ໃນວັນທີ 10 ມັງກອນ ທີ່ຫໍປະຊຸມແຫ່ງຊາດ, ກະຊວງເຕັກໂນໂລຊີ ແລະການສື່ສານ (ກຕສ) ໄດ້ຈັດພິທີເປີດງານສັບປະດາດິຈິຕອນລາວ 2024 (Lao Digital Week) ຄັ້ງທີ II ຂຶ້ນຢ່າງເປັນທາງການ, ໃຫ້ກຽດເຂົ້າຮ່ວມເປັນປະທານຂອງທ່ານ ສອນໄຊ ສີພັນດອນ ນາຍົກລັດຖະມົນຕີ, ມີທ່ານ ບັນດິດ ສຈ. ບໍ່ວຽງຄໍາ ວົງດາລາ ລັດຖະມົນຕີ ກຕສ, ມີລັດຖະມົນຕີ, ຮອງລັດຖະມົນຕີ ຈາກບັນດາກະຊວງ, ບັນດາທ່ານເຈົ້າແຂວງ, ຮອງເຈົ້າແຂວງ, ທູຕານຸທູດ, ແຂກຖືກເຊີນຈາກກະຊວງຖະແຫຼງຂ່າວ ແລະການສື່ສານ ສສ ຫວຽດນາມ, ກະຊວງໄປສະນີ ແລະໂທລະຄົມມະນາຄົມ ຣາຊະອານາຈັກ ກໍາປູເຈຍ, ບັນດາຄະນະກົມ/ທຽບເທົ່າ ພາຍໃນ ກຕສ ພ້ອມດ້ວຍບັນດາຫົວໜ້າ/ຮອງຫົວໜ້າ ພະແນກເຕັກໂນໂລຊີ ແລະ ການສື່ສານ ທົ່ວປະເທດເຂົ້າຮ່ວມ.

ທ່ານ ບັນດິດ. ສຈ ບໍ່ວຽງຄຳ ວົງດາລາ ໄດ້ກ່າວວ່າ: ນັບແຕ່ກາງປີ 2023 ກຕສ ໄດ້ເອົາໃຈໃສ່ກະກຽມຈັດງານ ສັບປະດາດິຈິຕອນລາວ 2024 ຊຶ່ງຈັດຂຶ້ນໃນລະຫວ່າງວັນທີ 10-14 ມັງກອນ 2024, ທີ່ ຫໍປະຊຸມແຫ່ງຊາດ, ພາຍໃຕ້ຄໍາຂວັນ “ຫັນເປັນດິຈິຕອນ ເພື່ອຫັນປ່ຽນການພັດທະນາເສດຖະກິດ-ສັງຄົມໄປສູ່ຄຸນນະພາບໃໝ່ແລະເພີ່ມທະວີການເຊື່ອມຈອດຢ່າງແຂງແຮງ” ຫຼື “Digital Transformation towards the Greater Socio-Economy Development and Resilient Connectivity”. ຊຶ່ງງານຄັ້ງນີ້ ປະກອບມີເວທີແລກປ່ຽນ ແລະເປີດໂອກາດໃຫ້ສັງຄົມລາວ ໂດຍສະເພາະແມ່ນຜູ້ປະກອບການ, ນັກຮຽນ, ນັກສຶກສາ, ນັກວິຊາການດ້ານໂທລະຄົມມະນາຄົມ, ໄອຊີທີ, ຄວາມປອດໄພໄຊເບີ ໄດ້ມາສະແດງທັດສະນະຄຳຄິດຄຳເຫັນ ແລະ ວາງສະແດງແລກປ່ຽນຜະລິດຕະພັນ. ພ້ອມດຽວກັນນັ້ນ, ກໍຈະໄດ້ເປີດໂອກາດ, ແລກປ່ຽນຄວາມຮູ້, ປະສົບການໃນການພັດທະນາເຕັກໂນໂລຊີດິຈິຕອນຂອງຜູ້ເຂົ້າຮ່ວມໃນງານ ເພື່ອນຳໄປຜັນຂະຫຍາຍທຸລະກິດຂອງຕົນ.

ທ່ານ ສອນໄຊ ສີພັນດອນ ໄດ້ກ່າວບົດປາໃສວ່າ: ງານສັບປະດາດິຈິຕ໋ອນປະຈຳປີ2024 ແລະສະເຫຼີມສະຫຼອງວັນດິຈິຕ໋ອນແຫ່ງຊາດວັນທີ 10 ມັງກອນ ຊຶ່ງແມ່ນເຫດການອັນສຳຄັນເປິດສັກກະລາດໃໝ່ໃຫ້ແກ່ການຫັນເປັນດິຈິຕ໋ອນຂອງປະເທດເຮົາ, ນີ້ສະແດງໃຫ້ເຫັນຄວາມຕັດສິນໃຈສູງຂອງພັກ, ລັດຖະບານ, ກໍຄືຄວາມມຸ້ງໝັ້ນຂອງພາກທຸລະກິດແລະສັງຄົມເພື່ອຊຸກຍູ້ການຫັນເປັນດີຈີຕ໋ອນຂອງປະເທດບົນ 3ເສົາຄ້ຳຄື: ການພັດທະນາລັດຖະບານດິຈິຕ໋ອນ, ພັດທະນາເສດຖະກິດດີຈີຕ໋ອນແລະພັດທະນາສັງຄົມດີຈີຕ໋ອນໃຫ້ມີທ່າກ້າວກະໂດດຂັ້ນຂຶ້ນເພີ່ມອີກ. ພ້ອມດຽວກັນນັ້ນ ທ່ານນາຍົກ ຍັງໄດ້ສະເໜີໃຫ້ເອົາໃຈໃສ່ບາງບັນຫາດັ່ງນີ້: 1) ໃຫ້ທົ່ວສັງຄົມພວກເຮົາຈົ່ງບຸກທະລຸທາງດ້ານຈິນຕະນາການເພື່ອສ້າງຄວາມສຳນຶກເປັນເອກະພາບກັນໃນການຫັນເປັນດິຈິຕ໋ອນຂອງປະເທດເຮົາ, ເສີມຂະຫຍາຍບົດບາດການນຳພາຂອງພັກແລະການຄຸ້ມຄອງລັດ; ປູກຈິດສຳນຶກໃຫ້ແກ່ຄະນະພັກແລະອຳນາດການປົກຄອງທຸກຂັ້ນໃຫ້ເຫັນໄດ້ຄວາມສຳຄັນອັນຮີບດ່ວນແລະເຂົ້າຮ່ວມຢ່າງຕັ້ງໜ້າໃນການຫັນເປັນດິຈິຕ໋ອນ.2) ສ້າງແຜນພັດທະນາແລະນິຕິກຳເພື່ອຊຸກຍູ້ການຫັນເປັນດິຈິຕ໋ອນ, ເອົາໃຈໃສ່ການນຳໃຊ້ເຕັກໂນໂລຊີດິຈີຕ໋ອນເພື່ອອຳນວຍຄວາມສະດວກໃນການບໍລິຫານແລະການບໍລິການຂອງລັດໃຫ້ແກ່ພາກທຸລະກິດແລະປະຊາຊົນ. 3) ສຸມໃສ່ການພັດທະນາແລະຍົກລະດັບບຸກຄະລາກອນໃຫ້ມີຄວາມສາມາດຮອງຮັບການຫັນເປັນດິຈິຕ໋ອນໂດຍເລີ່ມຈາກພະນັກງານການນຳທຸກຂັ້ນ. 4) ເອົາໃຈໃສ່ປັບປຸງແລະຂະຫຍາຍພື້ນຖານໂຄງລ່າງເພື່ອຮອງຮັບການຫັນເປັນດິຈິຕ໋ອນໃນຂອບເຂດທົ່ວປະເທດ. 5) ເປີດກວ້າງໃນການຮ່ວມມືແລະເຊື່ອນໂຢງທັງພາຍໃນແລະຕ່າງປະເທດເອົາໃຈໃສ່ສົ່ງເສີມແລະຂະຫຍາຍການຮ່ວມມືກັບບັນດາປະເທດເພື່ອນມິດຍຸດທະສາດແລະບັນດາປະເທດ ASEAN ເພື່ອຊຸກຍູ້ການຫັນເປັນດິຈິຕ໋ອນ, ດຶງດູດແລະຍາດແຍ່ງການຊ່ວຍເຫຼືອແລະການລົງທຶນຈາກຕ່າງປະເທດຢ່າງມີປະສິດທິພາບເພື່ອສະໜັບສະໜູນການຄົ້ນຄ້ວາເຕັກໂນໂລຊີ-ນະວັດຕະກຳອັນໃໝ່ແກ່ ສປປ ລາວ.