ສຳເລັດກອງປະຊຸມຄົບຄະນະບໍລິຫານງານພັກແຂວງ ເປີດກວ້າງ ຄັ້ງທີ 13 ສະໄໝທີ IX

ກອງປະຊຸມ ຄົບຄະນະບໍລິຫານງານພັກ ແຂວງສະຫວັນນະເຂດ (ເປີດກວ້າງ) ຄັ້ງທີ 13ສະໄໝທີ IX ໄດ້ເປີດຂຶ້ນເປັນທາງການ ໃນລະຫວ່າງວັນທີ 4-5 ມັງກອນ 2024 ຜ່ານມາ ໂດຍການເປັນປະທານຂອງ ສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ, ເລຂາພັກແຂວງ, ເຈົ້າແຂວງສະຫວັນນະເຂດ, ມີຄະນະປະຈຳພັກແຂວງ, ກຳມະການພັກແຂວງ ແລະ ພະນັກງານຫລັກແຫລ່ງອ້ອມຂ້າງແຂວງເຂົ້າຮ່ວມ.

ໃນວາລະປະຊຸມ, ສະຫາຍ ບຸນໂຈມ ອຸບົນປະເສີດ ໄດ້ຜ່ານບົດສະຫລຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ປະຈຳປີ 2023 ແລະ ທິດທາງແຜນການປີ 2024.ຈາກນັ້ນ, ໃນກອງປະຊຸມໄດ້ລາຍງານລົງເລິກສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງປີ 2023 ແລະ ທິດທາງແຜນການປີ 2024, ລາຍງານການຈັດຕັ້ງປະຕິບັດແຜນງົບປະມານປະຈຳປີ 2023 ແລະ ທິດທາງແຜນການປີ 2024 ຕິດພັນກັບການສ້າງຄວາມເຂັ້ມແຂງດ້ານງົບປະມານ, ເພີ່ມທະວີການຄຸ້ມຄອງ ແລະ ຕ້ານການຮົ່ວໄຫລຂອງລາຍຮັບງົບປະມານ, ລາຍງານການຊຸກຍູ້ສົ່ງເສີມການຜະລິດກະສິກຳເປັນສິນຄ້າ ເພື່ອທົດແທນການນໍາເຂົ້າ ແລະ ສົ່ງອອກທີ່ພົ້ນເດັ່ນຂອງແຂວງ. ພ້ອມນັ້ນ, ບັນດາພະແນກການຂອງແຂວງ ກໍໄດ້ລາຍງານການຈັດຕັ້ງປະຕິບັດໜ້າທີ່ວຽກງານໃນຂະແໜງການຂອງຕົນຮັບຜິດຊອບ, ລາຍງານສະພາບການຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ ຕິດພັນກັບການແກ້ໄຂບັນຫາປະກົດການຫຍໍ້ທໍ້ ແລະ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ທິດທາງແຜນການປີ 2024, ຜ່ານມະຕິວ່າດ້ວຍການແຕ່ງຕັ້ງຄະນະຊີ້ນຳ ແລະບັນດາອະນຸກຳມະການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ ແລະ ຄາດຄະເນແຕ່ລະບາດກ້າວ, ຂັ້ນຕອນການເຄື່ອນໄຫວແຕ່ລະວຽກ, ເພື່ອດຳເນີນກອງປະຊຸມໃຫຍ່ອົງຄະນະພັກເມືອງ, ນະຄອນ ແລະ ແຂວງໃນຕໍ່ໜ້າ, ລາຍງານການປັບປຸງກົງຈັກການຈັດຕັ້ງຢູ່ບັນດາພະແນກການ ແລະ ທຽບເທົ່າອ້ອມຂ້າງແຂວງ, ຢູ່ບັນດາຫ້ອງການ ແລະ ທຽບເທົ່າອ້ອມຂ້າງເມືອງ ຕາມຄຳສັ່ງ 190/ຄລສພ, ການກຳນົດຕຳແໜ່ງງານ ແລະ ການປັບປຸງອົງການປົກຄອງບ້ານໃນທົ່ວແຂວງ, ການປະກອບຄຳເຫັນ ແລະ ປັບປຸງລະບົບການເມືອງຢູ່ຮາກຖານບ້ານຕິດພັນກັບການແກ້ໄຂບັນຫາສາສະໜາ ແລະ ປະກົດການຫຍໍ້ທໍ້ຢູ່ລຽບຕາມຊາຍແດນຂອງເມືອງເຊໂປນ, ການປະກອບຄຳເຫັນຕໍ່ຜົນສຳເລັດ ໃນການປັບປຸງການຈັດຕັ້ງຮາກຖານບ້ານ ຕິດພັນກັບການປັບປຸງອຳນາດການປົກຄອງບ້ານ ຕາມທິດຫັນເປັນໜຸ່ມ, ປະກອບຄຳເຫັນການຜັນຂະຫຍາຍຂໍ້ກຳນົດເລກທີ 416/ຄລສພ ລົງວັນທີ 28 ສິງຫາ 2023 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະພັກຮາກຖານກຸ່ມບ້ານ ແລະ ບ້ານໃຫຍ່ ເພື່ອສ້າງຄວາມເຂັ້ມແຂງຢູ່ຂັ້ນຮາກຖານ ແລະ ບັນຫາອື່ນໆທີ່ປິ່ນອ້ອມໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ໄດ້ຖືກນຳມາສະເໜີໃນກອງປະຊຸມຄັ້ງນີ້.

ໃນຕອນທ້າຍຂອງກອງປະຊຸມ ສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ, ເລຂາພັກແຂວງ, ເຈົ້າແຂວງສະຫວັນນະເຂດກໍໃຫ້ທິດຊີ້ນຳຕໍ່ກອງປະຊຸມ, ພ້ອມທັງກ່າວປິດກອງປະຊຸມເປີດກວ້າງຄະນະບໍລິຫານງານພັກແຂວງ ຄັ້ງທີ 13 ສະໄໝທີ IX ຢ່າງເປັນທາງການ.

แชร์