແຮງກ້າ ແລະ ທ່ານ ສົມສຸກ ພົມພະຈັນ ປະທານບໍລິສັດ ໂຕໂຍຕ້າລາວທານີ ທີ່ຕັດສິນໃຈໃນການຮ່ວມສ້າງຕັ້ງວິທະຍາໄລແຫ່ງນີ້. ຈາກນັ້ນຈຶ່ງໄດ້ໄປຢ້ຽມຢາມມະຫາວິທະຍາໄລຫຼາຍແຫ່ງໃນປະເທດອັງກິດ ເຖິງແມ່ນວ່າ ທ່ານ ຮີວ ຈະຫມົດວາລະໃນການປະຕິບັດຫນ້າທີ່ຢູ່ ສປປ ລາວແລ້ວ ເພິ່ນກໍຍັງສານຕໍ່ ພາລະກິດນີ້ ໂດຍນັດປະຊຸມທາງອອນລາຍ ຖາມເຖິງຄວາມຄືບຫນ້າໂຄງການຕລອດມາ ແລະຊ່ວຍເຫລືອປະສານງານຕລອດມາເພິ່ນແມ່ນຜູ້ຊ່ວຍຂັບເຄື່ອນ ອັນໃຫຍ່ຫລວງຕໍ່ພວກເຮົາ ເພື່ອຈາລຶກໄວ້ ຊຶ່ງຄຸນງາມຄວາມດີ ຂອງເພິ່ນ ວິທະຍາໄລແຫ່ງນີ້ ຈຶ່ງໄດ້ຕັ້ງຊື່ວ່າ "ເສນຮີວ " ກໍຄືໃຊ້ນາມຊື່ຂອງເພື່ອນັ້ນເອງ.

ທ່ານນາງ ປາດຖະໜາ ປັນຍາທິບ ກ່າວວ່າ: ວິທະຍາໄລ ເສນຮີວ ມີຫຼັກສູດການຮຽນ-ການສອນໄລຍະສັ້ນ ແລະ ໄລຍະຍາວ, ຄູອາຈານທີ່ຈະມາສອນແມ່ນເປັນຜູ້ທີ່ມີປະສົບການທັງຄູພາຍໃນປະເທດ ແລະ ຕ່າງປະເທດ, ປະຈຸບັນແມ່ນໄດ້ພົວພັນກັບມະຫາວິທະຍາໄລປະເທດອັງກິດ, ສິງກະໂປ ແລະປະເທດມາເລເຊຍ ເພື່ອແລກປ່ຽນຫຼັກສູດ ແລະ ບົດຮຽນຮ່ວມກັນ ແລະຍັງຈະມີການປຶກສາຫາລືໃນການຮ່ວມມື ກັບມະຫາວິທະຍາໄລຫລາຍໆແຫ່ງຂອງຫຼາຍປະເທດໃນໄວນີ້. ພວກເຮົາຈະເຮັດໃຫ້ດີທີ່ສຸດ ໃຫ້ເປັນໃບຫນ້າໃນຕາໃຫມ່ ດ້ວຍຄວາມເຊື່ອໃນທິດທາງດຽວກັນວ່າ ການສຶກສານີ້ເອງຈະເປັນກຸນແຈດອກສໍາຄັນເພື່ອໄຂປະຕູແຫ່ງຄວາມຮູ້ແບບໄຮ້ຂອບເຂດ ສ້າງອະນາຄົດ ແລະໂອກາດດີໆ ເຂົ້າມາໃນຊີວິດ ຂອງຊາວຫນຸ່ມກະດູກສັນຫລັງຂອງປະເທດຊາດເຮົາ.

ທ່ານ ຮີວ ອີວານສ ກ່າວວ່າ: ວິທະຍາໄລ ເສນຮີວ ບໍ່ໄດ້ເປັນພຽງທຸລະກິດຄອບຄົວເທົ່ານັ້ນ, ແຕ່ທ່ານນາງ ປາດຖະໜາ ປັນຍາທິບ ໄດ້ສະແດງເຫັນເຖິງຄວາມຫຼົງໄຫຼໃນການສຶກສາມາຕະຫຼອດຊີວິດ, ມັນເປັນຄວາມຫຼົງໄຫຼທີ່ຂ້າພະເຈົ້າເອງກໍໄດ້ມີດ້ວຍເຫດຜົນງ່າຍໆ ທີ່ວ່າຂ້າພະເຈົ້າມີທຸກມື້ນີ້ໄດ້ ມີອາຊີບການງານໄດ້ ກໍແມ່ນຍ້ອນການສຶກສາ. “ການສຶກສາເປັນອາວຸດທີ່ຊົງພະລັງທີ່ສຸດທີ່ທ່ານສາມາດໃຊ້ເພື່ອປ່ຽນແປງໂລກໄດ້” ແລະຂ້າພະເຈົ້າເຊື່ອວ່າ ທ່ານນາງ ປາດຖະໜາ ປັນຍາທິບ ມີວິໄສທັດທີ່ກວ້າງໄກທີ່ຕ້ອງການນໍາໃຊ້ພະລັງຂອງການສຶກສາເພື່ອປ່ຽນແປງໂອກາດສໍາລັບປະເທດລາວ.

ໂອກາດດັ່ງກ່າວ ທ່ານລັດຖະມົນຕີ ກະຊວງສຶກສາທິການ ແລະກິລາ ກ່າວວ່າ: ກໍໄດ້ສະແດງຄວາມຊົມເຊີຍ ຕໍ່ຜູ້ອໍານວຍການ ແລະພາກສ່ວນທີ່ກ່ຽວຂ້ອງທີ່ສາມາດສ້າງຕັ້ງວິທະຍາໄລແຫ່ງນີ້ຂຶ້ນມາໄດ້ ແລະຫວັງວ່າພາຍໃຕ້ການຊັກຍູ້ຊ່ວຍເຫຼືອ ແລະການຮ່ວມມືຂອງທຸກພາກສ່ວນທັງພາຍໃນ ແລະຕ່າງປະເທດຈະເຮັດໃຫ້ບັນຍາກາດ ແລະການດໍາເນີນການສຶກສາຢູ່ໃນວິທະຍາໄລແຫ່ງນີ້ໄດ້ຮັບການພັດທະນາຂຶ້ນຢ່າງບໍ່ຢຸດຢັ້ງ ແລະກ້າວເຂົ້າສູ່ຄັນນະພາບໃໝ່.

แชร์