ເມື່ອບໍ່ດົນມານີ້, ແຂວງບໍ່ແກ້ວ ເປີດບຸນປະເພນີບັນດາເຜົ່າ ປີ 2023 ຕິດພັນກັບການເປີດປີທ່ອງທ່ຽວລາວ 2024 ຢ່າງເປັນທາງການຢູ່ເດີ່ນກິລາຂອງແຂວງ ບ້ານປ່າອ້ອຍ ເມືອງຫ້ວຍຊາຍ, ໃນພິທີແມ່ນເລີ່ມຈາກຂະບວນແຫ່ກອນກໍາລັງຈາກຫລາຍພາກສ່ວນເຂົ້າສູ່ງານໂດຍມີແຂກຮັບເຊີນຈາກແຂວງອຸດົມໄຊ, ໄຊຍະບູລີ, ຫຼວງພະບາງ, ເຂດເສດຖະກິດພິເສດສາມຫຼ່ຽມຄໍາ, ອະດີດການນໍາ, ຜູ້ຊົງຄຸນວຸດທິ, ເຈົ້າກົກ-ເຫຼົ່າ, ການນໍາພັກ-ລັດ ຂອງແຂວງ ແລະບັນດາເມືອງ, ນັກທຸລະກິດ, ຜູ້ປະກອບການ, ພະນັກງານ, ທະຫານ-ຕໍາຫຼວດ ແລະປະຊາຊົນບັນດາເຜົ່າເຂົ້າຮ່ວມຢ່າງຄຶກຄື້ນ.

 

ໃນພິທີ, ທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວ ໄດ້ກ່າວເປີດງານຢ່າງເປັນທາງການວ່າ: ການຈັດບຸນປະເພນີບັນດາເຜົ່າ ປະຈໍາປີ 2023 ຕິດພັນກັບການເປີດປີທ່ອງທ່ຽວລາວ 2024 ຢູ່ແຂວງບໍ່ແກ້ວຄັ້ງນີ້ມີຫຼາຍກິດຈະກໍາທີ່ໄດ້ສ່ອງແສງເຖິງວິທີການດໍາລົງຊີວິດຂອງປະຊາຊົນບັນດາເຜົ່າ, ການອະນຸລັກຮີດຄອງປະເພນີ, ຂະນົບທໍານຽມ, ການນຸ່ງຖື, ການແຕ່ງກາຍທີ່ເປັນເອກະລັກຂອງບັນດາເຜົ່າພາຍໃນແຂວງບໍ່ແກ້ວ, ທັງເປັນການອານຸລັກ ແລະສົ່ງເສີມວັດທະນະທໍາຮີດຄອງປະເພນີອັນດີງາມຂອງບັນດາເຜົ່າ ທີ່ສ່ອງແສງເຖິງວິຖີການດໍາລົງຊີວິດ, ມູນເຊື້ອສາມັກຄີ ຄວາມດຸໝັ່ນຂະຫຍັ່ນພຽນໃນການອອກແຮງງານ, ຄວາມອຸດົມຮັ່ງມີ ແລະສວຍງາມຂອງບ້ານເກີດເມືອງນອນ, ດິນແດນອັນຍະມະນີທີ່ລືຊື່ສ່ອງແສງເຖິງຮອຍຍິ້ມແຫ່ງຄວາມມີສະເໜ່ຂອງປະຊາຊົນບັນດາເຜົ່າພາຍໃນແຂວງບໍ່ແກ້ວ, ທັງເປັນການປູກໃຈສໍານຶກໃຫ້ແກ່ຄົນຮຸ່ນໃໝ່ ໄດ້ຮັບຮູ້ ແລະເຂົ້າໃຈເຖີງວິຖີການດໍາລົງຊີວິດ, ການນຸ່ງຖືຂອງແຕ່ລະຊົນເຜົ່າ. ພ້ອມນີ້, ຍັງມີການວາງຈໍາໜ່າຍສິນຄ້າໂອດັອບຜະລິດຕະພັນຂອງແຂວງ-ເມືອງ, ເຮືອນຈໍາລອງຂອງ 13 ຊົນເຜົ່າ, ຊົມວິທີການດໍາລົງຊີວິດ ການຫຼິ້ນບຸນຂອງແຕ່ລະເຜົ່າ ແລະໃນງານຍັງມີກິດຈະກໍາການປະກວດອາຫານພື້ນບ້ານຂອງໜ່ວຍສະຫະພັນແມ່ຍິງພາຍໃນເທສະບານແຂວງຕື່ມອີກ.

 

ສໍາລັບປີທ່ອງທ່ຽວລາວ 2024 ແຂວງບໍ່ແກ້ວ ມີຫຼາຍກິດຈະກໍາເປັນຕົ້ນບຸນກິນຈຽງເຜົ່າມົ້ງ, ເທສະການດອກງິ້ວບານ, ເທສະການພາຂວັນໃຫຍ່, ເທສະການພືດກະສິກໍາ, ບຸນຢູນກຼະ ເຜົ່າກຶມມຸ, ເທສະການທ່ອງທ່ຽວດອນເຜິ້ງຄໍາ, ບຸນປີໃໝ່ລາວ, ບຸນບັ້ງໄຟເຜົ່າໄຕລື້, ແລ່ນມາຣາທອນ, ບຸນຊ່ວງ ເຮືອ-ໄຫລເຮືອໄຟ, ບຸນນະມັດສະການພະທາດສຸວັນນະພາຄໍາ. ພ້ອມນີ້, ຍັງມີແຫລ່ງທ່ອງທ່ຽວຫລາກຫລາຍ ເປັນຕົ້ນການທ່ອງທ່ຽວທາງດ້ານປະຫວັດສາດ, ວັດທະນະທໍາ, ທໍາ ມະຊາດ ແລະອື່ນໆ.

ຂ່າວ: ຄໍາເພັງ ສີສະຫວ່າງ