ປີນີ້ ເຊກອງ ຈະສູ້ຊົນພັດທະນາເສດຖະກິດຂະຫຍາຍຕົວໃນລະດັບ 6%

ຕາມການລາຍງານຈາກ ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ໃນກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງເຊກອງ ຊຸດທີ II ວັນທີ 3 ມັງກອນ 2024 ວ່າ: ໃນປີ 2024 ແຂວງເຊກອງ ຈະສູ້ຊົນພັດທະນາເສດຖະກິດໃຫ້ຫຍາຍຕົວໃນລະດັບ 6%, ມູນຄ່າລວມຍອດຜະລິດຕະພັນພາຍໃນ ຫລື GDP ບັນລຸ 3.057 ຕື້ກີບ, ສະເລ່ຍໃສ່ຫົວຄົນໄດ້ 21,9 ລ້ານກີບ ແລະ ສູ້ຊົນເກັບລາຍຮັບເຂົ້າງົບປະມານໃຫ້ໄດ້ 298,42 ຕື້ກີບ ທຽບໃສ່ປີ 2023 ເພີ່ມຂຶ້ນ 48,33% ສາມາດກ້າວຂຶ້ນເປັນແຂວງກຸ້ມຕົນເອງທາງດ້ານລາຍຈ່າຍງົບປະມານຈຳນວນໜຶ່ງ. ໃນນີ້, ລາຍຮັບພູດສູນກາງ 77 ຕື້ກວ່າກີບ ເພີ່ມຂຶ້ນ 670% ແລະ ລາຍຮັບພູດທ້ອງຖີ່ນ 221,35 ຕື້ກີບ ເພີ່ມຂຶ້ນ 15,78%.

ທ່ານ ເຫລັກໄຫລ ສີວິໄລ ຍັງໃຫ້ຮູ້ອີກວ່າ: ສຳລັບທິດທາງແຜນການ ແລະແຜນວຽກຈຸດສຸມໃນປີ 2024 ແຂວງເຊກອງ ຈະສືບຕໍ່ເຮັດໃຫ້ທົ່ວແຂວງມີສະຖຽນລະພາບທາງດ້ານການເມືອງ, ປະຕິ ບັດແນວທາງ ປກຊ-ປກສ ທົ່ວປວງຊົນຮອບດ້ານຢ່າງຕັ້ງໜ້າ, ສ້າງກຳລັງປະກອບອາວຸດໃຫ້ເຂັ້ມແຂງ, ປະຕິບັດໜ້າທີ່ພັນທະຕໍ່ປະເທດຊາດ ແລະປະຊາຊົນ, ເພີ່ມທະວີການແກ້ໄຂປະກົດການຫຍໍ້ທໍ້ຕ່າງໆໃນສັງຄົມໃຫ້ຫລຸດໜ້ອຍຖອຍລົງ, ຜັນຂະຫຍາຍ ແລະຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໃຫ້ເຂົ້າສູ່ລວງເລິກ; ສືບຕໍ່ປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ໂດຍຖືເອົາວຽກງານຫັນລົງກໍ່ສ້າງຮາກຖານການເມືອງ, ສ້າງຂະບວນການແຂ່ງຂັນຮັກຊາດ ແລະພັດທະນາ ແລະ ວຽກງານ 3 ສ້າງ; ຊຸກຍູ້ການສ້າງຖານການຜະລິດໃໝ່ໃນຂົງເຂດອຸດສະຫະກຳ, ກະສິກຳ, ຫັດຖະກໍາ ແລະ ການບໍລິການ; ຊຸກຍູ້ສົ່ງເສີມການຜະລິດ ແລະ ສົ່ງເສີມການແປຮູບຜະລິດຕະພັນກະສິກໍາ, ສົ່ງເສີມວຽກງານຫັດຖະກໍາເຂົ້າໃນການພັດທະນາສິນຄ້າທ່າແຮງໃຫ້ກາຍ ເປັນສິນຄ້າໂອດັອບແຫ່ງຊາດ ຕາມພູມປັນຍາຊາວບ້ານ; ສູ້ຊົນເຮັດໃຫ້ມູນຄ່າຈໍລະຈອນສິນຄ້າ(ຂາຍຍົກ, ຂາຍຍ່ອຍ ແລະ ບໍລິການ) ເພີ່ມຂຶ້ນ; ສ້າງແຜນພັດທະນາການທ່ອງທ່ຽວ, ສົ່ງເສີມການສ້າງຕັ້ງ ແລະດໍາເນີນທຸລະກິດ SME, ພັດທະນາຈຸນລະວິສາຫະກິດ, ວິສາຫະກິດຂະໜາດນ້ອຍ ແລະກາງໄປສູ່ຄຸນນະພາບໃໝ່.

ພ້ອມທັງເອົາໃຈໃສ່ຈັດເກັບລາຍຮັບ-ຄຸ້ມຄອງລາຍຈ່າຍງົບປະມານ, ປະຕິບັດມາດຕະການປະຢັດຕ້ານການຟຸມເຟືອຍ, ອັດທຸກຊ່ອງຫວ່າງການຮົ່ວໄຫລຂອງລາຍຮັບ ດ້ວຍການນໍາໃຊ້ເຕັກໂນໂລຊີທີ່ທັນສະໄໝ ແລະ ປະຕິບັດມາດຕະການແກ້ໄຂບັນຫາຄວາມຫຍຸ້ງທາງດ້ານເສດຖະກິດ-ການເງິນ ເປັນຕົ້ນບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະໜີ້ສິນຕ່າງປະເທດໃຫ້ແຂງແຮງ; ພັດ ທະນາຊັບພະຍາກອນມະນຸດໃຫ້ມີຄຸນນະພາບ, ປະຕິບັດບັນດາຄາດໝາຍຕົວຊີ້ວັດຂົງເຂດສຶກສາ, ສາທາລະນະສຸກ ແລະແຮງງານສະຫວັດດີການ-ສັງຄົມ ເພື່ອເປັນກໍາລັງແຮງຂັບເຄື່ອນການພັດທະນາແຂວງໃຫ້ຫລຸດພົ້ນອອກຈາກຄວາມທຸກຍາກ ແລະບັນລຸເປົ້າໝາຍການພັດທະນາແບບຍືນຍົງ.
ຂ່າວ: ສັນຍາ
ພາບ: ບູ້ສຸວັນ

แชร์