ສໍາມະນາ “ຊາວໜຸ່ມລາວ ຮ່ວມແຮງຮ່ວມໃຈ ໃນການຫັນເປັນດິຈິຕອນ”

ວັນທີ 12 ມັງກອນ 2024 ນີ້, ກະຊວງເຕັກໂນໂລຊີ ແລະການສື່ສານ (ຄຊປປລ ກຕສ) ຮ່ວມກັບ ສູນກາງຊາວໜຸ່ມປະຊາຊົນປະຕິວັດລາວ ໄດ້ເປີດກອງປະຊຸມສໍາມະນາ ພາຍໃຕ້ຫົວຂໍ້ “ຊາວໜຸ່ມລາວ ຮ່ວມແຮງຮ່ວມໃຈ ໃນການຫັນເປັນດິຈິຕອນ” ຂຶ້ນທີ່ ຫໍປະຊຸມແຫ່ງຊາດ ໃນໂອກາດດໍາເນີນງານສັບປະດາດິຈິຕອນລາວ ປີ 2024 ໃນລະຫວ່າງວັນທີ 10-14 ມັງກອນນີ້, ໂດຍໃຫ້ກຽດເຂົ້າຮ່ວມເປັນຄະນະປະທານ ຂອງ ສະຫາຍ ບັນດິດ ສຈ. ບໍ່ວຽງຄໍາ ວົງດາລາ ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ແລະ ສະຫາຍ ມອນໄຊ ລາວມົວຊົ່ງ ເລຂາຄະນະບໍລິຫານງານ ສູນກາງຊາວໜຸ່ມປະຊາຊົນປະຕິວັດລາວ, ສະຫາຍ ພວງປະເສີດ ແກ້ວສຸວັນ ເລຂາ ຄຊປປລ ກຕສ, ຊຶ່ງມີ ຄຊປປລ ກະຊວງ, ອົງການ, ແຂວງ/ນະຄອນຫຼວງ, ມີບັນດາຄະນະຮາກຖານ/ຄະນະໜ່ວຍ ອ້ອມຂ້າງກະຊວງ ພ້ອມດ້ວຍແຂກທີ່ຖືກເຊີນ ເຂົ້າຮ່ວມ.

ໂອກາດກ່າວເປີດກອງປະຊຸມຄັ້ງນີ້, ສະຫາຍ ບັນດິດ ສຈ.ບໍ່ວຽງຄໍາ ວົງດາລາ ໄດ້ກ່າວວ່າ: ຊາວໜຸ່ມຄືອະນາຄົດຂອງປະເທດຊາດ, ຊາວໜຸ່ມເປັນກຳລັງແຮງໃນການພັດທະນາເສດຖະກິດ-ສັງຄົມຂອງທຸກໆປະເທດ, ຊາວໜຸ່ມລາວໃນເມື່ອກ່ອນໄດ້ເປັນກຳລັງປະກອບອາວຸດ ເສຍສະລະເລືອດເນື້ອ ແລະຊີວິດເພື່ອປົດປ່ອຍປະເທດຊາດເຮົາອອກຈາກຄວາມເປັນຂ້ອຍຂ້າຂອງພວກລ່າເມືອງຂຶ້ນ ຈົນສາມາດສະຖາປະນາ ສປປ ລາວ ຂຶ້ນຢ່າງສະຫງ່າຜ່າເຜີຍ. ສະນັ້ນ, ຊາວໜຸ່ມລາວໃນຍຸກປັດຈຸບັນຈະຕ້ອງສືບຕໍ່ປົກປັກຮັກສາ ແລະ ສ້າງສາປະເທດຊາດເຮົາໃຫ້ຈະເລີນຮຸ່ງເຮືອງ. ທ່ານ ປະທານ ໄກສອນ ໄດ້ສັ່ງສອນໄວ້ວ່າ: “ຊາວໜຸ່ມຈົ່ງເປັນດັ່ງນັກຮົບອິນຊີທີ່ບໍ່ຫວາດຫວັ່ນຕໍ່ພາຍຸລົມແດງ, ຊາວໜຸ່ມຈົ່ງເປັນສິນໄຊຂອງຍຸກສະໄໝ” ນີ້ເປັນຄຳເວົ້າອັນສັກກະລະບູຊາຊຶ່ງຊາວໜຸ່ມລາວຈະຕ້ອງໄດ້ຈັດຕັ້ງປະຕິບັດ. ໃນຍຸກປະຈຸບັນນີ້ ແມ່ນຍຸກແຫ່ງການປະຕິວັດອຸດສາຫະກຳ ຄັ້ງທີ 4 ກຳລັງເປັນພາຍຸລົມແດງພັດຜ່ານໄປທົ່ວໂລກ, ຍຸກດັ່ງກ່າວແມ່ນຍຸກແຫ່ງການຫັນເປັນດິຈິຕອນ, ໝາຍຄວາມວ່າ ແມ່ນຍຸກແຫ່ງການນຳໃຊ້ເຕັກໂນໂລຊີດິຈິຕອນ ເຂົ້າໃນທຸກຂົງເຂດວຽກງານຂອງສັງຄົມເພື່ອຫັນປ່ຽນຈິນຕະນາການ, ຫັນປ່ຽນແບບແຜນວິທີເຮັດວຽກໃຫ້ມີປະສິດທິຜົນດີກວ່າເກົ່າ, ມີຄຸນນະພາບດີຂື້ນກວ່າເກົ່າ. ສະນັ້ນ, ຊາວໜຸ່ມລາວຈະຕ້ອງໄດ້ພ້ອມກັນຕັດສິນໃຈຮໍ່າຮຽນຄົ້ນຄວ້າເພື່ອສ້າງທັກສະດິຈິຕອນໃຫ້ສາມາດເປັນເຈົ້າເຕັກໂນໂລຊີດິຈິຕອນໃນທຸກຂົງເຂດວຽກງານ, ຕ້ອງຮຽນຮູ້ວິຊາຊີບໃໝ່ ເຊັ່ນ: ການຄຸ້ມຄອງ ແລະ ນຳໃຊ້ຖາມຂໍ້ມູນມະຫາສານ (Big Data), ການພັດທະນາກຸ່ມຂໍ້ມູນຜູກພັນ (Blockchaine), ນໍາໃຊ້ປັຍາປະດິດ (AI), ວິສະວະກໍາພັນທຸກໍາ, ນາໂນເຕັກໂນໂລຊີ, ຊຶ່ງເປັນເຕັກໂນໂລຊີໃນຍຸກສະໄໝ 4.0 ເພື່ອຫັນເປັນດິຈິຕອນ ນີ້ແມ່ນວິຊາຄວາມຮູ້ຂອງ ສັງສິນໄຊ ໃນຍຸກສະໄໝໃໝ່. ຍ້ອນແນວນັ້ນ ມື້ນີ້ ກະຊວງເຕັກໂນໂລຊີ ແລະ ການສື່ສານ ຈຶ່ງໄດ້ຮ່ວມກັບ ສູນກາງຊາວໜຸ່ມປະຊາຊົນ ປະຕິວັດລາວ ຈັດເວທີສຳມະນານີ້ຂຶ້ນເປັນຄັ້ງທຳອິດ ເພື່ອເປັນສຽງແກຕະລຸມບອນປຸກລະດົມຊາວໜຸ່ມລາວໃນທົ່ວປະເທດຈົ່ງລຸກຂຶ້ນມາສຶກສາຮໍ່າຮຽນ ລົບລ້າງໄພກືກດິຈິຕອນ, ສ້າງທັກສະດິຈິຕອນໃຫ້ເຂັ້ມແຂງ ເພື່ອເປັນກຳລັງແຮງຕົ້ນຕໍໃນການຫັນເປັນດິຈິຕອນຂອງປະເທດເຮົາ. ນີ້ເປັນພາລະກຳປະຫວັດສາດທີ່ພັກ-ລັດ ມອບໝາຍໃຫ້ຊາວໜຸ່ມລາວ ໃນການສືບທອດພາລະກິດປະຕິວັດ ເພື່ອປົກປັກຮັກສາ ແລະ ສ້າງສາພັດທະນາປະເທດຊາດ, ເປັນໂອກາດທີ່ຈະນຳເອົາປະເທດເຮົາຫຼຸດພົ້ນຈາກຄວາມດ້ອຍພັດທະນາ ແລະ ນີ້ແມ່ນພາລະໜ້າທີ່ອັນມີກຽດສູງສົ່ງຂອງຊາວໜຸ່ມໃນຍຸກສະໄໝນີ້.

ພ້ອມດຽວກັນນັ້ນ, ສະຫາຍ ເລຂາຄະນະບໍລິຫານງານ ສູນກາງຊາວໜຸ່ມປະຊາຊົນປະຕິວັດລາວ ກໍໄດ້ມີຄໍາເຫັນຕໍ່ພິທີ ຊຶ່ງສະຫາຍໄດ້ຍົກໃຫ້ເຫັນເຖິງບົດບາດຄວາມສໍາຄັນຂອງການຫັນເປັນດິຈິຕອນ ແມ່ນມີຜົນດີຕໍ່ກັບຊາວໜຸ່ມ ຊຶ່ງໄດ້ອໍານວຍຄວາມສະດວກໃນການຕິດຕໍ່ສື່ສານແບບບໍ່ມີພົມແດນ, ບໍ່ວ່າຈະໄກກັນພຽງໃດກໍສາມາດຕິດຕໍ່ຫາກັນໄດ້ໄວທີ່ສຸດ. ນອນນັ້ນ, ຍັງນໍາໃຊ້ເຂົ້າໃນການພັດທະນາລະບົບບໍລິຫານ-ບໍລິການໃຫ້ເປັນທັນສະໄໝ.

ກອງປະຊຸມສໍາມະນາຄັ້ງນີ້ ປະກອບມີຫຼາຍຫົວຂໍ້ທີ່ສໍາຄັນ ເຊັ່ນ: ການຫັນເປັນດິຈິຕອນ ເພື່ອພັດທະນາເສດຖະກິດດິຈິຕອນ ຂອງ ສປປ ລາວ, ບາງບົດຮຽນການຫັນເປັນດິຈິຕອນ ຂອງຄະນະບໍລິຫານງານຊາວໜຸ່ມ ກະຊວງ, ອົງການ ແລະ ແຂວງ, ຄວາມປອດໄພທາງດ້ານໄຊເບີ, ວິຖີຊີວິດຂອງຊາວໜຸ່ມລາວໃນຍຸກດິຈິຕອນ, ການສ້າງຂະບວນການຊົມໃຊ້ຜະລິດຕະພັນພາຍໃນປະເທດ, ການສ້າງສື່ຍຸກໃໝ່ ພິຊິດໃຈສັງຄົມ.

ໃນໂອກາດຽວກັນ, ກໍໄດ້ມີພິທີເຊັນບົດບັນທຶກ ວ່າດ້ວຍ ການຮ່ວມມື ດ້ານເຕັກໂນໂລຊີ ແລະການສື່ສານ ໃນຂົງເຂດວຽກງານຊາວໜຸ່ມ-ເຍົາວະຊົນ ລະຫວ່າງ ກະຊວງເຕັກໂນໂລຊີ ແລະ ການສື່ສານ ແລະ ສູນກາງຊາວໜຸ່ມປະຊາຊົນປະຕິວັດລາວ (ສຊປລ) ເພື່ອກໍານົດຂອບເຂດການຮ່ວມມືດ້ານເຕັກໂນໂລຊີ ແລະການສື່ສານຂອງທັງສອງຝ່າຍ ໃນການພັດທະນາຊາວໜຸ່ມ-ເຍົາວະຊົນລາວ ໃຫ້ກາຍເປັນນັກຄົ້ນຄວ້າ ແລະນັກພັດທະນາ ທີ່ມີຄວາມເຂົ້າໃຈຢ່າງເລິກເຊິ່ງກ່ຽວກັບບົດບາດຄວາມສຳຄັນຂອງວຽກງານເຕັກໂນໂລຊີ ແລະການສື່ສານ ກັບການພັດທະນາເສດຖະກິດຂອງຊາດ. ໃຫ້ກຽດລົງນາມໃນບົດບັນທຶກຄວາມເຂົ້າໃຈໃນຄັ້ງນີ້ໂດຍສະຫາຍ ບັນດິດ ສຈ. ບໍ່ວຽງຄໍາ ວົງດາລາ ແລະ ສະຫາຍ ມອນໄຊ ລາວມົວຊົ່ງ .

แชร์