ໂຮງງານຜະລິດແປ້ງມັນຕົ້ນ ລາວທີທີແອວ ຕ້ອງແກ້ໄຂບັນຫາສິ່ງແວດລ້ອມຕາມຫາງສຽງສັງຄົມ

ໃນວັນທີ 13 ມັງກອນ ປີ 2024 ນີ້, ຫ້ອງການຊັບພະຍາກອນທໍາມະຊາດ ແລະສິ່ງແວດລ້ອມເມືອງໄຊບູລີ ຮ່ວມກັບຄະນະທີມງານຂັ້ນເມືອງ, ນາຍບ້ານມະນີລາດ, ເຊິ່ງນໍາໂດຍ ທ່ານ ສຸລິວົງ ສີວໍລະວົງ ຮອງເຈົ້າເມືອງໄຊບູລີ ຜູ້ຊີ້ນໍາວຽກງານວັດທະນະທໍາ-ສັງຄົມ ໄດ້ລົງພົບປະ ທ່ານ ຟານເທ໋ເລືອງ ເຈົ້າຂອງໂຮງງານຜະລິດແປ້ງມັນຕົ້ນລາວທີທີແອວ ພັດທະນາຄົບວົງຈອນຈໍາກັດ ຕັ້ງຢູ່ ບ້ານມະນີລາດ ເມືອງໄຊບູລີ ແຂວງສະຫວັນນະເຂດ. ເພື່ອຕິດຕາມກວດກາວຽກງານດ້ານສິ່ງແວດລ້ອມຕາມຫາງສຽງສັງຄົມທີ່ເກີດຂຶ້ນພາຍໃນໂຮງງານ.

ໂຮງງານດັ່ງກ່າວໄດ້ດຳເນີນການສ້າງຕັ້ງຂຶ້ນໃນປີ 2021, ເປັນໂຄງການຜະລິດແປ້ງມັນຕົ້ນເພື່ອຈໍາໜ່າຍ ແລະ ສົ່ງອອກສູ່ຕະຫຼາດພາຍໃນ ແລະ ຕ່າງປະເທດ. ໃນປະຈຸບັນໂຄງການໄດ້ສ້າງໂຮງງານສໍາເລັດແລ້ວໃນເດືອນພະຈິກ ປີ 2023 ແຕ່ຍັງບໍ່ທັນສົມບູນ 100%. ເຊິ່ງໄດ້ເລີ່ມດໍາເນີນການຜະລິດແບບທົດລອງໃນຄັ້ງວັນທີ 20 ພະຈິກ ປີ 2023 ເປັນຕົ້ນມາ. ດ້ານການຄຸ້ມຄອງສິ່ງແວດລ້ອມພາຍໃນ ແລະ ອ້ອມຂ້າງໂຮງງານ ແມ່ນມີສິ່ງທີ່ສາມາດຈັດຕັ້ງປະຕິບັດໄດ້ ແລະບໍ່ສາມາດຈັດຕັ້ງປະຕິບັດໄດ້. ຜ່ານການລົງຕິດຕາມກວດກາຕົວຈິງຂອງຄະນະທີມງານກວດກາພາກສະໜາມຂັ້ນເມືອງ ພົບເຫັນບັນຫາຜົນກະທົບທາງດ້ານສິ່ງແວດລ້ອມເປັນຕົ້ນ: ເກີດມີກິ່ນເໜັນຈາກການຜະລິດ, ມີບັນຫານໍ້າເປື້ອນທີ່ໄຫຼຊຶມລົງ ແຫຼ່ງນໍ້າທໍາມະຊາດ, ເກີດມີບັນຫາຝຸ່ນລະອອງໃນເວລາຂົນສົ່ງ ແລະ ເກີດມີສຽງດັງໃນການເນີນງານເວລາກາງຄືນ.

ດັ່ງນັ້ນທາງຄະນະກໍາມະການຕິດຕາມກວດກາຕົວຈິງຈິ່ງໄດ້ສະເໜີແນະນໍາທາງດ້ານວິຊາການໃຫ້ເຈົ້າຂອງໂຮງງານປະຕິບັດຕາມບົດບັນທຶກຂອງການຕິດຕາມກວດກາດ້ານສິ່ງແວດລ້ອມໂຄງການລົງທຶນໃນພາກສະໜາມສໍາລັບໂຮງງານຂອງພະແນກຊັບພະຍາກອນທໍາມະຊາດ ແລະສິ່ງແວດລ້ອມແຂວງສະຫວັນນະເຂດຮ່ວມກັບຫ້ອງການຊັບພະຍາ ກອນທໍາມະຊາດ ແລະ ສິ່ງແວດລ້ອມເມືອງໄຊບູລີ ໃນຄັ້ງວັນທີ 10 ມັງກອນ ປີ 2024 ນີ້. ແນາະນໍາ ແລະ ເຮັດບົດບັນທຶກເພີ່ມເຕີມໃນຄັ້ງນີ້ ໂດຍ ໃຫ້ໂຮງງານ ເຮັດທຸກວິທີທາງເພື່ອກັນນໍ້າທີ່ບໍ່ທັນບໍາບັດແລ້ວ ໄຫຼຊຶມລົງສູ່ແຫຼ່ງນໍ້າທໍາມະຊາດ ,ຢຸດຕິການປ່ອຍນໍ້າເປື້ອນລົງໃສ່ແຫຼ່ງນໍ້າທໍາມະຊາດ. ໃຫ້ໂຮງງານປົກປິດອ່າງນໍ້າເສຍ ອ່າງທີ 2 ເຊິ່ງເປັນອ່າງທີ່ສົ່ງກິ່ນເໜັນໃຫ້ສໍາເລັດພາຍໃນ 1 ເດືອນ. ສໍາລັບຂໍ້ມູນບາງດ້ານທີ່ຄະນະວິຊາການລົງຕິດຕາມກວດກາແລ້ວບໍ່ພົບເຫັນຕາມຫາງສຽງສັງຄົມທີ່ເກີດຂຶ້ນແມ່ນມອບໃຫ້ຄະປົກຄອງບ້ານມະນີລາດເປັນຜູ້ເກັບກໍາຂໍ້ມູນຕື່ມອີກ ແລະກ່ອນຈະເປີດທໍາການຜະລິດຢ່າງເປັນທາງການຈະຕ້ອງໄດ້ກວດກາຄືນທັງໝົດໂດຍອີງຕາມລະບຽບຫຼັກການຂອງໂຮງງານ ແລະພາກສ່ວນທີ່ກ່ຽວຂ້ອງ.

แชร์