ທ່ານ ນິກອນ ຄຸດມະນີ ຮອງເຈົ້າເມືອງຫີນບູນ, ຜູ້ຊີ້ນຳຂົງເຂດວຽກງານວັດທະນະທຳ-ສັງຄົມ ຂອງເມືອງໃຫ້ສຳພາດຕໍ່ສື່ມວນຊົນເມື່ອບໍ່ດົນນີ້ວ່າ: ເມືອງຫີນບູນ ມີແຫລ່ງທ່ອງທ່ຽວທັງໝົດ 13 ແຫ່ງ ໃນນັ້ນ, ແຫລ່ງທ່ອງທ່ຽວທາງດ້ານວັດທະນະທຳມີ 3 ແຫ່ງ ປະກອບມີ: ທາດຫົວນາ ບ້ານຫົວນາ, ຖໍ້າພະ ບ້ານທ່າໝີ ແລະ ພະອົງແສນ ບ້ານນາຄື; ແຫລ່ງທ່ອງທ່ຽວທາງດ້ານທຳມະຊາດ 8 ແຫ່ງຄື: ຂຸນກອງແລງ ບ້ານນາຄື, ຂຸນນໍ້າປະກັນ ບ້ານບວມລູ, ຖໍ້າກວນໄນ ບ້ານອິນແປງ, ຕາດຄອນແກ້ວ ບ້ານນາໂພ, ຂຸນແຂ້ ບ້ານທ່າໝີ, ວັງນໍ້າຕົກສາຍນໍ້າປະກັນ ບ້ານນາທານ, ໜອງມິນ ບ້ານບໍ່ແໜ່ງ, ຖໍ້າປ່ອງ ບ້ານບົງ ແລະ ແຫລ່ງທ່ອງທ່ຽວທາງດ້ານປະຫວັດສາດ 2 ແຫ່ງຄື: ໂບດທີ່ເປັນສະຖາປັດຕະຍະກຳສະໄໝອານານິຄົມຝຣັ່ງ ຢູ່ບໍ່ໂພນຕິ້ວ ແລະ ເຮືອນຂອງທ່ານ ບຸນອູ້ມ ບ້ານໜອງຊື່ນ.

 

ສະເພາະເຂດບ້ານນາຄື ທີ່ມີແຫລ່ງທ່ອງທ່ຽວພະອົງແສນ ທີ່ເປັນບ່ອນສັກກາລະບູນຊາ, ເຕົ້າໂຮມຈິດໃຈຂອງພໍ່ແມ່ປະຊາຊົນ ແລະມີແຫລ່ງທ່ອງທ່ຽວຂຸນກອງແລງ ເປັນແຫລ່ງທ່ອງທ່ຽວທີ່ມີຊື່ສຽງ ມາແຕ່ດົນນານ ເຊິ່ງໄດ້ຮັບການສຳປະທານ ແລະ ພັດທະນາ ໂດຍບໍລິສັດ ອິນທຣາ ໂຄໂປເລຊັ່ນ ຈຳກັດ ເຊິ່ງແຫລ່ງທ່ອງທ່ຽວດັ່ງກ່າວ ກໍນອນຢູ່ໃນເປົ້າໝາຍຂອງແຂວງ ທີ່ໄດ້ກຳນົດໃຫ້ເປັນແຫລ່ງທ່ອງທ່ຽວເປີດໃໝ່ຕ້ອນຮັບປີທ່ອງທ່ຽວລາວ 2024. ມາຮອດປັດຈຸບັນ, ໂຄງການແມ່ນມີຄວາມຄືບໜ້າ ປະມານ 70-80% ໂດຍການນໍາຂອງເມືອງຫີນບູນ ກໍໄດ້ລົງຊຸກຍູ້ຕິດຕາມເພື່ອເຮັດໃຫ້ໂຄງການໄດ້ສືບຕໍ່ພັດທະນາ ແລະສຳເລັດຕາມກໍານົດພ້ອມເປີດໃຫ້ບໍລິການຕາມເປົ້າໝາຍທີ່ວາງໄວ້. ນອກນັ້ນ, ຍັງໄດ້ຊຸກຍູ້ອຳນາດການປົກຄອງ ແລະພໍ່ແມ່ປະຊາຊົນບ້ານນາຄື ເອົາໃຈໃສ່ປົກປັກຮັກສາປ່າໄມ້ ແລະອະນຸລັກສັດປ່ານາໆພັນ ໃນເຂດໂຄງການ, ພ້ອມກັນປະກອບສ່ວນ ແລະໃຫ້ການຊ່ວຍເຫລືອໂຄງການໃນດ້ານຕ່າງໆ ເພື່ອຮ່ວມກັນເປັນເຈົ້າພາບທີ່ດີໃນການຕ້ອນຮັບນັກທ່ອງທ່ຽວ, ປຸກລະດົມປະຊາຊົນ ແລະຊາວໜຸ່ມພາຍໃນບ້ານເຂົ້າເຮັດວຽກບໍລິການຢູ່ໃນໂຄງການເພື່ອສ້າງວຽກເຮັດງານທຳ ແລະພ້ອມກັນສົ່ງເສີມການຜະລິດກະສິກຳຕອບສະໜອງໃຫ້ແກ່ໂຄງການລວມເຖິງການສົ່ງເສີມຜະລິດຕະພັນຂອງທ້ອງຖິ່ນທີ່ມີຢູ່ແລ້ວໃຫ້ໄດ້ຮັບການພັດທະນາດີຂຶ້ນ ແລະ ຄົ້ນຄິດຜະລິດຕະພັນອັນໃໝ່ຈຳໜ່າຍໃຫ້ແກ່ນັກທ່ອງທ່ຽວເປັນການສ້າງອາຊີບທີ່ໝັ້ນຄົງເພື່ອສ້າງລາຍຮັບເຂົ້າຄອບຄົວ ແລະປະກອບສ່ວນພັດທະນາຄອບຄົວໃຫ້ມີຊີວິດການເປັນຢູ່ນັບມື້ດີຂຶ້ນ.

ຂ່າວ: ກອງຄຳ