ທາບທາມຮ່າງກົດໝາຍການຕ້ານ-ສະກັດກັ້ນ ການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍ ຢູ່ພາກກາງ

ສໍານັກງານຂໍ້ມູນຕ້ານການຟອກເງິນກໍ່ຄືຄະນະຮັບຜິດຊອບຮັບຜິດຊອບຄົ້ນຄວ້າປັບປຸງກົດໝາຍວ່າດ້ວຍການຕ້ານສະກັດກັ້ນການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍ ສະບັບເລກທີ 50/ສພຊ, ລົງວັນທີ 21 ກໍລະກົດ 2014 ໄດ້ຈັດກອງປະຊຸມທາບທາມເປີດກວ້າງເພື່ອລະດົມຄວາມຄິດຕໍ່ຮ່າງກົດໝາຍດັ່ງກ່າວຂຶ້ນ ໃນວັນທີ 15 ມັງ ກອນ 2024, ທີ່ສະໂມສອນໃຫ່ຍສະຖາບັນການທະນາຄານ ໂດຍການເປັນປະທານຂອງທ່ານນາງ ວັດທະນາ ດາລາລອຍ ຮອງຜູ້ວ່າການ ທະນາຍຄານແຫ່ງ ສປປ ລາວ ທັງເປັນຫົວໜ້າຄະນະຮັບຜິດຊອບຮັບຜິດຊອບຄົ້ນຄວ້າປັບປຸງກົດໝາຍວ່າດ້ວຍການຕ້ານ-ສະກັດກັ້ນ ການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍ.

ກອງປະຊຸມດັ່ງກ່າວມີຜູ້ເຂົ້າຮ່ວມຈາກບັນດາກະຊວງ ແລະອົງການທຽບເທົ່າ ແລະສະມາຊິສະພາແຫ່ງຊາດ ພາຍໃນນະຄອນຫຼວງວຽງຈັນ ແລະບັນດາພະແນກການ ແລະ ຂະແໜງການກ່ຽວຂ້ອງ ໃນບັນດາແຂວງພາກກາງ (ລວມມີ ນະຄອນຫຼວງວຽງຈັນ, ແຂວງວຽງຈັນ, ໄຊຍະບູລີ, ຊຽງຂວາງ ແລະ ແຂວງບໍລິຄໍາໄຊ) ລວມທັງ ພາກສ່ວນເອກະຊົນ ກໍ່ຄື ຫົວໜ່ວຍທີ່ມີໜ້າທີ່ລາຍງານຈໍານວນໜຶ່ງ ເຊັ່ນ: ທະນາຄານທຸລະກິດ, ສະຖາບັນການເງິນຈຸລະພາກ, ບໍລິສັດປະກັນໄພ, ບໍລິສັດຫຼັກຊັບ, ບໍລິສັດໃຫ້ບໍລິການໂອນເງິນ, ກາຊິໂນ, ບໍລິສັດອະສັງຫາລິມາຊັບ, ທຸລະກິດຊື້-ຂາຍວັດຖຸມີຄ່າ, ວິສາຫະກິດກົດໝາຍ ແລະ ບໍລິສັດກວດສອບບັນຊີ. ໂດຍຈຸດປະສົງຂອງກອງປະຊຸມ ແມ່ນເປັນການຈັດຕັ້ງຜັນຂະຫຍາຍແຜນວຽກໃນການສ້າງ ແລະປັບປຸງນິຕິກໍາຂອງ ທະນາຄານແຫ່ງ ສປປ ລາວ ພ້ອມທັງເປັນການລະດົມຄໍາຄິດເຫັນຈາກພາກສ່ວນຈັດຕັ້ງປະຕິບັດຕົວຈິງທັງພາກລັດ ແລະເອກະຊົນ ເພື່ອໃຫ້ເນື້ອໃນຂອງຮ່າງກົດໝາຍດັ່ງກ່າວສາມາດຈັດຕັ້ງປະຕິບັດໄດ້ຕົວຈິງພາຍໃນ ສປປ ລາວ. ນອກຈາກນີ້, ຍັງເປັນການສ້າງຄວາມຮັບຮູ້ ແລະຄວາມເຂົ້າໃຈໃຫ້ພາກສ່ວນກ່ຽວຂ້ອງຕໍ່ກັບເນື້ອໃນຂອງຮ່າງກົດໝາຍທີ່ຕິດພັນກັບພາລະບົດບາດຂອງຕົນແນໃສ່ເພື່ອໃຫ້ສາມາດດໍາເນີນຂັ້ນຕອນຕໍ່ໄປໃນການປັບປຸງ ແລະນໍາສະເໜີຕໍ່ລັດຖະບານ ແລະ ສະພາແຫ່ງຊາດໃຫ້ທັນຕາມກໍານົດເວລາ.

แชร์