ສສກ ເຊກອງ ຊີ້ແຈງການປະຕິບັດ 15 ຄາດໝາຍ ແລະການແກ້ໄຂຄູບໍ່ຂຶ້ນຫ້ອງສອນ

ໃນວັນທີ 4 ມັງກອນ 2024 ການດໍາເນີນກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງ (ສພຂ) ເຊກອງ ຊຸດທີ II ພາຍໃຕ້ການເປັນປະທານຂອງທ່ານ ດົງເພັດ ພະຍົນ ປະທານສະພາປະຊາຊົນແຂວງ, ທ່ານ ຄໍາໄພ ສິມມາວັດ ຫົວໜ້າພະແນກສຶກສາທິການ ແລະ ກິລາ (ສສກ) ແຂວງເຊກອງ ໄດ້ຊີ້ແຈງຕໍ່ຄໍາຖາມເຈາະຈີ້ມຂອງສະພາປະຊາຊົນແຂວງ (ສພຂ) ແລະ ຄໍາຊັກຖາມຂອງສະມາຊິກສະພາປະຊາຊົນແຂວງ (ສສຂ) ກ່ຽວກັບການປະຕິບັດບັນດາ 15 ຄາດໝາຍ ທີ່ນອນໃນຄວາມຮັບຜິດຊອບຂອງຂະແໜງ ສສກ ແລະການແກ້ໄຂບັນຫາຄູບໍ່ຂຶ້ນຫ້ອງສອນໂດຍສະເພາະຢູ່ເຂດຫ່າງໄກສອກຫລີກ.

ທ່ານ ຄໍາໄພ ສິມມາວັດ ໄດ້ຊີ້ແຈງວ່າ: ໃນໄລຍະຜ່ານມາ, ຂະແໜງການສຶກສາທິການ ແລະກິລາ ທຸກຂັ້ນພາຍໃນແຂວງ ໄດ້ເອົາໃຈໃສ່ປະຕິບັດບັນດາ 15 ຄາດໝາຍ ຊຶ່ງມາຮອດສົກຮຽນ 2022-2023 ບັນລຸໄດ້ 10 ຄາດໝາຍ ແລະ ຍັງ 5 ຄາດໝາຍ. ໃນນີ້, ສໍາລັບ 10 ຄາດໝາຍທີ່ບັນລຸ ແມ່ນມີ 4 ຄາດໝາຍທົດຖອຍຈາກປີຜ່ານມາ; ແຕ່ຂະແໜງສຶກສາທິການ ແລະ ກິລາແຂວງໄດ້ວາງມາດຕະການ ແລະ ວິທີແກ້ໄຂ ໂດຍຈະສືບຕໍ່ຜັນຂະຫຍາຍຂໍ້ຕົກລົງ ວ່າດ້ວຍການຄຸ້ມຄອງການສຶກສາພາກບັງຄັບພາຍໃນແຂວງ, ຂໍ້ຕົກລົງ ວ່າດ້ວຍການຄຸ້ມຄອງການປະກອບສ່ວນຈາກຊຸມຊົນເຂົ້າໃນວຽກງານການສຶກສາ ແລະກິລາ; ປັບປຸງຄະນະພັດທະນາການສຶກສາແຕ່ລະຂັ້ນໃຫ້ມີຄວາມເຂັ້ມແຂງ, ເຮັດໜ້າທີ່ປຸກລະດົມພໍ່-ແມ່ຜູ້ປົກຄອງເດັກນັກຮຽນໃຫ້ຊຸກຍູ້ລູກ-ຫລານຂອງຕົນທີ່ຮຽນຈົບຊັ້ນປະຖົມ ປ5 ໃຫ້ໄດ້ສືບຕໍ່ຮຽນໃນຊັ້ນ ມ1 ຫລາຍຂຶ້ນ; ສ້າງເງື່ອນໄຂ ແລະ ສິ່ງອໍານວຍຄວາມສະດວກໃຫ້ພາກເອກະຊົນຂະຫຍາຍໂຮງຮຽນໃຫ້ຫລາຍຂຶ້ນ ເພື່ອຮັບຮອງເດັກໃນເກນອາຍຸໄດ້ເຂົ້າຮຽນ ແລະ ເປັນການສ້າງເງື່ອນໄຂໃຫ້ນັກສຶກສາທີ່ຮຽນຈົບສາຍຄູມີວຽກເຮັດງານທໍາ; ສືບຕໍ່ສົມທົບກັບຂະແໜງການສຶກສາຂັ້ນເມືອງ, ຂັ້ນບ້ານ, ຂະຫຍາຍຫ້ອງຮຽນມັດທະຍົມໃນບັນດາກຸ່ມໂຮງຮຽນປະຖົມສຶກສາໃຫ້ທົ່ວເຖິງໂດຍສະເພາະກຸ່ມໂຮງຮຽນເຂດຫ່າງໄກສອກຫລີກ; ສະເໜີທຶນການສຶກສາໃຫ້ແກ່ເດັກນັກຮຽນຈົບຊັ້ນ ປ5 ເຂົ້າຮຽນຊັ້ນ ມ1 ທີ່ມີຜົນການຮຽນດີແຕ່ຂາດໂອກາດ ແລະກໍານົດນະໂຍບາຍຕໍ່ນັກຮຽນທີ່ຮຽນດີ-ຮຽນເກັ່ງໃນບັນດາກຸ່ມໂຮງຮຽນໃຫ້ມີໂອກາດໄດ້ຮຽນຕໍ່ຊັ້ນມັດທະຍົມສຶກສາ.

ສ່ວນການແກ້ໄຂບັນຫາຄູປະລະໜ້າທີ່ (ຄູບໍ່ຂຶ້ນຫ້ອງສອນ) ໂດຍສະເພາະຢູ່ເຂດຫ່າງໄກສອກຫລີກນັ້ນ, ຂະແໜງສຶກສາທິການ ແລະກິລາແຂວງໄດ້ປະສານສົມທົບກັບຂະແໜງການກ່ຽວຂ້ອງເອົາໃຈໃສ່ສຶກສາອົບຮົມການເມືອງ-ນໍາພາແນວຄິດພະນັກງານຄູ-ອາຈານໃຫ້ທົ່ວເຖິງ ເພື່ອສ້າງຄວາມຮັບຮູ້ເຂົ້າໃຈຢ່າງເລິກເຊິ່ງຕໍ່ແນວທາງຂອງພັກ, ແຜນນະໂຍ ບາຍຂອງລັດ, ມີຄວາມຮັບຜິດຊອບຕໍ່ໜ້າທີ່ວຽກງານ ແລະຮັກໃນອາຊີບຂອງຕົນ; ຜູ້ບໍລິຫານການສຶກສາ ແລະກິລາທຸກຂັ້ນສືບຕໍ່ລົງຊຸກຍູ້ໃຫ້ການຊ່ວຍເຫລືອຄູດ້ວຍຮູບການຕ່າງໆໃຫ້ຕໍ່ເນື່ອງ; ຊີ້ນໍາກຸ່ມໂຮງຮຽນໃຫ້ມີການຊ່ວຍເຫລືອກັນທາງດ້ານວິຊາການ, ອໍານວຍສະດວກເກື້ອກູນເຊິ່ງກັນ ແລະກັນທາງດ້ານຊັບພະຍາກອນ ພ້ອມທັງປັບປຸງລະບົບນິເທດພາຍໃນກຸ່ມໂຮງຮຽນ ແລະ ພາຍໃນໂຮງຮຽນໃຫ້ດີກວ່າເກົ່າ.
---
ຂ່າວ: ສັນຍາ
ພາບ: ບູ້ສຸວັນ

แชร์