ທ່ານ ຄຳພັນ ພົມມະທັດ ແລະທ່ານ ບຸນໂຈມ ອຸບົນປະເສີດ ຢ້ຽມຢາມກອງພັນທະຫານຮາບທີ 3

ວັນທີ 14 ມັງກອນ 2024, ທ່ານ ຄຳພັນ ພົມມະທັດ ປະທານກວດກາສູນກາງພັກ ປະທານອົງການກວດກາແຫ່ງລັດ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ແລະທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ພ້ອມດ້ວຍຄະນະນຳຂອງແຂວງ ໄດ້ລົງຢ້ຽມຢາມ ແລະມອບເຄື່ອງກິນ-ເຄື່ອງໃຊ້ໃຫ້ແກ່ກອງພັນທະຫານຮາບທີ 3 (ຕັ້ງຢູ່ຂອບເຂດບ້ານ ນາເຕີຍ ເມືອງຈຳພອນ).

ໃນໂອກາດນີ້, ສະຫາຍ ພັນໂທ ແກ້ວແກ່ນໃຈ ໄຊຍະແສນ ຫົວໜ້າການເມືອງກອງພັນທະຫານຮາບທີ 3 ໄດ້ລາຍງານໃຫ້ຮູ້ວ່າ: ກອງພັນທະຫານຮາບທີ 3 ປະກອບມີ 3 ກອງຮ້ອຍທະຫານຮາບ,1 ຄໍກຳລັງໄຟ ແລະ 1 ໝວດສຳນັກງານ, ມີຈຳນວນພົນທັງໝົດ 199 ສະຫາຍ, ຍິງ 12 ສະຫາຍ, ນາຍທະຫານ 99 ສະຫາຍ, ຍິງ 11 ສະຫາຍ, ມີໜ້າທີ່ກຳລັງເຄື່ອນໄຫວສູ້ຮົບໃຫ້ກອງບັນຊາການທະຫານແຂວງ, ຮັບຜິດຊອບໜູນໃຫ້ 3 ຕົວເມືອງຄື: ເມືອງຈຳພອນ, ຊົນນະບູລີ ແລະ ເມືອງໄຊພູທອງ, ພະນັກງານນັກຮົບໃນທົ່ວກົມກອງສ່ວນຫຼາຍມີແນວຄິດເຊື່ອມຊຶມ, ເຊື່ອໝັ້ນຕໍ່ການນຳພາຂອງພັກ-ລັດ, ຈັດຕັ້ງປະຕິບັດມະຕິຄຳສັ່ງຂອງຂັ້ນເທິງຢ່າງເຂັ້ມງວດ ຫ້າວຫັນຕໍ່ໜ້າທີ່ວຽກງານ ປະຕິບັດ 7 ລະບອບ 18 ວຽກໄດ້ດີ, ເຮັດສຳເລັດໜ້າທີ່ວຽກງານທີ່ໄດ້ຮັບການມອບໝາຍ. ໃນໂອກາດທີ່ການນຳຂັ້ນສູງໄດ້ມາຢ້ຽມຢາມກົມກອງ, ທາງຄະນະພັກ-ຄະນະບັນຊາກອງພັນທະຫານຮາບທີ 3 ກໍ່ໄດ້ສະເໜີຕໍ່ຂັ້ນເທິງ ຊ່ວຍປັບປຸງດ້ານພື້ນຖານໂຄງລ່າງ ໂດຍສະເພາະແມ່ນປັບປຸງດ້ານເຮືອນນອນໃຫ້ເຂົ້າສູ່ລະບົບຖາວອນ, ສະເໜີໃຫ້ຂັ້ນເທິງຊ່ວຍປັບປຸງລະບົບເສັ້ນທາງເຂົ້່າຄ້າຍ ແລະພາຍໃນບໍລິເວນຄ້າຍໃຫ້ຮັບປະກັນດີກວ່າເກົ່າ, ສະເໜີດິນທຳການຜະລິດ ແລະສ້າງສະໜາມຫັດແອບຂອງກົມກອງ.

ໃນໂອກາດລົງມາຢ້ຽມຢາມກອງພັນທະຫານຮາບທີ 3, ທ່ານ ຄຳພັນ ພົມມະທັດ ແລະທ່ານ ບຸນໂຈມ ອຸບົນປະເສີດ ແລະຄະນະນຳຂອງແຂວງກໍ່ໄດ້ມອບເຄື່ອງກິນ-ເຄື່ອງໃຊ້ໃຫ້ແກ່ກົມກອງດັ່ງກ່າວ ເຊິ່ງລວມມີ: ໝີ່ໄວໄວ 36 ແກັດ, ນ້ຳປາ 6 ແກັດ 180 ແກ້ວ, ແຟັບ 3 ແກັດ 180 ຊອງ, ສະບູ່ 180 ກ້ອນ, ຢາສີແຂ້ວ 180 ກ່ອງ, ຢາສະຫົວ 2 ແກັດໃຫຍ່ 180 ກ່ອງ, ຊຸດກິລາ 60 ຊຸດ, ໝາກບານ 5 ໜ່ວຍກະຕໍ້ 10 ໜ່ວຍ, ຕາໜ່າງ 2 ອັນ, ເຂົ້າສານ 300 ໂລ. ຈາກນັ້ນ, ຄະນະການນຳຂອງສູນກາງ ແລະຂັ້ນແຂວງກໍ່ໄດ້ເລາະເບິ່ງຄ້າຍຄູຂອງກອງພັນທະຫານຮາບທີ 3 ເພື່ອເບິ່ງສະພາບຕົວຈິງໃຫ້ແກ່ການໃຫ້ຂໍ້ມູນ ເພື່ອສະໜອງງົບປະມານໃນການກໍ່ສ້າງ ແລະສ້ອມແປງອາຄານ ແລະຫ້ອງການພາຍໃນຄ້າຍ.

แชร์