ເຊັນສັນຍາ ພັດທະນາສວນກາເຟຕົ້ນແບບ ໃຫ້ຊາວກະສິກອນ

ບໍລິສັດເອເຊຍລົງທຶນ ພັດທະນາ ແລະ ກໍ່ສ້າງ ຈໍາກັດຜູ້ດຽວ (AIDC) ໄດ້ລົງນາມໃນບົດບັນທຶກຄວາມເຂົ້າໃຈໂຄງການໃຊ້ລະບົບໜູນວຽນກະເສດໃນການພັດທະນາສວນກາເຟຕົ້ນແບບໃຫ້ແກ່ຊາວກະສິກອນຜູ້ປູກກາເຟ ໃນ ສປປ ລາວ ກັບ ກຸ່ມບໍລິສັດ ປຕທ ປະກອບດ້ວຍ: ບໍລິສັດ ປຕທ ນໍ້າມັນ ແລະການຄ້າປີກ ຈໍາກັດ (ມະຫາຊົນ) ຫລື OR, ບໍລິສັດ ປຕທ ຈໍາກັດ (ມະຫາຊົນ) ຫລື PTT ແລະ ບໍລິສັດ ພີທີທີ (ລາວ) ຈໍາກັດ.

ໃນພິທີລົງນາມໄດ້ຈັດຂຶ້ນໃນວັນທີ 5 ມັງກອນ 2024 ທີ່ ປະເທດໄທ, ຈຸດປະສົງເພື່ອຮ່ວມສຶກສາ ແລະພັດທະນາໂຄງການການສ້າງຄວາມຍືນຍົງໃຫ້ກັບການເພາະປູກກາເຟ ໃນໂຄງການຕົ້ນແບບໃນ ສປປ ລາວ ເຊິ່ງເປັນການໃຊ້ລະບົບໜູນວຽນກະເສດ (Agroforestry) ໂດຍເພີ່ມການເພາະປູກຕົ້ນໄມ້ໃຫ້ຮົ່ມເງົາ ໃນພື້ນທີ່ປູກກາເຟ ຂອງ AIDC, ໂດຍ AIDC ຈະເປັນຜູ້ລົງທຶນເຮັດລະບົບຫມູນວຽນການກະເສດ ແລະເປັນຜູ້ບໍລິຫານຈັດການພື້ນທີ່ ເພື່ອໃຫ້ໄດ້ຜົນຜະລິດເມັດກາເຟ ທີ່ມີຄຸນນະພາບ ແລະ ບໍລິສັດ ພີທີທີ (ລາວ) ຈໍາກັດ ຈະເປັນຜູ້ຮັບຊື້ເມັດກາເຟປຸງແຕ່ງຜ່ານການຜະລິດທີ່ເປັນໄປຕາມມາດຕະຖານຂອງ ຄາເຟ ອາເມຊອນ ຈາກໂຄງການນີ້.

ນອກຈາກນີ້ແມ່ນໄດ້ຮັບການຮ່ວມມື ຈາກ PTT ເຊິ່ງເປັນຜູ້ຊ່ຽວຊານ ແລະມີປະສົບການ ໃນການຊື້-ຂາຍ ຄາບອນເຄດິດ ທັງພາຍໃນ ແລະຕ່າງປະເທດໂດຍການຈົດທະບຽນຄາບອນເຄດິດ ເພື່ອເພີ່ມມູນຄ່າ ໃຫ້ກັບສວນກາເຟ ແລະຄາບອນເຄດິດທີ່ເກີດຂຶ້ນຈາກໂຄງການຈະຊ່ວຍໃຫ້ແຕ່ລະບໍລິສັດສາມາດບັນລຸເປົ້າໝາຍ Carbon Neutrality ແລະ Net Zero Carbon ລວມໄປເຖິງການນໍາໄປຕໍ່ຍອດສ້າງມູນຄ່າເພີ່ມໃນຕະຫລາດລະດັບສາກົນ.

ໂຄງການນີ້ຈະເປັນຈຸດເລີ່ມຕົ້ນທີ່ສຳຄັນຂອງຄວາມຮ່ວມມື ກັບ ກຸ່ມບໍລິສັດ ປຕທ ເພື່ອຮ່ວມສຶກສາ ແລະພັດທະນາໂຄງການເພື່ອສ້າງຄວາມຍືນຍົງໃຫ້ກັບການເພາະປູກກາເຟ ໃນພື້ນທີ່ພູພຽງບໍລິເວນໄດ້ເພີ່ມເຕີມເຊິ່ງມີພື້ນທີ່ປູກກາເຟ ຫລາຍກວ່າ 48.000 ເຮັກຕາ ແລະມີໂອກາດໃນການສ້າງຄາບອນເຄດິດໄດ້ເພີ່ມອີກເປັນຈໍານວນຫລາຍ.

ໃນກອງປະຊຸມຍັງໄດ້ປຶກສາຫາລືເຖິງການຮ່ວມມືໃນດ້ານຕ່າງໆ ເຊັ່ນ: ນໍ້າມັນ, ຄາບອນເຄດິດຈາກປ່າໄມ້ ແລະການສົ່ງອອກກາເຟ ເພື່ອຮ່ວມເປັນສ່ວນໜຶ່ງ ໃນການພັດທະນາເສດຖະກິດ ຂອງ ສປປ ລາວ ໃຫ້ເຕີບໂຕຢ່າງຍືນຍົງ.

แชร์