ເຊກອງ ເອົາໃຈໃສ່ຄຸ້ມຄອງການນໍາເຂົ້າສິນຄ້າ ທີ່ມີຜົນກະທົບຕໍ່ສິນຄ້າຜະລິດພາຍໃນ

ໃນວາລະດໍາເນີນກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງ (ສພຂ) ເຊກອງ ຊຸດທີ II ໃນຕອນບ່າຍວັນທີ 3 ມັງກອນ 2024; ທ່ານ ດາວວີ ສວຍທະລັງສີ ຫົວໜ້າພະແນກອຸດສາຫະກໍາ ແລະການຄ້າ (ອຄ) ແຂວງເຊກອງ ໄດ້ຂຶ້ນຊີ້ແຈງບາງບັນຫາ ທີ່ສະມາຊິກສະພາປະຊາຊົນແຂວງ (ສສຂ) ໃຫ້ຄວາມສົນໃຈ ແລະ ຊັກຖາມ ໂດຍສະເພາະແມ່ນບັນຫາການຄຸ້ມຄອງການນໍາເຂົ້າສິນຄ້າ ທີ່ມີຜົນກະທົບຕໍ່ສິນຄ້າຜະລິດພາຍໃນ ແລະສິນຄ້າສາມາດຜະລິດໄດ້ສາມາດກຸ້ມຕົນເອງພາຍໃນແຂວງ.

ທ່ານ ດາວວີ ສວຍທະລັງສີ ກ່າວວ່າ: ໃນໄລຍະຜ່ານມາພະແນກອຸດສາຫະກໍາ ແລະການຄ້າແຂວງໄດ້ປະສານສົມທົບກັບພາກສ່ວນກ່ຽວຂ້ອງລົງເຄື່ອນໄຫວ ແລະ ສໍາຫລວດຄຸ້ມຄອງຕາມລາຍການບັນຊີສິນຄ້າຄຸ້ມຄອງໃນ 8 ໝວດ 23 ລາຍການ ແລະ ບັນຊີສິນຄ້າທົ່ວໄປໃນ 205 ລາຍການ. ໃນນີ້, ສິນຄ້າທີ່ສາມາດຜະລິດໄດ້ກຸ້ມຕົນເອງພາຍໃນແຂວງປະກອບມີຊີ້ນໝູຜະລິດໄດ້ 63.368 ໂຕນ/ປີ; ຊີ້ນງົວ 39.690 ໂຕນ/ປີ; ຊີ້ນຄວາຍ 25.242 ໂຕນ/ປີ; ສັດປີກ (ເປັດ-ໄກ່) 961.487 ໂຕນ/ປີ; ເຂົ້າເປືອກ 45.456 ໂຕນ/ປີ; ໄຂ່ໄກ່ 116.000 ແຕະ/ປີ ແລະ ພືດຜັນຜະລິດໄດ້ 7.614 ໂຕນ/ປີ ແລະ ສິນຄ້າທີ່ແຂວງບໍ່ສາມາດຜະລິດໄດ້-ບໍ່ກຸ້ມຕົນເອງ ແລະນໍາເຂົ້າປະກອບມີນໍ້າມັນເຊື້ອໄຟ-ອາຍແກັດ, ປະເພດປາ, ອາຫານທະເລ, ເຄື່ອງກໍ່ສ້າງ, ເຄື່ອງມືການຜະລິດກະສິກໍາ ແລະ ເຄື່ອງອຸປະໂພກ-ບໍລິໂພກຈໍານວນໜຶ່ງ.

ສ່ວນການຄຸ້ມຄອງການນໍາເຂົ້າສິນຄ້າ ທີ່ມີຜົນກະທົບຕໍ່ສິນຄ້າຜະລິດພາຍໃນຂະແໜງອຸດສາຫະກໍາ ແລະການຄ້າແຂວງໄດ້ເອົາໃຈໃສ່ຜັນຂະຫຍາຍ ແລະຈັດຕັ້ງປະຕິບັດຄໍາສັ່ງແນະນໍາຂອງກະຊວງອຸດສາຫະກໍາ ແລະ ການຄ້າ ສະບັບເລກທີ 0395/ອຄ ກ່ຽວກັບການລົບລ້າງສິ່ງກີດຂວາງທີ່ເປັນອຸປະສັກຕໍ່ການຈໍລະຈອນສິນຄ້າ; ຄໍາສັ່ງຂອງນາຍົກລັດຖະມົນຕີ ສະບັບເລກທີ 12/ນຍ ວ່າດ້ວຍການອໍານວຍຄວາມສະດວກໃຫ້ແກ່ການນໍາເຂົ້າ-ສົ່ງອອກສິນຄ້າ, ການນໍາເຂົ້າຊົ່ວຄາວ, ການຜ່ານແດນ ແລະການເຄື່ອນຍ້າຍສິນຄ້າຢູ່ ສປປ ລາວ ໂດຍລວມເຫັນວ່າສິນຄ້າມີການເຄື່ອນໄຫວໄປຕາມຄວາມຕ້ອງການຂອງຕະຫລາດຊຶ່ງຂະແໜງອຸດສາຫະກໍາ ແລະການຄ້າແຂວງເຮັດໜ້າທີ່ໃນການຄຸ້ມຄອງດ້ານລາຄາ, ການປະຕິບັດລະບຽບກົດໝາຍກ່ຽວຂ້ອງ ແລະອໍານວຍຄວາມສະດວກໃຫ້ສິນຄ້າມີການຈໍລະຈອນໄປຢ່າງຄ່ອງຕົວ.
---
ຂ່າວ: ສັນຍາ
ພາບ: ບູ້ສຸວັນ

แชร์