ກອງປະຊຸມວຽກງານເຕັກໂນໂລຊີ ແລະການສື່ສານ ປະຈໍາປີ 2023 ຈັດຂຶ້ນວັນທີ 11 ມັງກອນ 2024 ທີ່ຫໍປະຊຸມແຫ່ງຊາດ ໂດຍການເປັນປະທານຂອງທ່ານ ບັນດິດ ສຈ. ບໍ່ວຽງຄໍາ ວົງດາລາ ລັດຖະມົນຕີ ກະຊວງເຕັກໂນໂລຊີ ແລະການສື່ສານ ມີບັນດາຮອງລັດຖະມົນຕີ ພ້ອມດ້ວຍຜູ້ຕາງໜ້າບັນດາຂະແໜງການ ແລະ ບັນດາຜູ້ປະກອນການກ່ຽວຂ້ອງເຂົ້າຮ່ວມ.

 

ໃນກອງປະຊຸມ ທ່ານ ໄຊລືຊາ ອິນສີຊຽງໃໝ່ ຮອງລັດຖະມົນຕີ ກະຊວງເຕັກໂນໂລຊີ ແລະການສື່ສານ ໄດ້ລາຍງານໂດຍສັງເຂບກ່ຽວກັບຜົນສຳເລັດຂອງການຈັດຕັ້ງປະຕິບັດແຜນພັດທະນາເຕັກໂນໂລຊີ ແລະການສື່ສານ ປະຈຳປີ 2023 ແລະທິດທາງແຜນການ ປີ 2024 ສາມາດຍາດໄດ້ຜົນສໍາເລັດທີ່ພົ້ນເດັ່ນສໍາຄັນຫຼາຍດ້ານ ສະແດງອອກຄື: ການສ້າງ ແລະປັບປຸງນະໂຍບາຍນິຕິກໍາເພື່ອຮອງຮັບການຄຸ້ມຄອງການຫັນເປັນດີຈີຕອນໄດ້ 25 ສະບັບ ການຫັນເປັນທັນສະໄໝລະບົບບໍລິການ ແລະ ບໍລິຫານລັດ ຫຼື ລັດເອເລັກໂຕຣນິກປັບປຸງ ແລະພັດທະນາລະບົບຫ້ອງການທັນສະໄໝຂອງກະຊວງເຕັກໂນໂລຊີ ແລະການສື່ສານ (e-Office v2) ແລະ ຂະຫຍາຍການນຳໃຊ້ລະບົບຫ້ອງການທັນສະໄໝ (e-Office) ຕິດຕັ້ງໄດ້ເພີ່ມ 18 ພາກສ່ວນ ປັດຈຸບັນມີຜູ້ນຳໃຊ້ທັງໝົດ 10.676 ບັນຊີ (ສູນກາງ 9.732 ບັນຊີ ທ້ອງຖິ່ນ 944 ບັນຊີ) ຂະຫຍາຍລະບົບສື່ສານພາກລັດ (G-Chat) ສຳເລັດສ້າງບັນຊີລາຍຊື່ເຂົ້ານຳໃຊ້ລະບົບ ໃຫ້ບັນດາຫ້ອງການພັກລັດທັງສູນກາງ ແລະ ທ້ອງຖິ່ນ ໃນທົ່ວປະເທດ ຈຳນວນ 4.625 ບັນຊີ 35 ພາກສ່ວນ ປັດຈຸບັນມີຈຳນວນທັງໝົດ 17.400 ບັນຊີ (ຂັ້ນສູນກາງ 8.623 ບັນຊີ ຂັ້ນທ້ອງຖີ່ນ 8.777 ບັນຊີ) ໄດ້ຂະຫຍາຍບັນຊີລາຍຊື່ລະບົບສື່ສານພາກລັດ G-Chat ຈາກ 10.000 ບັນຊີ ມາເປັນ 15.000 ບັນຊີ ໄດ້ຂະຫຍາຍບັນຊີລາຍຊື່ເຂົ້ານຳໃຊ້ລະບົບຈັດເກັບ ແລະນໍາໃຊ້ຂໍ້ມູນຮ່ວມກັນຂອງພາກລັດ (G-Share/G-Drive) ໃຫ້ກັບບັນດາກົມທຽບເທົ່າ ບັນດາກະຊວງຕ່າງໆ ທັງສູນກາງ ແລະທ້ອງຖິ່ນ ຈຳນວນ 778 ບັນຊີ ປັດຈຸບັນມີຈຳນວນທັງໝົດ ຈໍານວນ 11.611 ບັນຊີລາຍຊື່ (ສູນກາງ 6.312 ບັນຊີ ທ້ອງຖິ່ນ 5.299 ບັນຊີ).

 

ຂະຫຍາຍລະບົບເຄືອຂ່າຍພາຍໃນພາກລັດເຊື່ອມໂຍງບັນດາອົງການຈັດຕັ້ງລັດທັງຂັ້ນສູນກາງ ແລະທ້ອງຖິ່ນ ໄດ້ 10 ພາກສ່ວນ (10 ຫ້ອງວ່າການແຂວງ) ປັດຈຸບັນມີຈຳນວນທັງໝົດ 36 ຫ້ອງການ (ສູນກາງ 18 ຫ້ອງການ ແລະທ້ອງຖິ່ນ 18 ຫ້ອງການ) ຂະຫຍາຍລະບົບບັນຊີລາຍຊື່ ຈົດໝາຍເອເລັກໂຕຣນິກ (e-Mail) ໃຫ້ບັນດາຫ້ອງການລັດທັງສູນກາງ ແລະ ທ້ອງຖິ່ນ ຈຳນວນ 1.028 ບັນຊີລາຍຊື່ 39 ພາກສ່ວນ ປັດຈຸບັນມີຈຳນວນທັງໝົດ 5.002 ບັນຊີລາຍຊື່ (ສູນກາງ 3.701 ບັນຊີລາຍຊື່ ທ້ອງຖິ່ນ 1.301 ບັນຊີລາຍຊື່) 58 ໂດເມນ ສໍາເລັດການຂະຫຍາຍ ຈຳນວນ 214 ພາກສ່ວນ 829 ລາຍຊື່ (ສູນກາງ 47 ພາກສ່ວນ ທ້ອງຖີ່ນ 167 ພາກສ່ວນ) ໃນປີ 2023 ສັນຍານໂທລະສັບມືຖືຄວມຄຸມໄດ້ 18 ແຂວງ 148 ເມືອງ ແລະ 8.245 ບ້ານ ກວມ 97% ຂອງຈໍານວນບ້ານທັງໝົດ ໃນນີ້ແຍກເປັນລະບົບ 3G ກວມ 85% ແລະ 4G ກວມ 76% ສ່ວນລະບົບ 5G ໂດຍໄດ້ເປີດໃຫ້ບໍລິການ ເປັນຄັ້ງທໍາອິດຢູ່ ສປປ ລາວ ໃນວັນທີ 10/01/2024.

 

ນອກນັ້ນຍັງໄດ້ຂະຫຍາຍສາຍກາບໄຍແສງ (Optic Fiber) ໄດ້ຕື່ມ 1.854 ກິໂລແມັດ ປັດຈຸບັນມີທັງໝົດ 98.524 ກິໂລແມັດ ຂະຫຍາຍສະຖານີຮັບສົ່ງສັນຍານໂທລະສັບມືຖື ໄດ້ຕື່ມ 89 ສະຖານີ ປັດຈຸບັນມີທັງໝົດ 8.948 ແຫ່ງ ປັດຈຸບັນມີຈໍານວນຜູ້ນໍາໃຊ້ໂທລະສັບຕັ້ງໂຕະ ແລະ ໂທລະສັບມືຖືທັງໝົດ 6.113.455 ເລກໝາຍ ແລະ ລົງທະບຽນນໍາໃຊ້ອິນເຕີເນັດ (ລະບົບມີສາຍ ແລະ ຜ່ານຊິມ 3G ທັງໝົດ 4.614.752 ເລກໝາຍ) ປັດຈຸບັນມີຜູ້ປະກອບການຂະແໜງການໄປສະນີ ທັງໜົດ 63 ບໍລິສັດ ໃຫ້ບໍລິການລະຫວ່າງປະເທດ 4 ບໍລິສັດ ໃຫ້ບໍລິການລະຫວ່າງປະເທດ ແລະ ພາຍໃນປະເທດ 7 ບໍລິສັດ ແລະ ບໍລິການພາຍໃນແຂວງ 52 ບໍລິສັດ.

 

ກອງປະຊຸມຍັງໄດ້ຮັບຟັງການນໍາສະເໜີບົດໃນຫົວຂໍ້ຕ່າງໆ ທີ່ມີຄວາມໝາຍ ແລະຄວາມສຳຄັນຫຼາຍຕໍ່ກັບຂະແໜງການເຕັກໂນໂລຊີ ແລະການສື່ສານຊຶ່ງນໍາສະເໜີໂດຍ ບັນດາທ່ານຮອງລັດຖະມົນຕີ ຄະນະປະຈໍາພັກກະຊວງເປັນຕົ້ນແມ່ນ: ການກະກຽມຄວາມພ້ອມການພັດທະນາຊັບພະຍາກອນມະນຸດໃນການຫັນເປັນດິຈິຕອນ ການບໍລິຫານລັດດິຈິຕອນໃຫ້ເປັນທັນສະໄໝການແບ່ງຂັ້ນຄຸ້ມຄອງລະຫວ່າງສູນກາງ ແລະທ້ອງຖິ່ນພ້ອມນັ້ນບັນດາຜູ່ແທນທີ່ເຂົ້າຮ່ວມກອງປະຊູມກໍຈະໄດ້ຮ່ວມກັນປະກອບຄຳຄິດຄຳເຫັນເພື່ອເຮັດໃຫ້ມີເນື້ອໃນສົມບູນຄົບຖ້ວນຂຶ້ນເພື່ອຄວາມເປັນເອກະພາບ ແລະພ້ອມກັນນຳເອົາໄປຜັນຂະຫຍາຍຈັດຕັງປະຕິບັດ.

 

- ແຫລ່ງຂ່າວວຽງຈັນໃໝ່